FELIUA’I LIU

E 25 tausaga o se ali’i ua tu’uaia nei e le malo i ni moliaga mamafa se tolu, ona o le mataupu e uiga i le la mafutaga ma se tama’ita’i e laititi i lalo o le tulafono, lea na i’u ina la faiaiga ai i le amataga o le tausaga nei.

O moliaga fa’asaga i le alii o Feliua’i Liu e aofia ai le faia o gaioiga tau feusuaiga fa’asaga i se teineititi laititi; faia o gaioiga faafeusuaiga i se tulaga mataga, atoa ai ma lona tagofia o itutinosa o se teineititi e le i fa’aipoipo i ai.

Na teena e le alii o Liu moliaga fa’asaga ia te ia ina ua tula’i i luma o le fa’amasinoga maualuga i le taeao ananafi, ma fa’atulaga ai loa lana ulua’i iloiloga i le masina o Me.

I fa’amaumauga a le fa’aasinoga o lo o taua ai e fa’apea, o le mataupu lenei na tofu atu i le ofisa o leoleo i Tafuna i le aso 16 Mati, 2014, ina ua logo e se isi o le aiga o le tama’ita’i na a’afia gaioiga mataga a Liu sa faia i le tama’ita’i na a’afia, ma tofia ai loa le ali’i leoleo ia Iapani Tiumalu na te su’esu’eina lenei mataupu.

Na taunuu leoleo i le fale o le teineititi na aafia i Nu’uuli, ma faatalatalanoa ai loa e leoleo ma le aiga le mataupu e tusa ai o le mea sa tupu.

Na fa’ailoa e le teineititi na a’afia i leoleo e fa’apea, o le masina o Fepuari 2014 na amata mai ai le la mafutaga ma le ua molia, ma faasolo mai ai lava se ia oo mai i le aso 12 Mati 2014.

O le fale o le alii ua molia sa faaaoga e faatino ai le solitulafono, e pei ona faamaonia e le teineititi na aafia i leoleo.

E $10,000 le vaega tupe lea ua fa’atulaga e le fa’amasinoga e totogi ona fa’atoa mafai lea ona tatala le ua molia i tua, e fa’atali ai taualumaga o lana mataupu o lo o fa’agasolo i luma o le fa’amasinoga maualuga i le taimi nei, ae afai e mafai ona tatala o ia i tua, ua faasa ona ia toe taumafai e fa’afeso’ota’i le teineitiiti na a’afia po o se tasi o lona aiga i soo se auala.

Ua poloaina fo’i e le fa’amasinoga le ua molia ina ia aua ne’i ona toe taumafai e soli se tulafono a le malo i soo se taimi, a ia avea o ia ma tagatanuu lelei e tausisi ma usita’i i le tulafono.

SAUOLEOLA ESENE

O le ali’i lea o lo o tuuaia i lona faaaoga o se agaese e faaoo ai manu’a i se isi ali’i, ua ia tula’i ma teena tuuaiga faasaga ia te ia i luma o le faamasinoga mauluga i le taeao ananafi.

I le teena ai e le alii o Sauoleola Esena o le moliaga mamafa o le faaoolima i le tulaga lua, atoa ai ma le moliaga mama o le faatupu vevesi i nofoaga faitele, ua fa’atulaga ai loa le isi ana iloiloga e faataunuuina i le masina fou o Me i luma o le afioga i le ali’i faamasino sili ia Michael Kruse ma ana faamasino lagolago.

E tusa ai o faamaumauga a le faamasinoga o lo o taua ai e faapea, o se vevesi na tulai mai i le va o Esene ma le alii na aafia i le aso 4 Fepuari 2014, na mafua ai loa ona logo e le aiga le ofisa o leoleo i Tafuna mo se fesoasoani, ma tofia ai le alii leoleo ia Iapani Tiumalu na te suesueina lenei mataupu.

O le vevesi na tula’i mai ina ua alu atu Esene ma tu’i le ali’i na aafia a’o galue i le ma’umaga, sosoo ai loa ma le ta e le ua molia o le au taliga o le alii na aafia i le agaese e pei ona taua i faamaumauga a le faamasinoga, peitai na vave ona taofi ina ua oso atu i ai se tasi o le aiga o le alii na aafia ma faafilemu le vevesi.

E taunuu leoleo i le nofoaga na tula’i mai ai le vevesi i Mesepa, ua sola ese le ua molia ma ua fi’u fo’i e tau saili o ia i le aso lea.

Na faamatala e le alii na aafia i leoleo e faapea, o ia sa galue i le faamamaina o le latou ma’umaga e tu i tafatafa o le latou fale, ae na te’i ina ua alu atu le tagata ma tu’i o ia e aunoa ma sona iloaina.

Na tau matapogia lana vaai mo ni nai sekone, ae na te’i ina ua toe malamalama ane lana vaai o lo o tu Esene i ona luma ma se agaese i lona lima, o le taimi fo’i lea na sasau atu ai loa le ta a Esene ma lavea ai lona talia i le agaese, ae na vave ona oso atu le isi ona tausoga ma aveese le agaese mai le lima o Esene.

Na taua e Esene i leoleo e faapea, o le vevesi na mafua mai ina ua tu’i e le alii na aafia lona gutu i le aso 2 Fepuari, 2014, o le aso Sa lea, peitai sa uma ona toe teuteu ma faaleleia mea uma i lo la va.

Ae i le aso 4 Fepuari ina ua alu atu i le fale o lana uo teine, sa ia vaaia ai le alii na aafia o lo o galue mai i le latou ma’umaga, ma faafuase’i ai loa ona toe oso lona ita e tusa ai o le mea sa tula’i mai i le aso Sa, o lea na alu atu ai loa ma ta tu’i ona foliga.

Na taua e Esene i leoleo, o ia na se’i ese ina mai le agaese mai le lima o le ali’i na a’afia, ae leai se agaese na alu atu ma ia.

E $5,000 le tupe lea ua faatulaga e totogi ona tatala ai lea i tua Esene e faatali ai taualumaga o lana mataupu e pei ona fa’agasolo i le taimi nei i luma o le fa’amasinoga.

Afai ae mafai ona tatala o ia i tua, ua poloaina o ia e aua ne’i ona toe taumafai e faafesootai le na aafia poo nisi o lona aiga, a ia avea o ia ma tagatanuu lelei e tausisi i le tulafono i soo se taimi.