TUUAGA SAMOA

O le ali'i lea na ulufale i totonu o se faleoloa i Aua ma fa'ao'olima i ni tagata se to'atolu sa i ai, ua molia nei e le malo i moliaga e lua, lea e aofia ai le moliaga mamafa e tasi o le fa'ao'olima i le tulaga lua atoa ai ma le moliaga mama o le fa'ao'olima i le tulaga tolu.

I fa'amaumauga a le fa'amasinoga o lo o taua ai e fapaea, pe tusa o le itula e 12:34 i le aoauli o le aso 19 Novema 2014, na ulufale ai Samoa i totonu o le faleoloa o le Raimaker Store i Aua, ma ia fa'ao'olima i ni tagata se toatolu sa i ai, ma logo ai loa e le pule o le faleoloa le ofisa o leoleo mo se fesoasoani.

Na taua i fa'amaumauga a le fa'amasinoga e fa'apea, na ulufale Samoa i totonu o le faleoloa ma aga'i atu ai i le pito i tua, o lo o nofo mai ai le isi ali'i Asia ma si'i lona atali'i e 2 tausaga le matua, ona alu atu lea o le ua molia ma tu i le vae o le ali'i Asia lea.

Na toe savali mai le ua molia i le isi itu o le faleoloa ma fa'ao'olima i le isi ali'i Asia o lo o tu atu ai, ae fa'ai'u i lona savali atu i le ali'i lona tolu o lo o nofo i le masini tupe, ma ia taumafai e fa'ao'olima ia te ia e ala i lona se'i o se tama'i naifi sa i le taga o lona ofu ma taumafai e osofa'i ai o ia, ae na vave le oso ese o le ali'i lea ma aapa atu i fagu o lo o teu ai i totonu lole ma togi ai le ua molia.

Na lagona mai e le tama'ita'i pule o le faleoloa mai tua o le potu o lo o i ai le vevesi o lo o tula'i atu i luma, o lea ma tamo'e mai ai loa i luma o le faleoloa na te fia iloa le mea o lo o tupu, ae na te'i ina ua taunu'u ane i luma ae tamo'e atu le ua molia ma titina lona ua, atoa ai ma lona taumafai e toso atu lona ulu, peita'i sa taumafai le tama'ita'i pule e tete'e atu i gaioiga a le ua molia o lo o faia.

Mulimuli ane na i'u loa i le fa'ao'olima o Samoa i le tama'ita'i pule o le faleoloa, e ala i lona tatu'iina o ona foliga i ona lima a o ia u'u ina le tama'i naifi, ma manu'a ai se vaega o le ulu o le tama'ita'i pule i le naifi.

Na taunu'u leoleo i le faleoloa ma latou molimauina gaioiga uma sa tula'i mai i se ata sa pu'eina e le masini pu'eata a le faleoloa, ae o le taimi fo'i lea o lo o savali ane ai le ua molia i luga o le auala, ma mafai ai loa ona pu'e fa'apagota o ia e leoleo, se'i vagana ai le tama'i naifi e le i mafai ona maua.

Na teena e Samoa tu'uaiga fa'asaga ia te ia ina ua tula'i i luma o le fa'amasinoga maualuga i le vaiaso na te'a nei, ma ua toe tolopo nei lana mataupu e toe fofogaina lea i le masina fou, ma o lo o taofia pea o ia i le toese i Tafuna, se'i vagana ua totogi le $10,000 ona fa'atoa mafai lea ona tatala o ia i tua.

LAFI UNASA

O le ali'i e 35 tausaga mai Iliili lea na alu ma se agaese e fa'afefe ai le ali'i na vevesi ma lona to'alua, ua molia nei e le malo i moliaga mama o le fa'atupu vevesi i nofoaga faitele atoa ai ma le fa'ao'olima i le tulaga tolu.

O lea mataupu na tula'i mai ina ua tula'i mai se tauga upu i le va o le ali'i na a'afia ma le to'alua o le ali'i ua molia i totonu o le faleoloa, ma alu atu ai le fafine ma ta'u i lona to'alua tala a le ali'i na la vevesi sa fai atu ia te ia.

O le ita o le ali'i ua molia na alu ai i le faleoloa ma tau mafai e titina le ua o le ali'i na vevesi ma lona toalua, ae o le taumafai o tagata sa i ai e vaovao i laua, na toe fo'i ai le ua molia i lona fale ma sau ai loa ma le agaese ma le fa'amoemoe e fa'afefe ai le ali'i lea, ae fetaui loa ma le taunu'u atu o leoleo ma taofia fa'apagota ai loa o ia.

Na tete'e Unasa i moliaga mama e lua ua tu'uaia ai o ia e le malo, ma ua toe tolopo nei lana mataupu e toe fofogaina i le isi lua vaiaso.

Ua tatala fo'i o ia i tua i lalo o tu'utu'uga a le fa'amasinoga e ao ona ia usita'i i ai, e pei o le fa'asa lea ona toe alu i le faleoloa na tula'i mai ai le vevesi, aua fo'i nei ona toe taumafai e fa'afeso'ota'i le ali'i na la vevesi, pe toe alu i ai ma se a'upega po o lona faia fo'i o ni isi upu tau fa'amata'u po o ni isi gaioiga e save'u ai le nonofo filemu.

FA'AMANATU VILI

O le vaiaso na te'a nei na faila ai e le malo le moliaga mamafa o le ave ta'avale a'o se'i le laisene fa'asaga ia Fa'amanatu Vili, e mafua mai i le fa'alavelave lea na maua ai o ia e leoleo o lo o ia fa'afoeina se ta'avale, ae o lo o se'i lona laisene ave ta'avale.

O le masina o Aokuso na ta'usala ai e le fa'amasinoga fa'aitumalo ia Vili i le moliaga mama o le ave ta'avale 'ona, ma se'i ai loa lana laisene mo le 6 masina. Sa fautuaina o ia e le fa'amasinoga e aua ne'i ona toe aveina se ta'avale i totonu o le 6 masina, ina ne'i molia o ia e le malo i le moliaga mamafa o le ave ta'avale a'o se'i le laisene.

O se ta'avale e le i usita'i i fa'ailoilo o le auala i le taulaga i Fagatogo, na mafua ai ona taofi e leoleo ma fesiligia le ave ta'avale i lona laisene, ma iloa ai o le ali'i o Vili o lo o fa'afoeina le ta'avale, ma fa'ailoa i ai e le ua molia, o lana laisene o lo o se'i mo le umi e 6 masina.