JOSEPH IAKOPO

O le ali’i lea o lo o tu’uaia i moliaga eseese o le gaoi ma le talepe fale, ua ia sauni e talia le ofa a le malo ua tuuina atu ia te ia, e pei ona faailoa e lana loia fautua i luma o le faamasinoga maualuga i le taeao ananafi.

O Joseph Iakopo o lo o tuuaia i lona osofa’i ma gaoi faleoloa e 8 ma fale nofo o aiga e 5 e pei ona taua i faamaumauga a le faamasinoga.

O ananafi na toe valaau ai e le faamasinoga maualuga le mataupu a Iakopo, mo le faamanatuina o le aso e faia ai lana faamasinoga autu i luma o tagatanuu o Amerika Samoa, peitai na fa’aalia e lana loia fautua ia Douglas Fiaui e faapea, o lo o latou galulue pea ma le malo mo le faamautuina o se maliliega ma Iakopo ma fa’ai’u ai loa lenei mataupu.

O le aso 16 Setema 2014 ua faatulaga e faia ai le faamasinoga autu a Iakopo i luma o tagatanuu o Amerika Samoa, ae afai e mautu le maliliega lea o lo o latou galulue ai ma le malo, ona fofogaina loa lea o lea maliliega i le masina fou.

I totonu o le ulua’i fa masina o le tausaga na te’a nei, na osofaia ai e Iakopo faleoloa e 8, ma e tusa ma le $50,000 le tau aofa’i o mea sa faaleagaina atoa ai ma oloa na ave faagaoi, ae mo fale na osofaia ma faaleagaina, sa aofia ai ma le maota o se Faafeagaiga, lea na ia gaoia mai ai le tinoitupe e $5,000.

O lo o taofia pea Iakopo i le toese i Tafuna e fa’atali ai le aso e toe tula’i ai i luma o le faamasinoga mo le isi ana iloiloga.

APELU FETAUI

O le alii e 23 tausaga le matua mai Tafuna lea na ta’usala i lona taumafai e ave faagaoi ni fagupia se lua mai totonu o se faleoloa e aunoa ma le totogiina, ua faanofovaavaaia e le Faamasinoga Faaitumalo mo le 12 masina i lalo o poloaiga a le faamasinoga e ao ona usita’i i ai.

O ni isi o ia poloaiga ua tuuina atu mo le alii o Apelu Fetaui e aofia ai le faasa ona toe ulufale i totonu o le faleoloa na tula’i mai ai le solitulafono, faasa ona ia toe tagofia le ‘ava malosi i totonu o le 12 masina, ma ua faasa fo’i ona ia toe soliina se tulafono a le malo.

Na faatoese Fetaui i luma o le faamasinoga i le vaiaso na te’a nei e tusa ai o lana solitulafono sa fai, ma ia talosagaina ai se isi avanoa mo ia se’i fa’aauau ai pea ona tatala i tua e tausi ona matua.

Na talia e le faamasinoga talosaga ma fautuaga a loia, ma poloaina ai loa Fetaui na te totogi le salatupe e $100, o se tasi lea tuutuuga o lana nofovaavaaia e 12 masina.

LEGA SEFO

O le ali’i lea na ia fa’aaoga se naifi fa’amoe e tui ai le tauau o se isi ali’i i Malaeimi i le tausaga na te’a nei, ua fa’amoemoe o le itula e 9:00 i le taeao nei lea ua faatulaga e lau ai lana faasalaga i luma o le Fa’amasinoga Maualuga, ina ua ta’usala o ia i le solitulafono mamafa o le fa’aoolima i le tulaga lua.

O le vevesi na tula’i mai ina ua ‘ona le ua molia, ma ia tuiina ai le tauau o le ali’i na aafia i se naifi fa’amoe, ae ina ua fesiligia e leoleo le ali’i na aafia, sa ia taua ai e faapea, e fa’atolu ona tui e Lega Sefo lona tauau i le naifi ma manu’a ai.

Ina ua fesiligia e le alii faamasino sili lagolaog ia Lyle L. Richmond le ua molia pe faamaonia sa ia faaaoga se naifi faamoe e tui ai le na aafia, na tali le ua molia ‘ioe’.

O lo o taofia pea Sefo i le toese i Tafuna e fa’atali ai le lauina o lona faasalaga.

TAGATA FAIGALUEGA TO’ALUA

O ni ali’i se to’alua e faigaluega i le malo lea na taofia i le toese i Tafuna mo le 48 itula i le lua vaiaso talu ai, ina ua masalomia lo la umia faasolitulafono o vaega o le pauta faasaina o le ‘aisa’, e le gata ua leai ni moliaga mamafa ua faila e le malo fa’asaga ia te i laua, ae ua fa’amalolo i laua mo se taimi le tumau, a’o galulue ai le Ofisa a le malo o lo o galulue ai i laua mo le suesueina atili o tulafono e uiga i lenei mataupu.

Na faamaonia mai e le Faatonusili o le Matagaluega o Galuega Lautele a le malo ia Faleosina Voigt i le Samoa News i le vaiaso na te’a nei e fa’apea, ua fa’amalolo i laua nei e faatali ai sailiiliga a le Matagaluega i vaega o Tulafono ma Ta’iala i tulaga o tagata faigaluega, e ono faavae ai se faaiuga mautu faasaga ia i laua nei.

E talitonu le Samoa News, o le Ofisa o le Loia Sili na faia le faaiuga o le a leai ni moliaga e ono faila faasaga ia i laua nei, ina ua maea ona iloilo ripoti a leoloeo ma manatu ai loa, e ono leai se mafuaaga tatau na ala ai ona taofia e leoleo le ta’avale a le malo lea sa malaga ai i laua nei ma tula’i mai ai loa le mataupu e pei ona i ai le faaiuga ua faia faasaga i alii e toalua na aafia.

Na taua e se sui o le Vaega o lo o taulimaina mataupu tau i fualaau faasaina i le Ofisa o Leoleo e faapea, o se fa’amatalaga na maua e le latou Vaega, e masalomia ai le umia e i laua nei o vaega o le pauta faasaina o le ‘aisa’, na mafua ai loa ona taofia le taavale a le malo na malaga ai i laua nei, ma tuuaia le maua i ai o se taga pepa iila se tasi o lo o i ai vaega o le pauta o le aisa i totonu o le taavale.