JAMES VILIAME

O le ali’i lea na se’i e le fa’amasinoga fa’aitumalo lana laisene mo le umi e 6 masina i le masina o Novema o le tausaga na te’a nei, ina ua ta’usala o ia i le solitulafono o le ave ta’avale ‘ona, ua maea ona faila e le malo le moliaga mamafa faasaga ia te ia i le vaiaso na te’a nei, le moliaga o le ave ta’avale a’o se’i lona laisene.

I lalo o le tulafono, soo se tasi e molia e le malo i le solitulafono mamafa lenei ae fa’amaonia e le fa’amasinoga, e fa’amalosia i lalo o le tulafono lona tuliina o aso e 90 i le toese i Tafuna, po o se isi fo’i e sili atu e fautuaina e le faamasinoga.

I faamaumauga a le faamasinoga o lo o taua ai e faapea, na taofia e leoleo le ta’avale na alu atu ai Viliame i le aso 5 Aperila, 2014 i Fagaalu, ina ua molimauina e leoleo i le latou masini e fua ai saoasaoa o maila o taavale le ova o maila o lo o alu atu ai le ta’avale a le ua molia nai lo maila e faatulagaina.

Na taofi e leoleo le taavale a Viliame ae fesiligia o ia i lona laisene, peitai sa pepelo le ua molia ua maea le aoga o lona laisene, ae ina ua suesue atili e leoleo na iloa ai o lo o sei lona lasene.

O lo o tatala i tua Viliame e faatali ai le aso lea ua faatulaga e toe valaau ai lana mataupu i luma o le alii faamasino ia John L. Ward II.

TATALA FA’AMASINOGA I LE APERILA 19

Ua fuafua le tatalaina o le Fale Fa’amasino Fa’aitumalo i le aso To’ona’i, Aperila 19, 2014 mo le taulimaina o ni mataupu e ono mana’omia le iloiloina, i le tuana’i ai lea o aso malolo e lua o le fu’a ma le Eseta i le faaiuga o le vaiaso nei.

I se tusi sa tuuina atu e le alii faamasino ia John L. Ward II i le afioga i le Komesina o Leoleo i le vaiaso na te’a nei, o lo o fa’ailoa ai e le ali’i fa’amasinoga se atugaluga o le fa’amasinoga i le ono tele lea o mataupu e iloiloina e le fa’amasinoga, pe a toe tatala galuega i le vaiaso e soso’o ma le vaiaso o le fu’a, ma avea ai ma itu o le a tele naua ai galuega a le fa’amasinoga e taulimaina i le taimi e tasi.

Na taua e Ward II i lana tusi e faapea, ina ia faa faigofie ai o galuega a le faamasinoga, o i latou uma o le a taofia i le toese i Tafuna i le aso tonu o le sisiga fu’a, Aperila 17, 2014 atoa ai ma le aso malolo o le Eseta, le aso Faraile e soso’o ai, o i latou ia o le a tutula’i i luma o le fa’amasinoga fa’aitumalo i le aso To’ana’i e sosos’o ai.

E na o le fa’amasinoga faaitumalo o le a tatalaina lana auaunaga i lea aso, ae o galuega a le fa’amasinoga maualuga o le a tapunia pea sia aulia le isi vaiaso o lo o soso ‘o ai.

FALETOLU LOGOIPULOTU

O le ali’i lea na tuuaia i lona tu’iina o foliga o le isi alii, ua ia tautino i luma o le faamasinoga maualuga i le vaiaso na te’a nei, e fa’amaonia tuuaiga faasaga ia te ia, i lalo o se maliliega sa latou sainia ma le malo ma ua talia fo’i e le fa’amasinoga.

Na ulua’i tuuaia e le malo Faletolu Logoipulotu i le moliaga mamafa o le faaoolima i le tulaga lua atoa ai ma le moliaga mama o le faatupu vevesi i nofoaga faitele, ae i le maliliega sa latou sainia ma le malo ma ua talia fo’i e le fa’amasinoga, ua ia tali ioe ai i le moliaga o le faaoolima i le tulaga tolu lea ua toe teuteu e le malo, ae solofua e le faamasinoga le moliaga o le faatupu vevesi i nofoaga faitele.

I le tali ioe ai o Logoipulotu i le moliaga sa ia tautino ai e faapea, i se taimi o le aso 11 Ianuari 2014 i Amerika Samoa, sa ia tu’iina ai lana uo o Malaki Fitiao i lona lima i le taimi o se latou inuga pia sa faia..

O le aso 24 Me lea ua faatulaga e lau ai le faasalaga a le ua molia, ma o lo o taofia pea o ia i le toese i le taimi nei.