TU'UAIA SE ALI'I I LONA FAIA UIGA MATAGA I SI ONA TEI

O le ali'i lea o lo o tu'uaia i lona faia o ni uiga mataga i si ona lava tei teine, ua ia tula'i i luma o le fa'amasinoga maualuga ma teena tu'uaiga fa'asaga ia te ia i le taeao ananafi.

Talu ai o le so'otaga vavalalata i le va o le ali'i ua molia ma le teineititi na a'afia, o le a le mafai ai e le Samoa News ona fa'ailoa le igoa o le ua molia, ona o puipuiga lava mo le teineititi na a'afia.

O le aoauli o le aso 20 o Novema na fa'afeso'ota'i ai e le tama o le teineititi na a'afia le Ofisa o Leoleo i Leone, e fa'ailoa i ai le fa'alavelave sa tupu.

Na fa'amatala e le teineititi i leoleo ina ua fesiligia o ia e fa'apea, o ia sa matamata T.V i le fale a lona grandmother, e le i umi ae ulufale atu loa ma lona tausoga (le ua molia) i totonu o le fale, ma tauanau o ia la te o i lona fale (fale a le ali'i ua molia).

E le i ano le teineititi i le fa'atauanau ane a lona tausoga, ae sa tali i ai se'i uma ona matamata lana ata o lo o sau i le T.V, peita'i se atili ai ona tauanau atu pea le ua molia la te o i lona fale, seia o o lava i le tu o le ali'i ua molia ma savali atu ua saofa'i i tafatafa o le teineititi na a'afia, lea o lo o nofo i luga o le moea ma matamata le T.V.

Na taua e le teineititi i leoleo lona fa'alogoina o le manogi pia mai le mavana a le ua molia i le taimi na saofa'i atu ai i ona tafatafa.

E le i umi ona saofa'i le ua molia i tafatafa o lona tausoga, ae amata loa ona tago atu ona lima i vaega o lona tino, seia o o lava i lona tago atu i itutinosa o le teineititi na a'afia, ae na tago le teineititi na a'afia ua ato ese le lima a le ua molia, ma ia fa'afeso'ota'i ai loa ni isi o lona aiga e tusa ai o le fa'alavelave ua tupu, ma logo ai loa e tagata o le aiga le tama o le teineititi, ma o o atu ai loa le mataupu i le Ofisa o Leoleo.

Na fa'ailoa e le teineititi i leoleo, e le i malie lona loto i gaioiga sa faia e le ua molia fa'asaga ia te ia.

O le masina fou o Tesema lea ua fa'atulaga e faia ai le ulua'i iloiloga o le mataupu a le ua molia i luma o le fa'amasinoga maualuga, ina ua ia teena le moliaga mamafa o lona tagofia o itutinosa o se teineititi, atoa ai ma le moliaga mama o le fa'ao'olima i le tulaga tolu fa'asaga ia te ia.

O lo o taofia pea i le toese le ua molia e fa'atali ai le isi ana iloiloga lea ua fa'atulaga e le fa'amasinoga.

ARONA AMITUANA'I

Ua tolopo le iloiloga a le ali'i o Arona Amituana'i e fofogaina i le aso 4 Tesema, ina ua talia e le fa'amasinoga le talosaga e toe tolopo ai le iloiloga na fa'atulaga e faia ananafi, ona e le i auai le loia a le ua molia, le susuga ia Joel Shiver.

O ananafi na fa'atulaga e tu'uina atu ai se faaiuga a le afioga i le ali'i faamasino ia Lyle L. Richmond, ma ana fa'amasino lagolago ia Mamea Sala Jr ma Muasau Tofili, i le talosaga a le malo ina ia fa'aleaoga tuutuuga o le nofovaavaaia a Amituana'i, ae poloaina o ia e tuli tausaga o lo o totoe o lana faasalaga sa fa'amalumalu e le fa'amasinoga.

Na taua e le ali'i loia fautua ia Douglas Fiaui na tulai mo Amituana'i ananafi e fa'apea, ua sauni le ali'i loia ia Shiver na te finauina le mataupu a Amituana'i, ae ua le avanoa o ia ona o lo o i ai le isi mataupu o lo o ia tauaveina i luma o le fa'amasinoga fa'aitumalo, peita'i na finau le loia a le malo o Tiffany Oldfield e fa'apea, e leai se mea e toe fa'atali ai fua le fa'amasinoga i sana fa'aiuga, o lea ua mae'a ona ioe Amituana'i ua ia soli tu'utu'uga o lana nofova'ava'aia.

Na finau le itu a le malo e fa'apea, e le gata o lo o nofova'ava'aia Amituana'i i luma o le fa'amasinoga maualuga, ae o lo o nofova'ava'aia fo'i i luma o le fa'amasinoga fa'aitumalo.

Saunoa Richmond e fa'apea, o le a tolopo le iloiloga a Amituana'i i le masina nei, ina ia maua ai le avanoa o lana loia na te finauina ai ni itu lelei mo le ua molia.