Ads by Google Ads by Google

Tala otooto o Fa’amasinoga

IOE SE ALI’I FAIAOGA I TU’UAIGA A LE MALO

 

O le aso 16 Oketopa lea ua fa’atulaga e lau ai le fa’asalaga a le ali’i faiaoga ia Rose Auva’a, ina ua ta’usala o ia e le fa’amasinoga maualuga i le vaiaso na te’a nei, i le moliaga mamafa o lona faia lea o uiga mataga fa’afeusuaiga i se tama’ita’i e laititi i lalo o le tulafono.

 

I le tali ioe ai o Auva’a i le moliaga e pei ona ta’usala ai o ia e le fa’amasinoga maualuga, i lalo o se maliliega sa latou sainia ma le malo ma ua talia fo’i e le fa’amasinoga, sa ia ta’utino ai e fa’apea, i le va o le aso 12 Fepuari e oo atu i le aso 1 Aperila o le tausaga na te’a nei, sa la faiaiga ai ma se tama’ita’i e talavou i lalo o le tulafono i Fagaitua ma Auto.

 

Na ta’utino le ali’i faiaoga e fa’apea, o lana gaioiga sa faia i lea aso sa le tusa lea ma ala o le tulafono, e leai fo’i se fa’atanaga fa’aletulafono na mafua ai ona ia fa’atinoina lenei solitulafono.

 

Ina ua talia e le fa’amasinoga maualuga le maliliega a Auva’a ma le malo, na talosaga ai loa le malo i le fa’amasinoga ina ia solofua loa moliaga mamafa e fa o loo totoe ai i le pepa o tagi sa latou fa’aulu fa’asaga ia Auva’a, lea e aofia ai moliaga pito sili ona mamafa e pei o le faiaiga ma se tamaitai e talavou i lalo o le tulafono, faia o uiga fa’asotoma, tagofia o itutinosa o se tama’ita’i e le’i fa’aipoipo i ai, atoa ai ma le moliaga o lona faia o gaioiga fa’afeusuaiga i se tamaitai e laititi i le tulafono.

 

O le moliaga o le faia o uiga mataga fa’afeusuaiga, o se solitulafono e mafai ona fa’asala ai Auva’a i le toese mo le umi e le silia i le 7 tausaga, poo le fa’asala fo’i i le salatupe e le silia i le $5,000, poo le fa’asala fo’i i fa’asalaga uma ia e lua.

 

MANU LEFATIA

 

O le aso 4 Setema lea ua toe tolopo i ai le isi iloiloga o le mataupu a Manu Lefatia, ina ua talia e le fa’amasinoga maualuga se talosaga sa faila e lana loia, mo se poloaiga a le faamasinoga e toe tolopo ai le iloiloina o lenei mataupu i le masina fou, ae maua ai le avanoa o le malo e fa’ailoa ai ni isi o ana fa’amaumauga e le o mafai ona fa’alauiloaina i le taimi nei, e aofia ai le fa’ailoa o igoa o ana molimau.

 

O le alii o Lefatia, e to’afa i ai ali’i o loo tuuaia e le malo i le mataupu lea na tafana ai e ni isi le Ofisa o Leoleo i Leone i le vaveao o le aso 1 Novema 2014, ma fa’aleagaina ai tioata o le ofisa ae leai se isi na a’afia ai.

 

Na taua e le ali’i loia ia Russel Smith o loo tulai mo le malo e fa’apea, ua sauni le malo e tuuina atu fa’amaumauga o loo talosagaina e le itu tete’e, pe a oo atu i le aso lea ua fa’atulaga e faia ai le isi iloiloga o lenei mataupu.

 

I le iloiloga sa faia i le vaiaso na te’a nei, na talosagaina ai e le loia a Lefatia ia Sharron Rancourt le faamasinoga ina ia faatonu le malo, e fa’ailoa atu a latou molimau o loo taua i le ripoti a leoleo, faapea ai faamaumauga fa’alilolilo o loo taua i a latou ripoti.

 

I le iloiloga sa faia i le masina o Iulai na te’a nei, na faailoa ai e Smith i le faamasinoga e faapea, o loo faatali pea le malo i se ripoti mai le vaega a le FBI sa latou galulue fa’atasi ma leoleo i le suesueina o lenei mataupu.

 

O loo taofia pea Lefatia i le toese i Tafuna e fa’atali ai le aso o lana iloiloga i le masina fou.