Ads by Google Ads by Google

Tala otooto o Fa'amasinoga

TUIA'I LEOTA

 

O le ali'i lea na fealua'i ma se agaese ma taumafai e fa'afefe ai se isi tagata i Aoloau i le fa'aiuga o le vaiaso na te'a nei, ua tu'uaia nei e le malo i moliaga o le fa'atupu vevesi i nofoaga faitele. O le taeao ananafi na tula'i ai o ia i luma o le fa'amasinoga fa'aitumalo, i le mae'a ai lea ona taofia o ia e leoleo i le falepuipui i Tafuna i le fa'aiuga o le vaiaso na te'a nei.

 

I fa'amaumauga a le fa'amasinoga o lo o taua ai e fa'apea, o le afiafi o le aso To'ona'i na te'a nei pe tusa o le 5:30, na logo ai e se molimau le ofisa o leoleo i Tafuna mo se fesoasoani, ona o se tagata o lo o alu atu ma se agaese e tuli ma fa'afefe ai o ia.

 

E fa'alua ona fa'afeso'ota'i e le molimau le ofisa o leoleo i Tafuna mo se fesoasoani, ina alu atu le ali'i o Tuia'i Leota ia te ia ma le agaese, ma aga'i atu ai loa leoleo i Aoloau mo le fa'ato'afilemuina o le mataupu.

 

Ina ua taunu'u leoleo i le vaega tonu na tula'i mai ai le fa'alavelave, ae fa'ailoa ane i ai e le molimau, ua sola ese Leota ina ua ia vaaia leoleo, ma o lo o ti'eti'e o ia i luga o se pikiapu F-150 o lo o aga'i atu i le isi itu o Aoloau.

 

Na taua atili e le molimau i leoleo e fa'apea, o le vevesi na mafua mai ina ua fa'ateia o ia a'o moa lana vao, ina ua alu atu le ua molia ia te ia e 'ona, ma fa'atonu o ia e leai sana feau i le fanua o lo o ia galue ai, ma amata loa ona ia lafo atu upu palauvale ia te ia.

 

Na taua e le molimau i leoleo e fa'apea, ina ua ia tali atu ia Leota e leai sana pisinisi e aia atu ai fua ia te ia ma le fanua, o iina na ia vaaia ai le ita o le ua molia, ma alu ai loa i totonu o le fale ma sau ai i fafo ma se agaese ma valaau atu ia te ia, po o le mea lea e mana'o i ai, ae fa'alala le agaese o lo o i lona lima.

 

Na tamo'e i le atoa le molimau i lana ta'avale peita'i sa tuliloa atu e le ua molia ma le agaese, ma fa'afuase'i ai loa ona oso atu le tina a le ua molia ma taofi lona lima ma taumafai e fa'ato'afilemu gaioiga a Leota o lo o faia, ae sa atili ai pea ona faigata ona fa'atonutonu o ia.

 

Ina ua fesiligia e leoleo le ua molia, sa ia taua ai le muamua lea ona osofa'i o ia e le molimau i se laau, ma mafua ai loa ona tula'i mai le vevesi.

 

Na siaki e le vaega a le EMS le tino o Leota, ma e leai ni unaoa po o ni maosia i lona tino e fa'amaonia ai sa osofaia o ia.

 

KENETI LAFI

 

O le vaiaso na te'a nei na faila ai e le malo le moliaga mamafa o le ave ta'avale a'o se'i le laisene fa'asaga ia Keneti Lafi, e mafua mai i le mataupu lea na maua ai o ia e leoleo o lo o ia fa'afoeina se ta'avale i luga o le auala i Fagatogo i le lua vaiaso talu ai.

 

Na taofi e leoleo se pikiapu i luga o le auala i le taulaga i Fagatogo ina ua le usita'i i fa'ailoilo o le auala, sa fa'ailoa e le ua molia i leoleo, o lona laisene o lo o se'i e le fa'amasinoga, ina ua ta'usala o ia i le moliaga o le ave ta'avale 'ona.

 

O le masina o Iulai na te'a nei na se'i ai e le fa'amasinoga fa'aitumalo le laisene a Lafi ina ua ta'usala o ia i le moliaga mama o le ave ta'avale 'ona, ma fautuaina ai o ia e le fa'amasinoga, e le tatau ona ia toe aveina se ta'avale i totonu o le 6 masina.

 

Afai ae maua o ia fa'afoeina se ta'avale ae fa'amaonia e le fa'amasinoga, e ono mafai ona molia o ia i le moliaga mamafa o le ave ta'avale ae o lo o se'i le laisene, ma afai e fa'amaonia lea moliaga, e ono mafai ona fa'asala o ia i le toese mo le umi e le sili atu i le 5 tausaga, e aofia ai le 90 aso lea e fa'amalosia ona ia tuliina i le falepuipui.

 

O le vaiaso fou lea ua fa'atulaga e toe fofogaina ai le mataupu a Lafi i luma o le fa'amasinoga, ma o lo o tumau pea tu'utu'uga o lo o tatala ai o ia i tua e fa'atali ai le isi ana iloiloga i luma o le fa'amasinoga.