BRENDONN VAIULA

O le alii e 22 tausaga le matua lea na ia gaioia se siaki mai luga o le laulau a lona uncle, ona alu lea ua tala i se faleoloa ae faatau ai meaai, ua tatala i tua mai le toese i Tafuna e le faamasinoga maualuga i le vaiaso na te’a nei, ma le tuutuuga e aua ne’i ona toe solia se isi tulafono a le malo.

I le ta’usala ai o Brendonn Vaiula i le moliaga mamafa o le gaoi, na saunoa ai le alii faamasino sili ia Michael Kruse e faapea, ua ia talia fautuaga a loia aemaise ai o le Ofisa Nofovaavaaia, ina ia tuu atu se isi avanoa mo Vaiula e faatonutonu ai mea ua sese o lona olaga.

Na faatoese Vaiula i le faamasinoga e tusa ai o lana solitulafono sa faia, ma ia talosagaina ai se isi avanoa mo ia se’i toe fo’i atu ai e saili se galuega e tausi ai lona aiga. Sa ia faatoese fo’i i lona uncle na ia gaoia mai ai le siaki, ina ia faamagalo sona sese sa fai.

Saunoa Kruse e faapea, o Vaiula o se alii talavou ua 22 tausaga le matua, na alu i totonu o le ofisa a lona uncle, ma ia gaoia mai ai ni siaki se lua i luga o le laulau, ma o ia siaki, o ni siaki mai le Ofisa sa fuafua e totogi ai le malaga a lona uncle mo fafo.

Na alu Vaiula ma tala le isi siaki i se faleoloa Asia ma faatau mai ai oloa meaai e pei o pusa moa e lua, pusa sosisi, pepa sikaleti, fagu gel ma isi oloa, ma e talitonu le faamasinoga, ai o le tele o le faatau na fai i le faleoloa na mafua ai ona mafai na tala le siaki.

E 3 tausaga na manatu le faamasinoga e taofia ai Vaiula i le toese, peitai ua manatu le faamasinoga o le a nofovaavaaia o ia mo le 3 tausaga, ae ua lava le tausaga e tasi e taofia moi ai loa o ia i Tafuna, ae o le tuliina la o lea faasalaga e pei ona taua e le faamasinoga e faapea.

O le umi lea ua maea ona tuli e Vaiula i le toese, amata mai i le aso 28 Tesema 2013 na taofia ai o ia seia oo mai i le itula e 4:00 i le afiafi o le aso Faraile na te’a nei, o le a avea lena ma ona faasalaga mo le taimi nei, ae o le paleni o lo o totoe ai i lona faasalaga faa falepuipui e tasi le tausaga, o le a pule le faamasinoga i le aso e tuli faauma ai.

Ua poloaina fo’i e le faamasinoga le ua molia na te faatinoina ni galuega mo le atunuu lautele i le umi e 200, ma ia saili sana galuega tumau e galue ai ma tausi lona aiga.

MARCADO UREZ

O le ali’i mai Filipaina lea na tuuaia e le malo i moliaga mamafa e aofia ai lona tagofia o itutinosa o se teineititi e 5 tausaga, ua solofua e le fa’amasinoga maualuga tuuaiga faasaga ia te ia, ina ua talia e le faamasinoga le talosaga na faaulu e le malo i le aso Faraile na te’a nei, e solofua ai moliaga faasaga i lenei alii.

O Marcado Urez na tuuaia i le moliaga mamafa o lona tagofia o itutinosa o se teineititi e laititi i lalo o le tulafono, atoa ai ma lona faia o ni gaioiga e ono lamatia ai lona saogalemu.

O ia tuuaiga e pei ona taua e le malo i le ulua’i taimi na latou faila ai lenei mataupu i le faamasinoga, na tula’i mai i totonu o le potu e nofo ai le ua molia, ina ua alu atu i ai le teineititi na aafia e tafao i lona potu ae fai i ai e le ua molia nei uiga mataga.

O le ua molia e mau totogi faatasi ma le aiga o le teineititi na aafia i le fale e tasi, ae eseese potu e nonofo ai.

Na taua e le loia malo ia Tiffany Oldfield i luma o le faamasinoga e faapea, talu ai ua malaga i fafo ma le atunuu le tina o le teineititi na failaina le tagi, ua le mafai ai e le malo ona saili ni mau e faamaonia ai tuuaiga faasaga ia Urez, o le mafuaaga lea ua latou talosagaina ai le faamasinoga ina ia solofua lenei mataupu, lea fo’i na talia e le fa’amasinoga.

KERRY NAOLAVOA

Ua poloaina e le afioga i le faamasino sili ia Michael Kruse le tuuina atu o le lauina o le faasalaga o le alii o Kerry Naolavoa e taulimaina e le afioga i le ali’i faamasino ia Elvis P. Patea, ina ua maua mulimuli ane e le alii faamasino i le vaiaso na te’a nei, e aiga o ia i le tagata na aafia i le gaioia Naolavoa sa faia.

O le aso Faraile na te’a nei na faatulaga e lau ai le faasalaga o Naolavoa ina ua tausala o i ai le moliaga o le talepe fale i le tulaga lua, e mafua mai i le faalavelave lea na ia ulufale faamalosi ai i totonu o le fale o se aiga ae gaoi ni oloa sa i ai.

O lo o taofia pea le ua molia i le toese e faatali ai le aso lea ua faatulaga e lau ai lana faasalaga i luma o le alii faamasino o Patea.