PATI SOLOMONA

E 6 masina lea ua poloaina e le faamasinoga maualuga e taofia ai Pati Solomona i le toese i Tafuna, ina ua tausala o ia i le moliaga mamafa o le faaoolima i le tulaga lua.

E 20 masina na manatu le faamasinoga e taofia moi ai Solomona i le toese, ae talu ai itu lelei sa faaalia e loia mo ia, ua manatu ai alii faamasino, ua lava masina e 6 i le falepuipui, atonu o le a ia aoaoina ai se lesona taua mo lona olaga, ma aua ai nei ona toe soliina se tulafono.

O Solomona na tuuaia e le malo i lona faaoolima i le alii o Faaaliga Iese i le taimi o se latou inuga pia, ina ua ia faaaoga se atigi fagupia e ta ai le ulu o le alii na aafia ma manu’a ai.

Na faatoese Solomona i le faamasinoga e tusa ai o lana solitulafono sa fai, ma ia talosagaina ai se isi avanoa mo ia sei toe foi atu ai i lona aiga e tausi lana fanau. Sa ia tautino foi lona salamo e tusa ai o le mea sa tupu, na te le toe soliina foi se isi tulafono a le malo pe toe tago i le ava malosi.

Na tutu faatasi le loia a Solomona ia Karen Shelly ma le loia a le malo ia Tiffany Oldfield e finau i le faamasinoga e faanofovaavaaia le ua molia, ina ia maua ai le avanoa e toe faaleleia ai mea ua faaletonu i lona olaga.

O ni isi o poloaiga a le faamasinoga mo le nofovaavaaia a Solomona, o lona totogiina lea o le salatupe e $1,000 i totonu o le ulua’i 6 masina o lana nofovaavaaia, ua poloaina fo’i o ia na te totogiina le pili o le falema’i a le alii na aafia i le taimi na togafitiina ai ona manu’a.

Ua poloaina foi o ia ina ia faatoese i le alii na aafia, ma ia faafou lona ID nofomau ina ia tusa ai lona aumau i le atunuu ma tulafono a le Vaega o Femalagaaiga.

Talu mai le aso 30 Novema 2013 lea na taofia ai Solomona i le toese, toe tasi le masina ma nai vaiaso o lo o totoe na te tuliina i le toese ona magalo loa lea o ia i tau.

ELDEN SIOKA

O le alii lea na ulufale faamalosi i totonu o le fale o se aiga, ma alu i totonu o le potu o lo o momoe ai se tina talavou ma lana tama, ma tago tago i itutinosa o le tina talavou lea, ua poloaina e le fa’amasinoga ina ia taofia o ia i le toese i Tafuna mo le umi e 28 masina.

Na faatoese le alii o Elden Sioka i le faamasinoga e tusa ai o lana solitulafono, ma ia talosagaina ai le faamasinoga mo se isi avanoa sei toe fo’i atu ai i lona aiga e faasa’osa’o mea ua faaletonu i lona olaga.

Sa ia taua e faapea, ua matua lagona lona salamo e tusa ai o lana solitulafono sa fai, ua toe fia fo’i i lona aiga e tausi ona matua ma saili se isi lumana’i lelei mo ia.

Na taua e lana loia fautua ia Karen Shelly e faapea, o le gaioiga sa faia e Sioka o se gaioiga ua matua sili le faavalevalea, ina ua ova lona ‘ona i sana inugapia sa fai, ma alu ai loa e saili lana uo teine, peita’i na ese le itu na aga’i i ai o ia, ma i’u i lona ulufale faamalosi ai i totonu o le fale o se isi aiga.

Na tutu faatasi le loia a Sioka ma le loia a le malo ia Tiffany Oldfield e talosaga i le faamasinoga e faanofovaavaaia o ia, faatasi ai ma le talosaga a le malo ina ia i ai se faasalaga faafalepuipui mo le ua molia.

Saunoa le alii faamasino sili lagolago ia Lyle L. Richmond e faapea, ua talia e le faamasinoga le talosaga a le ua molia, ua ia lagona lona salamo, ona ua silasila le faamasinoga i le laititi o lona olaga, o lea faatoa 19 ona tausaga, e atagia mai foi o le taimi muamua lea faatoa solitulafono ai o ia.

E 7 tausaga na manatu le faamasinoga e faasala ai Sioka i le toese, peitai o le a faamalumalu lona tuliina o le faasalaga, ae o le a nofovaavaaia o ia mo le 7 tausaga i lalo o poloaiga a le faamasinoga.

O ni isi o poloaiga e tatau ona ia usitaia e aofia ai lona totogiina o le salatupe e $1,000, lesitala lona igoa i le lisi o tagata ua tausala i le faia o uiga mataga i tamaitai, aua nei ona toe tagofia le ava malosi, ma ua faasa foi ona ia toe taumafai e faafesootai le tina na aafia poo ni isi o lona aiga.

TONY LAUPEPA

O le vaiaso nei na faila ai e le malo le moliaga mamafa o le ave taavale ‘ona a’o se’i le laisene faasaga ia Tony Laupepa, ina ua maua o ia e leoleo o lo o ia faafoeina se taavale a’o lea fa’atoa tasi le masina talu ona se’i lana laisene mo le umi e 6 masina, ina ua tausala o ia e le faamasinoga faaitumalo i le moliaga o le ave taavale ‘ona.

Na avea le alu saoasaoa o le taavale na ave e le ua molia i luga o le auala i Nuuuli ma itu na mulimuli atu ai loa leoleo i tua o lana taavale, ma vaaia ai ua afe le taavale a le ua molia i se faleoloa.

Na taunuu leoleo ma fesiligia le ua molia i le mafuaaga na alu saoasaoa ai lana taavale i luga o le auala, ma poloaina ai loa o ia e tuu atu lona laisene ave taavale, peitai na faailoa sa’o e Laupepa i leoleo i le taimi lea, o lona laisene o lo o se’i e le faamasinoga.

O le vaiaso fou lea ua toe tolopo i ai le isi iloiloga o le mataupu a Laupepa.