FUFUSU NI ALI’I I LUMA O SE ALI’I LEOLEO

O ali’i e to’alua lea na fufusu i luma o se faleoloa i Tafuna ao i ai ma se ali’i leoleo, ua molia nei e le malo i moliaga mama o le fa’atupu vevesi i nofoaga faitele.

O tu’uaiga fa’asaga ia Tasila Tasila ma Ioane Lolesio na afua mai i le fa’alavelave lea na tula’i mai i luma o le faleoloa o Christopher i le aoauli o le aso To’ona’i na te’a nei ma logo ai loa e le ali’i leoleo sa i ai i le taimi o le vevesi le ofisa o leoleo mo se fesoasoani.

Na taua e le ali’i leoleo sa ia molimauina le vevesi e fa’apea, o ia na alu atu i lana ta’avale leoleo e fa’atino lana tiute masani i luga o le alatele i le taimi lea o le aoauli, ae na te’i ina ua fa’atu atu e Tasila lana ta’avale ona o se mataupu sa manaomia ai lana fesoasoani i le taimi lea.

Na taua e le ali’i leoleo i leoleo sa su’esu’eina lenei mataupu e fa’apea, ina ua oso i fafo ma lana ta’avale ua sauni e aga’i atu i le vaega o lo o tu mai ai Tasila, sa ia vaaia Tasila i le taimi lea ua savali aga’i atu i le pito o lo o tu mai ai Lolesio, ma ua foliga mai o le a vevesi i laua.

E le i umi ae vaaia loa e le alii leoleo le tu’i e Tasila o Lolesio, ma sa fa’apea fo’i ona tali ane i ai Lolesio e ala i lana fo’i tu’i, ma amata ai loa le fusuaga i le va o ali’i nei, ma oso atu ai loa le ali’i leoleo ma taofi le la misa, ona tau fai loka uma lea o la lima ae auina atu i le ofisa o leoleo i Tafuna mo isi suesuega atili, mulimuli ane faia le fa’aiuga ina ia taofia uma i laua i le falepuipui i le aso lea lea, e fa’atali ai le aso Gafua na te’a nei lea na la tutula’i ai i luma o le fa’amasinoga fa’aitumalo, lea na la teena ai tu’uaiga fa’asaga ia te i laua, ma ua toe tolopo le la mataupu e toe fofogaina i le vaiaso fou, ae ua fautuaina i laua ina ia tausi le filemu ma aua ne’i toe tula’i mai se vevesi i lo la va.

MOLIA VAESA’U I LE FA’AO’OLIMA

O le ali’i mai Sa’ilele lea na ia fa’aaoga se laupapa e sasa ai le ulu o le isi alii o le nu’u, ua molia nei e le malo i moliaga mama e lua o le fa’ao’olima i le tulaga tolu, atoa ai ma le fa’atupu vevesi i nofoaga faitele.

Na teena e le susuga a Sailele Meli Vaesa’u tu’uaiga fa’asaga ia te ia, ma ua toe tolopo ai loa lana mataupu e toe fofoga i luma o le fa’amasinoga fa’aitumalo i le vaiaso fou.

O lenei mataupu na tofu atu i le Ofisa o Leoleo i Fagaitua i le afiafi o le aso 5 Oketopa, 2014 ina ua logo e se fafine le ofisa o leoleo mo se fesoasoani, ona o se manu’a tuga o lo o a’afia ai le ulu o lona to’alua.

Na taua e le alii na manu’a i leoleo e fa’apea, o ia ua te’i ina ua manava atu i le afiafi o le aso e pei ona taua, ae valaau ane le ua molia e fa’atatau i le ‘parts’ o lana ta’avale na avatu na te faia le oka, ao ia taumafai e fa’amalamalama le mataupu, sa ia vaaia le ita tele o le ua molia, ma ia aapa atu ai loa ma uu mai se fasi laupapa 1x2 pe tusa ma le 3 futu le umi ma ta ai lona ulu ma manu’a ai.

Na taua e le ua molia i leoleo e fa’apea, o ia na ita ina ua fiu e fa’atali le ‘parts’ o lana ta’avale na mafua ai ona ia ave le $60 i le ali’i na a’afia na te okaina, o le mafua’aga lea na ia fa’ao’olima ai loa ia te ia.

Ua poloaina e le fa’amasinoga le ua molia e aua nei ona toe taumafai e fa’afeso’ota’i le ali’i na a’afia i so o se auala, a o fa’agasolo ai taualumaga o lana mataupu i luma o le fa’amasinoga.