TAUNUU FONO TOFIGA A LE KOVANA MO DR. ORIETA CRICHTON

O le itula e 8:30 i le taeao nei lea ua fa’atulaga e le Komiti o le Faagaioiga o le malo a le maota o sui, latou te fesiligia ai le faletua ia Dr. Orieta Mapu Crichton, e tusa ai o tofiga a le kovana mo ia, e avea ai ma Faatonusili o le Ofisa o le Vaega o Oloa a le malo.

Na taua e Lolo Matalasi Moliga i sana tusi i ta’ita’i o le Fono Faitulafono e fa’apea, e tele se tomai tau i le fa’atinoina o galuega o le a maua mai e le malo ia Dr. Crichton.

Saunoa atili Lolo e fa’apea, o Dr. Crichton sa tautua muamua i le faigamalo a Togiola ma Faoa, ma o loo avea fo’i o ia ma Fautua Sinia i tulaga o Faiga Tausisia mo le faigamalo o loo i ai i le taimi nei, ae sa avea o ia ma sui taitaifono o le komiti o le Atina’e o le Tamaoaiga i le faigamalo a Togiola.

Ao lei taliu mai Dr. Crichton i Amerika Samoa, e tele tausaga sa galue ai o ia i le ofisa o le ali’i faipule i le Konekeresi, le tofa Faleomavaega Eni, lea e aofia ai ma tausaga e 12 sa avea ai o ia ma Faatonu o le Ofisa Faaitumalo, ma o lona tomai tau aoaoga sa fesoasoani malosi lea i lona faatinoina o nei tofiga e tele.

O Dr. Crichton na tofia e Lolo e sui tulaga i le Faatonusili sa i ai muamua o Tiaotalaga John Kruse, lea na fa’amavae ina ua ta’usala o ia i luma o le faamasinoga feterale, i lo la faaaoga ma lona to’alua i ni auala sese o vaega tupe sa maua mai i le polokalame o le 1602.

TU’U FA’ATASI ILOILOGA PAKETI A LE FONO FAITULAFONO

E ui i le tele o finagalo mai ni isi o faipule o le maota o sui pe i ai se avanoa e mafai ai ona tu’u eseese iloiloga a maota e lua mo le Paketi a le malo, peita’i e foliga mai o lea ua mautu lava le fa’aiuga a Ta’ita’i o maota e lua, ina ia tu’u fa’atasi iloiloga o le Paketi e pei ona masani ai fo’i i tausaga ua te’a.

Na taua e ni isi o faipule i luma o le maota o sui i lenei vaiaso e fa’apea, o le matafaioi lava a le maota o sui, o le iloiloina lea o le Paketi a le malo mo le isi Tausaga tupe fou o loo lumana’i, ae na saunoa le Fofoga Fetalai ia Savali Talavou Ale e faapea, o se tasi o itu o loo vaai mamao i ai le Fono, o le tele o le taimi e fa’aalu e Faatonusili e moilmau ai i le isi maota, ona toe molimau fo’i lea i le isi maota mo le paketi.

Na faailoa e Savali i luma o le maota o sui e faapea, ua mae’a ona la fesootai ma le Peresetene o le maota maulauga, ma ua la malilie ina ia tu’u fa’atasi le iloiloga o le paketi mo lenei tausaga, ma ua faamoemoe o le vaiaso fou e tatau ona mae’a ai le fa’atulagaina o le kalena a le Fono, mo le iloiloina o paketi a ofisa ta’itasi o le malo.

Saunoa Gaoteote Palaie Tofau e faapea, o le iloiloga o le paketi a maota e lua, o le a i lalo lava o le taitaiga a Laolagi Fonoti Savali Vaeao ma Timusa Tini Lam Yuem, o ta’ita’ifono ia a komiti o le paketi a maota e lua.

I luma o le maota maualuga i le taeao ananafi, na talosagaina ai e le afioga i le alii senatoa ia Magalei Logovi’i se ripoti mai le faigamalo, e fa’ailoa mai galuega fa’atino i vaega tupe mo le Special Programs, ona o lea ua fa’ailoa mai i le paketi o le tausaga tupe fou le si’itia o lea vaega tupe mo Amerika Samoa i le 2016.

Saunoa Magalei e faapea, e tatau foi ona manino mai i le ripoti tulaga o galuega sa faatinoina i le tupe mo le paketi o le tausaga tupe lenei 2015, ae pe fia fo’i se tupe o loo totoe.

I le paketi o lo’o faailoa mai ai le silia i le $3 milliona le maualuga o le tupe faasoasoa o le 2016 mai le tupe faasoasoa o le tausaga lenei 2015 mo le Special Programs.