BRENDON VAIULA

O le ali’i 22 tausaga mai Aua lea na tuuaia i lona gaoia o se siaki mai luga o le laulau a se tagata faigaluega i le ofisa o leoleo, ua ia ta’utino i le faamasinoga e faamaonia tuuaiga faasaga ia te ia.

O Brendon Vaiula na ulua’i tuuaia e le malo i moliaga mamafa e lua - o le faia o ni faamaumauga tau faasese atoa ma le gaoi. Ae i lalo o se maliliega na sainia e le ua molia ma ua talia fo’i e le faamasinoga maualuga, ua ia tali ioe ai i le moliaga o le gaoi ae solofua e le faamasinoga le isi moliaga.

I le tali ioe ai o Vaiula i le moliaga e pei ona ta’usala ai o ia, sa ia tautino ai e faapea, i se taimi o le aso 11 Aperila 2013 i Amerika Samoa, sa ia gaoia mai ai se siaki mai luga o le laulau a le ali’i o Fred Scanlan, faatasi ai ma lana laisene ave taavale e aunoa ma se faatanaga.

Ina ua ia maua lea siaki, sa alu loa i se faleoloa i Leloaloa ua ave i ai le siaki faatasi ai ma le laisene ave ta’avale a Scanlan, mo le faamoemoe e tala ai le siaki, i le aofaiga o le tupe e $1,324.54. Na ta’utino fo’i Vaiula sa ia sainia fo’i le igoa o le alii leoleo ina ia mafai ai ona tala le siaki.

Na fesili le alii faamasino sili ia Michael Kruse ia Vaiula pe na faapefea ona ia faaaoga le laisene ave taavale a Scanlan e tala ai le siaki, ae ese foliga o lo o i luga o le laisene ave taavale ma foliga o ia na alu atu e tala le siaki, ae na tali le ua molia, ina ua uma ona ia faaali le laisene a Scanlan i le faatauoloa, sa mafai ai loa ona ia talaina le siaki.

Na faailoa e le loia a Vaiula ia Karen Shelly i le faamasinoga e faapea, e tusa ma le $600 le tupe na toe maua e leoleo mai le ua molia, sei vagana ai le silia i le $700 sa ia faaaoga, lona uiga, o le tupe fo’i lea e tatau ona poloai e le faamasinoga le ua molia na te toe totogi ia Scanlan.

Peitai na faailoa e Kruse ia Shelly e faapea, e le o Scanlan o lo o aafia i le mataupu lenei, ae o le faleoloa lea na tala ai e le ua molia le siaki.

O lo o taofia pea Vaiula i le toese e faatali ai le aso 28 Mati e lau ai lona faasalaga.

VALLEN MATUAUTO

E 6 masina lea ua faasala ai e le faamasinoga maualuga le alii o Vallen Matuauto e taofia ai i le toese i Tafuna ina ua ta’usala o ia e le faamasinoga i le moliaga mamafa o le talepe fale i le tulaga lua, atoa ai ma le moliaga mama o le gaoi.

O moliaga e lua ua ta’usala ai Matuauto, na afua mai i le faalavelave lea na tupu i le va o le aso 4-5 Ianuari 2012 i Satala, ina ua latou osofaia ma ni ali’i se to’alua se faleoloa o lo o i ai ae gaoi le anoanoa’i o oloa mai totonu.

Saunoa le alii faamasino sili ia Michael Kruse e faapea, na avea le leai o ni mea aoga ma le taua na faia e Matuauto ma ana uo ia e to’alua i le po na tupu mai ai le faalavelave, ma itu na latou o atu ai loa ma talepe faleoloa ae gaoi oloa.

E tusa ai ma faamaumauga a le faamasinoga, o Matuauto sa tu i fafo e vaai ni tagata e o atu ae o ana uo e to’alua sa o e talepe le fale ma gaoi mai oloa, ma, ina ua fo’i mai ali’i e to’alua ma oloa mai totonu o le faleoloa, ona latou vaevae lea o oloa mo i latou.

E 7 tausaga i le falepuipui ma le salatupe e $1,000 na manatu le faamasinoga e faasala ai le ua molia, peitai o le a faamalumalu le tuliina o le faasalaga faafalepuipui mo le 7 tausaga, ae o le a nofovaavaaia ai le ua molia i lalo o poloaiga a le faamasinoga.

O ni isi o ia poloaiga e aofia ai lona tuliina o masina e 20 i le toese e aunoa ma le tatalaina o ia i tua, peitai, ua manatu le faamasinoga ua lava masina e 6 e taofia mo’i ai Matuauto i le toese, ae o le umi o le a totoe ai o le a faamalumalu lona tuliina, fuafua lea i lona usitaia o poloaiga a le faamasinoga o le a tuuina atu ia te ia.

O ia poloaiga e aofia ai le alu e saili sana galuega tumau pe lesitala fo’i lona igoa i le Kolisi Tuufaatasi i lalo o le polokalame o le GED, e saili ai lana Tipiloma o le Vasega 12 lea e le i mae’a.

Ua poloaina e le faamasinoga ia Matuauto, ua faasa ona ia toe tagofia le ava malosi poo fualaau faasaina, ua faasa fo’i ona latou toe faatasitasi ma ana uo e to’alua ia sa latou osofaia le faleoloa i Satala, a ia auai i ni aoaoga e fesoasoani ai i aafiaga o le ava malosi.

“O le taimi lava e te toe ‘ona ai pe ete le usita’i fo’i i se poloaiga ua tuuina atu ia te ia, o le a taofia loa oe i le toese i Tafuna mo le 7 tausaga,” o le faatonuga lea a Kruse ia Matuauto.