TOE TEENA SIAUMAU JR LE OFA A LE MALO

Ua toe teena fo’i e Siauau Siaumau Jr le ofa lona lua a le malo sa tu’uina atu ia te ia i le vaiaso na te’a nei, ina ua maua le avanoa e fesiligia ai o ia e le afioga i le alii fa’amasino sili ia Michael Kruse.

O ofa uma ia e lua a le malo sa tu’uina atu ia Siaumau Jr, e leai ma se ofa na tolaulauina i luma o le fa’amasinoga maualuga, se’i vagana ai lava le tu’uina atu o le tali tete’e a le ua molia i le taimi na fesiligia ai o ia e le fa’amasinoga.

O le tama’ita’i loia sili lagolago ia Mitzie Jessop Ta’ase sa tula’i mo le malo i le ilioloina o lenei mataupu, o ia fo’i lea sa ofoina atu le ofa ia Siaumau Jr ma lana loia fautua ia Michael White.

Ina ua fesiligia e le afioga i le ali’i fa’amasino silia lagolago ia Lyle L. Richmond ia Siauau Jr pe ua ia mauaina se kopi o le maliliega, na tali le ua molia, ua ia maua le kopi o le maliliega, na te le taliaina fo’i tuutuuga o le maliliega.

O Siaumau Jr o lo o tu’uaia e le malo i moliaga eseese e aofia ai le fasioti tagata i le tulaga muamua, faapea ai moliaga o le faaoolima i le tulaga muamua, taumafai e fasioti se tagata, atoa ai ma moliaga eseese i le fa’aaogaina fa’asolitulafono o se fana.

O ia tu’uaiga na afua mai i le fa’alavelave lea na tagatavaleina ai le ali’i leoleo su’esu’e Det. Lt. Lusila Brown i le nofoaga le tumau sa i ai le fale fa’amasino i le masina o Iulai 2010 i Fagatogo.

O lo o taofia pea Siaumau Jr i le toese i Tafuna e aunoa ma se tupe ua faatulaga e le fa’amasinoga e tatala ai o ia i tua.

TALIA FA’AMASINOGA TALI IOE A AUNEI MUAMUA

O le masina fou lea ua fa’atulaga e lau ai le fa’asalaga a le ali’i o Aunei Muamua i luma o le fa’amasinoga maualuga, ina ua talia e le fa’amasinoga lana tali ioe i le moliaga o le fa’aoolima i le tulaga lua, e mafua mai i le fa’alavelave lea na ia fa’aaoa ai se agaese e fa’ao’o ai manu’a i ni alii se to’alua i le masina o Iulai o le tausaga nei.

Na ulua’i tu’uaia e le malo ia Muamua i le moliaga mamafa o le fa’aoolima i le tulaga muamua, fa’apea ai ma le moliaga mama o le faaoolima i le tulaga tolu, ae i lalo o le maliliega sa sainia e le ua molia ma le malo, ua tali ioe ai Muamua i le moliaga lea ua toe teuteu e le malo, ina ia fa’ailoa ai le solitulafono o le faaoolima i le tulaga mamafa, ae solofua e le fa’amasioga le isi moliaga.

I le tali ioe ai o Muamua i le solitulafono lea ua toe teuteu e le malo, sa ia ta’utino ai i lona fa’aaoga o se agaese e fa’ao’o ai manu’a i se tama ma sona atali’i, e mafua mai ina ua fa’asea i ai le tama ma lona atali’i i le alu atu ma fa’a ee leotele le afi o lana ta’avale i luma o le latou fale i se taimi o le vaveao.

O lo o taofia pea Muamua i le toese i Tafuna e fa’atali ai le aso lea ua fa’atulaga e le fa’asalaga.

FA’ASALA MALIEO I LE FALEPUIPUI MOL E 60 ASO

E 60 aso lea ua fa’asala ai a le fa’amasinoga ia le alii o Malieo Maui i le falepuipui i Tafuna, ina ua fa’amaonia lona le usitaia o tuutuuga o lana nofovaavaaia sa tu’uina atu e le fa’amasinoga.

O se tasi o tuutuuga o le nofovaavaaia a Maui ina ua ta’usala o ia e le fa’amasinoga i le tausaga na te’a nei, o le fa’asa lea ona ia toe tagofia le ava malosi po o fualaau fa’asaina, peita’i i ripoti ua i luma o le fa’amasinoga o lo o taua ai le fa’amaonia o le tagofia e Maui o le ‘ava malosi faapea ai vaega o le laau fa’asaina o le mariuana.

E fa’alua ona tu’u avanoa le fa’amasinoga ia Maui ae foliga mai lava na te le o a’oa’oina se lesona taua i lona olaga, e pei ona fa’ailoa i ai e le ali’i fa’amasino i le aso na lau ai lana fa’asalaga.