FALEPUIPUI AH SUI MO LE 90 ASO

E 90 aso lea ua poloaina e le fa’amasinoga faaitumalo le alii talavou o Taligalu Ah Sui e taofia ai o ia i le toese i Tafuna, ina ua ta’usala o ia i le solitulafono o le fa’atupu vevesi i nofoaga faitele i le vaiaso na te’a nei.

O lea faasalaga o le a aofia ai ma aso e 42 lea ua maea ona ia tuliina, talu ona taofia o ia i le falepuipui ona o lenei mataupu.

O le solitulafono ua ta’usala ai Taligalu na afua mai i se faalavelave na tulai mai i lona nuu i Vaitogi, i lona aveese mai lea o penisini ma tane penisini o taavale a tagata ae sogisogi ai. Na faailoa e le alii faamasino ia John L. Ward II i le ua molia, afai e faaauau pea ona ia faia lea amio o le sogisogi penisini, e le gata e leaga ai lona ulu ae tele fo’i se a’afiaga o lona soifua maloloina e tula’i mai ai.

Na faatoese le ua molia e tusa ai o lana solitulafono sa fai, ma ia talosagaina ai le faamasinoga mo se isi avanoa mo ia, se’i toe fo’i atu ai i lona aiga e tausi lona tina, peitai na faailoa e le alii faamasino ia Taligalu e faapea, ua faailoa e lona tina i le malo lona le toe mana’o e tatala atu o ia i lona aiga ae lelei pe a saili se isi nofoaga e alu e nofo ai.

O le aso 24 Iulai lea ua faamoemoe e maea ai le tuliina o aso e 90 lea ua loka ai Taligalu, ma ua faatulaga ai loa e le faamasinoga le aso 23 e toe valaau ai lana mataupu, ina ia iloa tonu e le faamasinoga poo fea lea o le a alu le ua molia e nofo ai pe a tatala i tua o ia.

A’o nofovaavaaia ai le ua molia mo le 24 masina, ua fautuaina o ia e le faamasinoga ina ia toe fo’i e faauma lana aoga, aua ne’i ona toe soliina se tulafono, aua fo’i nei toe faia lana amio o le sogisogi i penisini o taavale a tagata ina ne’i leaga ai lona ulu.

Ua faatonuina foi e le faamasinoga loia ina ia saili ni polokalama mo ni aoaoga faa faufautua e aoga ai Taligalu a’o tuli ai lana faasalaga i le taimi nei, ina ia mafai ai ona maua se isi fesoasoani mo ia.

LAPATAIA TAGATA MOLIA INA IA USITA’I I POLOAIGA A LE FAAMASINOGA

O le toe taofia faapagota ai e le fa’amasinoga faaitumalo o ni tagata se to’atolu i le taeao o le aso Tofi o le vaiaso na te’a nei, ona o le le usita’i i poloaiga a le faamasinoga, na toe fautuaina ai e le alii faamasino ia John L. Ward II i latou nei e to’atolu faapea ai ma le toatele o tagata o lo o molia i solitulafono eseese sa i ai i totonu o le potu faamasino, ina ia usita’i i soo se poloaiga e tuuina atu e le faamasinoga ia i latou, ma taofia ai le toe tuuina atu e le faamasinoga o se poloaiga e toe pu’e faapagota ai i latou.

O i latou e to’atolu na taofia faapagota ma toe tatala ai lava i tua i le aso Tofi na te’a nei e aofia ai Hilary Tuaato; Tufi Misipeka ma Paulo Tupua, ina ua faalua ona valaau a latou mataupu i luma  o le faamasinoga faaitumalo ae le’i oo atu, peitai o tuutuuga o lo o tatala ai i latou i tua mai le toese, e le gata ia fesoota’i vavalalata ma a latou loia, a ia auai fo’i i soo se taimi e valaau ai a latou mataupu i luma o le faamasinoga.

E ta’i $500 na poloaina e le faamasinoga i tusi saisai sa tuuina atu e totogi ona faatoa mafai lea ona tatala i latou nei i tua mai le toese, ae ina ua maea ona toe fautuaina i latou e le alii faamasino i le vaiaso na te’a nei, na toe faaleaoga ai loa e le faamasinoga lana poloaiga ina ia taofia i latou nei i le toese, ae ua toe tatala i latou i tua e faatali ai le toe valaauina o a latou matauu i le aso Tofi o le vaiaso nei.

TETE’E TURITURI JR OPELU TUUAIGA MALO

O le ali’i lea o lo o tu’uaia i lona susunuina o le fale faigaluega e galue ai lona to’alua, ua ia teena moliaga mamafa a le malo faasaga ia te ia ina ua tulai i luma o le faamasinoga maualuga i le vaiaso na te’a nei.

O moliaga e tolu ua tuuaia ai le ua molia e aofia ai le susunu fale i le tulaga tolu ma le faaleaga meatotino i le tulaga muamua, solitulafono mamafa o le vaega D, lea e mafai ona faasala ai se tasi i le toese mo le umi e le silia i le 5 tausaga, ma le moliaga o le talepe fale i le tulaga muamua, o se solitulafono mamafa o le vaega B, lea e mafai ona faasala ai se tasi i le toese amata atu i le 5 e oo i le 15 tausaga le umi.

O moliaga faasaga ia Turituri Jr. Opelu na afua mai i le faalavelave lea na sasao ai se mu i le Warehouse a le kamupani i’a o le StarKist i Tafuna, i le vaveao o le aso 1 Iuni pe tusa o le itula e 1:20 i le vaveao.

A’o le’i tula’i mai le mu, sa vaaia e leoleo le ua molia o lo o tu tu ai i luma o le pa o le lotoa ma ula lana sikaleti, ae ina ua tula’i mai le mu i le vaveao lea, na alu ai le toalua o le ua molia ma faailoa i leoleo e faapea, sa telefoni atu le ua molia ia te ia ma faailoa atu ia te ia, ua uma ona ia susunuina le latou fale faiglauega.

E $50,000 lea ua faatulaga e le faamasinoga e totogi ona faatoa mafai lea ona tatala Opelu i tua mai le toese i Tafuna.