FA’AMOE SIOKA

O le ali’i talavou lea na ta’usala e le fa’amasinoga maualuga i moliaga mama e lua o lona taliaina lea o ni oloa sa ave faagaoi e se isi tagata, faapea ai ma lona tagofia o le ‘ava malosi ae le i atoa lona 21 tausaga, ua poloaina e le fa’amasinoga na te totogi le salatupe e $500, o se tasi lea o tuutuuga o lana nofovaavaaia e 2 tausaga.

Na fa’atoese le ali’i o Fa’amoe Sioka i luma o le faamasinoga i le taeao ananafi, e tusa ai o lana solitulafono sa faia, ma ia talosagaina ai se isi avanoa mo ia e toe fa’aleleia ai lona olaga ma saili ai se isi lumana’i manuia mo ia.

Na tutu faatasi loia e talosaga i le faamasinoga ina ia faanofovaavaaia Sioka, ae avea le umi lea ua maea ona ia tuliina i le toese i Tafuna e fai ma ana faasalaga i lenei mataupu.

O Sioka na tausala e le faamasinoga i le faalavelave lea na la osofaia ai ma le isi alii se pasi la’u pasese sa paka i luma o le fale o se aiga, e ala i le talepe o le fa’amalama ae gaoi sipika ma se laau pese sa i totonu.

E tasi le tausaga ma le 6 masina na manatu le faamasinoga e faasala ai Sioka i le toese i Tafuna, peitai o le a faamalumalu lona tuliina o lea faasalaga, ae o le a nofovaavaaia o ia mo le 2 tausaga i lalo o poloaiga a le fa’amasinoga.

O ni isi o ia poloaiga e aofia ai lona totogiina o le salatupe e $500 i totonu o le 6 masina o lana nofovaavaaia, aua nei ona toe tagofia le ava malosi, ma ia faatino galuega mo le atunuu i le umi e 40 itula, i lalo o le taitaiga a le Ofisa Nofovaavaaia.

Ua fautuaina fo’i o ia ina ia auai i ni aoaoga e faatatau i aafiaga o le ava malosi, ina ia mafai ai ona fesoasoani i le fa’afitauli o le ava malosi o lo o a’afia ai o ia.

SAMUELU SAE

O le ali’i lea ua mae’a ona ta’usala e le fa’amasinoga i le moliaga o le taumafai e ave faagaoi mea totino a isi tagata, ua toe tolopo le lauina o lona faasalaga i le aso Faraile o le vaiaso fou, ina ia maua ai le avanoa e toe talanoa ai ma lana loia e tusa ai o lana tali tete’e sa tuuina atu i le sui o le Ofisa Nofovaavaaia.

O le masina na te’a nei na tali ioe ai Samuelu Sae i le moliaga o le taumafai e ave faagaoi ni meatotino a se isi tagata, ae ina ua fesiligia o ia e se sui o le Ofisa Nofovaavaaia e tusa ai o le mea sa tupu, sa fa’ailoa i ai e Sae, na te le i fa’atinoina le solitulafono e pei ona ta’usala ai o ia e le fa’amasinoga.

Na fa’ailoa e le ali’i fa’amasino sili lagolago ia Lyle L. Richmond ia Sae ananafi e faapea, o le a toe tolopo lana mataupu mo le isi vaiaso, ina ia maua ai le avanoa la te toe talanoa ai ma lana loia e tusa ai o lana faamatalaga sa tuuina atu i le sui o le Ofisa Nofovaavaaia, ae afai o lona talitonuga e leai sana gaioiga sa faia i lenei mataupu, e i ai le avanoa e mafai ai ona tuuina atu lana mataupu e fa’ataunuu sona faamasinoga autu.

SIAUMAU SIAUMAU JR

O le aso 4 Aperila 2014 lea ua toe tolopo i ai le isi iloiloga mo le mataupu a le susuga a Siaumau Siaumau Jr, ma le faamoemoe e tatau ona oo atu i le aso lea ua manino tonu se isi tulaga e taoto ai lenei mataupu.

Na taua e le alii loia ia Michael White o lo o tula’i mo le ua molia e fa’apea, o le aso 4 Aperila lea ua fa’amoemoe e tatau ona oo atu i ai, ua iloa tonu po o a talosaga (motion) o lo o i luma o le fa’amasinoga e tatau ona iloilo faasaga i lenei mataupu.

Na taua e White e fa’apea, e i ai lava ana talosaga o lo o fuafua e faaulu faasaga i lenei mataupu, ae o isi mau talosaga ua mae’a ona faaulu e isi loia sa tula’i muamua mo Siaumau Jr, e i ai lona manatu na te le talanoaina.

O Siaumau Jr o lo o tuuaia i le fa’alavelave lea na maliu ai le ali’i leoleo suesue ia Det. Lt. Lusila Brown i le 2010.