BRENDONN VAIULA

O le alii talavou lea o lo o tuuaia i lona ave faagaoi o ni siaki se lua mai totonu o se Ofisa ae tala i se faleoloa i Leloaloa, ua molia nei e le malo i moliaga mamafa e lua o le gaoi atoa ai ma lona faia o faamaumauga tau faasese.

Na teena e le alii o Brendonn Vaiula moliaga faasaga ia te ia ina ua tula’i i luma o le faamasinoga maualuga i le amataga o le vaiaso nei, ma faatulaga ai loa lana ulua’i iloiloga e faia lea i le aso 31 Ianuari 2014.

O le mataupu lenei na tofu atu i le Ofisa o Leoleo i Fagatogo i le aso 11 Aperila 2013, ina ua logo e le susuga Fred Scanlan le ofisa o leoleo mo se fesoasoani, ina ua ia iloa ua gaoi e le tagata ana siaki e lua sa i totonu o lona ofisa e aunoa ma se faatanaga.

Na taua e Scanlan i leoleo e faapea, e lua ana siaki sa maua mai i le malo i le aso 10 Aperila 2013 mo ana ‘per diem’, ona ia tuu lea o ana siaki ia e lua i totonu o le pusa toso o lana kesi i totonu o lona Ofisa, ae pe tusa o le itula e 4:00 o le aso lava lea, na toe alu atu ai Scanlan i lona ofisa ma ia iloa ai ua ave e le tagata ana siaki.

Na taua e Scanlan e faapea, sa taamilo solo e siaki ni isi o faleoloa i le atunuu pe sa tala ai e le ua molia ana siaki, ae ina ua oo atu i le faleoloa o le T.I Inc Store i Leloaloa, sa faaali atu e le pule o le faleoloa ia te ia le ata sa pu’e i le masini pu’e ata a le faleoloa, o lo o maua ai le ata o Vaiula i le taimi na alu atu ai e tala le siaki.

E $1,234.54 le aofa’i o le tupe sa tala e Vaiula mai siaki na ia ave i le faleoloa.

Na ave e le ua molia le laisene ave taavale a Scanlan i le faatauoloa ina ia mafai ai ona ia talaina le siaki.

Ina ua fesiligia e leoleo, sa ioeina ai e Vaiula lona gaoiina mai o le siaki mai totonu o le kesi o le ofisa a le ua molia, ona alu lea ua tala i se faleoloa i Leloaloa ae faatau mai ai meaai.

Na taua e le ua molia i leoleo e faapea, e leai se faatanaga sa tuuina atu ia te ia e mafai ai ona ia tala le siaki ma faaaoga le laisene ave taavale a Scanlan e tala ai le siaki.

E $10,000 le vaega tupe na ulua’i faatulaga e le faamasinoga e totogi ona faatoa mafai lea ona tatala Vaiula i tua mai le toese, peitai ua faaitiitia e le faamasinoga i le $7,500, ma o lo o taofia pea le ua molia i le toese i Tafuna, sei vagana ua totogi le tupe lea ona faatoa mafai lea ona tatala o ia i tua.

JASON TANIELU

O le amataga o le vaiaso nei na faila ai e le malo le moliaga mamafa o le ave taavale ao se’i le laisene faasaga ia Jason Tanielu, ina ua maua e leoleo o ia o lo o ia faafoeina se taavale i se vaega o Iliili i le lua vaiaso talu ai a’o se’i e le faamasinoga lona laisene.

O le itu e laki ai, e le i ‘ona Tanielu i le taimi na maua ai o ia e leoleo, sei vagana ai le alu saoasaoa o lana taavale atoa ai ma lona le usitaia o faailoilo i luga o le auala.

Ina ua ta’usala e le faamasinoga faaitumalo ia Tanielu i le masina o Setema na te’a nei i le moliaga o le ave taavale ‘ona, e le gata sa se’i lana laisene ave taavale mo le 6 masina, ae sa fautuaina fo’i o ia e aua nei ona toe aveina se taavale i totonu o le 6 masina lea o le a sei ai lana laisene.

O lo o tatala pea i tua Tanielu i lalo o poloaiga a le faamasinoga e faatali ai le aso lea ua faatulaga e toe valaau ai lana mataupu.

O le moliaga o le ave taavale a’o se’i le laisene, e mafai ona faasala ai se tasi i le toese mo le umi e le silia i le 5 tausaga, pe faasala foi i le salatupe e le silia ma le $5,000, ae faamalosia ai le taofia i le falepuipui mo le umi e 90 aso.