TAPENI PIO

O le ali’i lea o lo o tu’uaia i lona faiaiga i se teineititi ma i’u ina ma’itaga ai, ua tofu atu nei lana mataupu i luma o le Fa’amasinoga Maualuga, ma ua faamoemoe o le taeao nei e tula’i ai mo le tuuina atu o lana tali e tusa ai o tu’uaiga faasaga ia te ia.

O ananafi na faatulaga e faia ai le ulua’i iloiloga a Tapeni Pio i luma o le fa’amasinoga faaitumalo, ae talu ai e le’i finagalo Pio e faataunuu lana ulua’i iloiloga, ua tofu atu ai loa lana mataupu i luma o le faamasinoga maualuga.

O lo o tuuaia Pio i moliaga mamafa e fa e aofia ai le faiaiga ma se teineititi e laititi i lalo o le tulafono, faia o amioaga faasotoma, ma moliaga e lua o le faaoolima mataga.

O le masina o Mati 2013 na tofu atu ai i le Ofisa o leoleo lenei mataupu ina ua logo e se sui o le Ofisa o Tautua Lautele le Ofisa o leoleo, faasaga i se teineititi e 15 tausaga le matua ua ma’itaga.

Na taua e le teineititi na aafia i leoleo e faapea, o le masina o Iuni 2012 na la momoe ai ma Pio ma i’u ina ma’itaga ai o ia, ae ina ua fesiligia Pio sa ia faamaonia ai se la mafutaga ma le teineititi ua aafia e aofia ai taimi e lua na la momoe ai i lona aiga i Fagali’i.

E $25,000 le tupe lea ua faatonu e le faamasinoga e totogi ona faatoa mafai lea ona tatala Pio i tua mai le toese i Tafuna.

MOLIA NI ALI’I TALAVOU SE TOATOLU TAGOFIA AVA MALOSI

E to’atolu ni ali’i talavou na taofia e leoleo i le faaiuga o le vaiaso na te’a nei ina ua maua atu o lo o inupia i Nuuuli, ma o le taeao ananafi na tutula’i ai i latou i luma o le faamasinoga faaitumalo ma o latou teena ai moliaga o le tagofia o le ava malosi ae le’i atoa le ta’i 21 tausaga le matutua.

O le toalua o i latou nei e ta’i 17 tausaga le matutua ae o le isi to’atasi ua atoa lona 18 tausaga, ma o lo o nofovaavaaia uma i latou i luma o le faamasinoga faaitumalo, ona o ni solitulafono sa tuuaia ai i latou e le malo i le tausaga na te’a nei na faamaonia e le faamasinoga.

I faamaumauga a le faamasinoga o lo o taua ai e faapea, na taofia e leoleo i latou nei ina ua masalomia sa latou talepe ma gaoi se taavale i Nuuuli, ae ina ua suesue e leoleo i latou, na maua ai o lo o onana i latou ma taofia ai loa i latou i le toese ae molia i le inu pia ae le’i atoa le 21 tausaga le matutua.

Ua toe tatala i tua i latou mai le toese e faatali ai le isi a latou iloiloga lea ua faatulaga i le aso Tofi o le vaiaso nei, e faatali ai se ripoti mai le Ofisa nofovaavaaia faasaga i ali’i e toatolu nei.

O le tausaga na te’a nei na molia ai i latou nei i le talepe fale ma le gaoi, ona o le faalavelave lea na o latou osofaia ai ma ni ali’i matutua se to’alua se faleoloa i Tafuna ma Nuuuli ae gaoi oloa mai totonu e pei o fagu uaina, tupe, ma le anoanoa’i o taumafa.

FA’AI’U I LE FALEPUIPUI FUSUAGA NA AMATA MAI I LE FALE BINGO

O tina talavou se to’alua na fufusu i le faaiuga o le vaiaso na te’a nei i tafatafa o le fale sa faia ai se Bingo i Tafuna, na faai’u i le toese i Tafuna si a la mataupu ma tutula’i ai i luma o le Fa’amasinoga Faaitumalo i le taeao ananafi, ona o tu’uaiga o le fa’atupu vevesi.

Na tau fai teena uma e Ailene Patu ma Tapu Apelu tu’uaiga o le faatupu vevesi i nofoaga faitele ua tuuaia ai i laua ma ua tatala nei i laua i tua e faatali ai le aso 30 o Iulai lea ua faatulaga e toe valaau ai le la mataupu.

I faamaumauga a le faamasinoga o lo o taua ai e faapea, o le vevesi na amata mai i ni su’egatala a ni isi o tupulaga teine ma faaiu i le aafia atu ai o le igoa o Patu. Na taumafai ni isi o tama’ita’i e fesiligia Patu pe moni o ia le isi o lo o aafia i le au faitatala, ae na avea ma itu fai ai e Patu ni faamatalaga i tama’ita’i na o atu ia te ia, ma o ai loa tama’ita’i talavou nei ta’u ia Apelu tala a Patu, ma alu atu ai loa Apelu ua fufusu ma Patu.

Ua poloaina nei tamaitai e le faamasinoga ina ia tausi le filemu ma aua ne’i o toe taumafai le isi e faafesoota’i le isi a’o faagasolo ai taualumaga o le la mataupu.

Ua faasa fo’i i laua ona toe latalata i tafatafa o le fale o lo o faia ai le taaloga Bingo, se’i vagana ua toe tuu atu se isi poloaiga a le faamasinoga.

ALEX PINATI

O le toe molia ai o le ali’i o Alex Pinati i le solitulafono mama o le ave ta’avale ‘ona, ua manino mai ai i faamaumauga a le faamasinoga, o le faatolu ai lea ona molia o ia i lenei solitulafono.

O le vaiaso na te’a nei na taofi ai e leoleo le taavale na faafoe e Pinati ina ua alu saoasaoa i se vaega o Tafuna, ae maua ai o lo o ‘ona o ia ma faafoe le taavale.

Ua toe tatala i tua le ua molia e faatali ai le aso lea ua faatulaga e toe fofogaina ai lana mataupu, ae tusa ai ma faamaumauga a le faamasinoga, ua faalua ona faamaonia e le faamasinoga le moliaga o le ave taavale ‘ona faasaga i le ua molia, ua faalua fo’i ona se’i lona laisene.

I lalo o le tulafono e pei ona taua e le loia a le malo, soo se tasi e ta’usala i le moliaga o le ave taavale ‘ona mo le taimi muamua, e 6 masina e se’i ai lona laisene, afai ae ta’usala faalua, e 2 tausaga e se’i ai le laisene, ae a faatolu, ona se’i loa lea o le laisene mo le olaga atoa e le toe faagataina ona toe ave ta’avale i le teritori.