MOLIA SE ALI’I TALAVOU I LE TALEPE FALE MA LE GAOI

O le vaiaso nei na faila ai e le malo moliaga mamafa o le talepe fale ma le gaoi faasaga i se ali’i talavou e 17 tausaga le matua mai Iliili, e afua mai i lona osofaia o se faleoloa atoa ai ma le fale o se aiga i Iliili ae gaoia ni meatotino sa i totonu.

Ona o le talavou o lenei alii ua le mafai ai e le Samoa News ona lomia lona suafa.

Ae i faamaumauga a le faamasinoga o lo o taua ai e faapea, i le po o le aso 12 o Aperila 2013 na valaau ai se aiga Iliili i le ofisa o leoleo i Tafuna ona o le latou fale ua osofaia e se tagata.  O le vaveao o le aso 13 o Aperila 2013, a’o faia su’esu’ega a leoleo na toe maua ai seisi valaau mai i se faleoloa i Iliili lava, ona ua osofaia foi e se tagata.

Na mafai ona pu’eina i le masini pu’e ata a le faleoloa ia le tagata na faia lenei tulaga, lea na oso mai i le faitoto’a pito i tua o le faleoloa ma gaoia meaai, pepa sikaleti ma se pusa pia.

Ina ua fesiligia e leoleo le ali’i ua molia sa ia faamaonia ai lona talepeina o le faleoloa ae gaoi meaai, sikaleti ma se pusa pia ma vaevae ma ia ma ana uo.

Ina ua fesiligia lenei alii pe na te iloa se faamatalaga e faatatau i le fale o le aiga lea na osofaia e le tagata, na tautino foi le ua molia i leoleo, o ia na osofaia lea fale e le mamao ese atu ma le faleoloa peitai na te le’i mauaina i se tupe i totonu o le fale, se’i vagana ai le faamalama o le fale na leaga ina ua ia talepeina.

O lo o taofia pea i le falepuipu o Tamaiti i Tafuna le alii ua molia e faatali ai taualumaga o lana mataupu i luma o le faamasinoga.

FAILA MOLIAGA MAMAFA FAASAGA IA TALIGALU AH SIU

O le vaiaso nei na faila ai e le malo moliaga mamafa faasaga ia Taligalu Ah Siu, ona o ni faalavelave eseese se lua na tulai mai i le masina o Fepuari ma Aperila ua tuana’i atu, lea o lo o tuuaia ai o ia i lona osofaia o ia fale.

O le faalavelave na tulai mai i le aso 13 Fepuari 2013 o lo o tuuaia ai e le malo le ua molia i le moliaga o le talepe fale i le tulaga lua ma le moliaga mama o le gaoi, ae o le faalavelave na tulai mai i le aso 23 Aperila 2013, o lo o tuuaia ai le ua molia i le moliaga mamafa e tasi o lona taumafai lea e talepe se fale o se aiga.

O le taeao nei lea ua faamoemoe e tula’i ai Taligalu i luma o le faamasinoga maualuga mo le faaauauina ai o lana mataupu, ma o lo o taofia pea o ia i le toese sei vagana ua totogi le $10,000 ona faatoa mafai lea ona tatala o ia i tua.

MOLIA FA’ASEGA MOANANU I LE FA’AO’OLIMA

Ua molia nei e le malo se tama mai Pago Pago i le faatupu vevesi i nofoaga faitele, ona o le faalavelave lea o lo o tuuaia ai i oa i lona faaoolima lea i se tamaititi e ala i lona faaaoga o se paipa e sasa ai lona ulu ma manu’a ai.

O le taeao ananafi na tulai ai i luma o le faamasinoga faaitumalo le susuga Faasega Moananu mo lana ulua’i iloiloga, lea na ia teena ai tuuaiga faasaga ia te ia.

I faamaumauga a le malo o lo o taua ai e faapea, o le vevesi na tulai mai i le afiafi o le aso Lulu na te’a nei, ina ua fasi e le alii ua manu’a le atali’i a le ua molia, ma tula’i mai ai loa le fa’alavelave e pei ona ia faaoolima ai i le tamaititi na aafia.

Na taua e le loia a le malo e faapea, o lo o faamoemoe e faila moliaga faaopoopo faasaga ia Moananu, peita’i e fuafua lava le mamafa o moliaga i se ripoti mai le falema’i e tusa ai o le matuia o le manu’a sa aafia ai le tamaititi na lavea.