ANDREW FAGOTA

O le aso 10 Iulai lea ua fa’atulaga e tuu mai ai le fa’aiuga a le fa’amasinoga maualuga fa’asaga i le ali’i o Andrew Fagota, i le mae’a ai lea ona ia ta’utino i le fa’amasinoga, e fa’amaonia tu’uaiga fa’asaga ia te ia, i lona le usitaia lea o tuutuuga o lana nofovaavaaia, sa tuuina mai e le fa’amasinoga i le aso na ta’usala ai o ia i le moliaga o le fa’aoolima.

O se tasi o tuutuuga o le nofovaavaaia a Fagota sa tuuina atu e le fa’amasinoga i le tausaga e 2013, e aofia ai le aua lea ona ia toe solia se tulafono, peita’i o le masina na te’a nei na ta’usala ai o ia i luma o le fa’amasinoga faaitumalo i le moliaga o le faaoolima i le tulaga tolu, ma mafua ai loa ona talosaga le Ofisa Faanofovaavaaia i le fa’amasinoga mo se poloaiga e faaleaoga ai le nofovaavaaia a Fagota.

O le faaiuga lea ua faatali i ai Fagota mai le fa’amasinoga, o le toe teuteu lea o poloaiga o lana nofovaavaaia, poo le poloaina loa o ia e tuli fa’amae’a tausaga e tolu o loo totoe o lana faasalaga faafalepuipui, lea sa fa’amalumalu ae poloaina o ia e usita’i ma aua ne’i ona toe soli se tulafono.

FREDDIE FAAOSO WILLIAM

O le alii lea na ia faatauina atu ni masini computer sa gaoia mai e isi alii mai le Ofisa o le Aoga Maualuga a Leone i le masina o Ianuari 2012, ua faanofovaavaaia e le faamasinoga maualuga mo le 5 tausaga i lalo o poloaiga e ao ona ia usita’i i ai.

O ni isi o poloaiga ua tuuina atu e le fa’amasinoga i le ali’i Freddie Faaoso William e aofia ai lona totogi o le salatupe e $1,000 i totonu o le ulua’i 90 aso talu ona magalo mai i le toese, aua nei ona toe solia se tulafono, ma ia alu e asi le ofisa nofovaavaaia i masina ta’itasi.

E 20 masina lea fo’i ua poloaina e le faamasinoga e loka ai William i le falepuipui, peita’i ua manatu le fa’amasinoga, ua lava masina e 6 na te tuliina muamua i le toese, a mae’a, ona tatala lea o ia i tua e alu e saili sana galuega tumau ina ia mafai ai ona totogi lana salatupe.

“Afai e mae’a aso e 90 e lei maua lava sau galuega tumau, e le aofia ai lou faigaluega mo oe lava poo lou galue foi i le faatoaga fa’i a la outou aiga, ona e toe fo’i loa lea i totonu o le falepuipui e tuli fa’amae’a masina e 20 o loo totoe o lau faasalaga faa falepuipui,” o le faatonuga lea a le alii faamasino sili o Michael Kruse ia William.

Ao lei tuuina atu le faasalaga a le fa’amasinoga, na finau lana loia fautua ia Joel Shiver i le faamasinoga e faapea, o William, o se alii talavou e na o le 22 tausaga toe atamai, ae ua tele faaiuga sese ua ia faia i lona olaga.

O ni isi o ia faaiuga sese e pei ona taua e Shiver, o le tia’i lea o lana aoga ae le alu e fa’aauau, o le isi faaiuga sese, e i ai lana Fale Inisinia i le fale, o ia fo’i o se alii Inisinia, ae le alu e fa’aaoga tatau ai lona poto ma lona taimi, ae ua sese tagata e tafao ma eva ai, ma i’u ai loa ina saisaitia o ia i lalo o le tulafono.

Na finau Shiver i le fa’amasinoga ina ia faasala William i se faasalaga faanofovaavaaia, lea fo’i sa lagolago i ai le loia a le malo ia Jessica Bargmann ma talia fo’i e le fa’amasinoga.

Na taua e Bargmann i le faamasinoga e faapea, o William na molia i le faalavelave lea na osofa’i ai e ni isi tagata le faleaoga a Leone i le 2012 ma latou gaoia ai ni computer se 5, ona latou tuu lea o masini e lua ia William e alu e fa’atau, ma alu ai loa lea ua molia ma fa’atau atu i ni tagata o le latou tuaoi.

Na taua atili e Bargmann e faapea, e fetaui lava le sainia e le faamasinoga o se poloaiga e pu’e faapagota ai William, ae o le taimi fo’i lea ua malaga ese ai o ia ma le atunuu i le 2012, ae na faatoa maua o ia ina ua pu’e faapagota mai e leoleo ona o tuuaiga o le ave taavale ‘ona, ae maua ai loa i faamaumauga a le faamasinoga le tusi saisai o loo i ai faasaga ia te ia, ma mafua mai ai loa lenei mataupu.

Na ioe Bargmann i le tatau lea ona faanofovaavaaia William, ina ia maua ai le avanoa e saili ai sana galuega e tausi ai lona aiga ma totogi ai lana sala tupe.

Na faailoa e Kruse ia Shiver e faapea, e le tatau ia William ona galue mo ia lava, e pei o lana faafinauga lea e faapea mai, e i ai le Fale Inisinia a le ua molia, ae ina ua taumafai sui o le ofisa nofovaavaaia e saili pe faamaonia, sa latou maua ai, e leai se laisene o se pisinisi Inisinia i lalo o le igoa o William, e le iloa la pe faia lava galuega a lea alii i auala e le tusa ma le tulafono.

Na toe fautuaina malosi e le faamasinoga ia William ina ia tausisi i tuutuuga o lana nofovaavaaia, ina ia taofia ai le toe tuuina atu o ia i totonu o le falepuipui.