NOFOVAAVAAIA LE ALI’I GAOI

O le alii e 22 tausaga mai Aua lea na tuuaia i lona gaoia o ni mea faigaluega sa i tua o se loli na paka i luma o se faleoloa i Satala, ua nofovaavaaia mo le 12 masina i lalo o poloaiga a le faamasinoga, e aofia ai le tatau lea ona su’e sana galuega e maua ai tupe e faatino ai mea e mana’o ai, ma le alu gaoi meatotino a isi tagata.

Na taua e Malaki Upuese e faapea, o mea faigaluega sa ia gaoia mai tua o se loli sa paka i luma o se faleoloa e pei o le ili e alu i le uila ma se fua toso, sa alu ma faatau i le isi alii kamuta, peitai ua maea ona toe faafoi i leoleo.

Na faatoese Upuese i luma o le faamasinoga e tusa ai o lana solitulafono sa fai, ma ia talosagaina ai se isi avanoa mo ia se’i toe fa’asa’o ai mea ua sese i lona olaga.

Na talia e le faamasinoga faafinauga a loia ina ia nofovaavaaia le ua molia mo le 12 masina, ina ua ta’usala o ia e le fa’amasinoga i le moliaga mama o le gaoi.

O ni isi o poloaiga a le faamasinoga mo Upuese e aofia ai le aua nei ona toe soliina se tulafono a le malo, ma ia totogi le salatupe e $100 i le faamasinoga.

FOTU LAVEA

O le vaiaso nei lea ua faatulaga e le faamasinoga latou te faila ai le moliaga mamafa o le ave taavale a’o se’i le laisene fa’asaga ia Fotu Lavea, ona o le faalavelave lea na maua ai o ia e leoleo o lo o faafoeina se ta’avale i Fagatogo i le aso malolo o le Eseta na te’a nei.

E 6 masina o lo o se’i ai le laisene a Lavea e le faamasinoga faaitumalo, ina ua ta’usala o ia i le moliaga o le ave ta’avale ‘ona i le amataga o le tausaga nei, ma fautuaina ai loa o ia e le faamasinoga, e le mafai ona ia toe aveina se taavale i totonu o le 6 masina lea ua se’i ai lana laisene.

Na avea le le usitaia e Lavea o tulafono i luga o le alatele i Fagatogo ma itu na taofia ai e leoleo le taavale sa ia aveina, ma fesiligia ai loa o ia i lana laisene, mulimuli ane faamaonia e leoleo o le laisene a le ua molia o lo o se’i e le fa’amasinoga.

So o se tasi e ta’usala e le fa’amasinoga i le moliaga mamafa o le ave ta’avale a’o se’i lona laisene, e ono mafai ona faasala o ia i le toese i Tafuna mo le umi e oo atu i le 5 tausaga, e aofia ai ma le faamalosia lea o le tuliina o aso e 90 i totonu o le falepuipui e pei ona faatulaga mai e le tulafono.

SIUTU BROWN

O le aso 23 Me lea ua faatulaga e lau ai le faasalaga a le alii o Siutu Brown i luma o le faamasinoga maualuga, ina ua ta’usala o ia i le solitulafono o le faaoolima i le tulaga tolu na toe teuteu e le malo, ina ia suia mai ai i le moliaga mamafa o le faaoolima i le tulaga lua na ulua’i tuuaia ai o ia.

I le tali ioe ai o Brown i lenei solitulafono sa ia tautino ai e faapea, i se taimi o le masina o Ianuari 2014 ina ua mae’a sa latou inugapia ma ni isi o ana uo, na tula’i mai ai loa se feeseeseaiga i le va o ia ma le tuagane a lona to’alua, ma ia tu’iina ai ona foliga i ona lima ma manu’a ai lona auvae faapea ai ma lona ulu, ina ua pau i lalo ma tau i le ma’a.

Na tautino Brown, o lana gaioiga sa faia i lea aso sa le tusa lea ma ala o le tulafono, ma ua ia iloa fo’i le sese o le faaiuga sa ia faia.