Ads by Google Ads by Google

TALA VAIFANUA

FA’AAUAU TALAVAI NIFO FANAU AOGA

 

Ua fa’ailoa mai o lo’o fa’aauau pea lava talavai nifo mo le fanau a’oga i so’o se aoga tulaga muamua i le teritori, i a’oga a le malo ma a’oga tuma’oti.

 

O nei talavai o lo’o fa’atautaia lea e le Matagaluega o le Soifua Maloloina e le vaega a le Maternal & Child Health, o lo’o ta’ita’ia lea galuega e Dr. Anaise Uso. E faia talavai e aofia ai le fa’atumu o nifo ua fa’aleagaina, to’ese nifo ua le toe mafai ona fa’asao, ma fufulu nifo.

 

O le vaiaso na te’a nei sa fa’ato’a mae’a ai talavai nifo sa faia mo vasega 3 ma le 4 i le Manumalo Baptist ma se tala a le se tasi o foma’i nifo o lea vaega sa faia talavai nei, “O lo’o i ai le isi 23 a’oga tulaga muamua e ao ina matou o’o i ai e faia talavai nei a’o le’i tu’ua a’oga i le fa’aiuga o lenei tausaga.”

 

Ina ua fesiligia lava pe na’o fanau a’oga laiti i a’oga tulaga muamua e mafai ona fa’atino ai latou talavai, ae fa’ailoa mai, “E tasi le a’oga maualuga lea ua fa’atulaga, o Leone High School aua ua maea faaulu mai le latou talosaga. Se’iloga lava e mae’a uma le 23 a’oga laiti lea e totoe, fa’ato’a fa’aoo atu lea ia Leone, ae tatalia fo’i pe i ai nisi a’oga maualuga e talosaga mai.”

 

E ese mai lea vaega o foma’i fa’inifo ma latou fesoasoani o lo’o fa’atautaia nei, ua fa’aauau fo’i le tautua a le Fale Fa’inifo a le falema’i i Faga’alu i le fanau a’oga i A’oga ECE uma i le atunu’u.

 

Ua i ai pepa fa’atumu mo matua o fanau e fia faia talavai nei, ma e tatau ona fesiligia e matua ia pepa fa’atumu i le ofisa o le a’oga o a’o’oga ai latou fanau. Afai fo’i e le maua se pepa lea e mafai ona faia le talosaga e ala i le telefoni.

 

TINOITUPE MO LE FAUSAGA O FALE

 

Ua mae’a fa’auia atu i le nusipepa se fa’asalalauga fa’alaua’itele ua fa’ailoa atu ai i tagata lautele, ua maua nei se vaega tupe mo ni talosaga o tupe nono mo le fausia o fale nofo fou mo lenei tausaga.

 

O lenei tinoitupe ua fa’avasega mo nogatupe fa’amokesi e mafai ona toe totogia mo se taimi umi, ma o fale fo’i e fausia ai, e ao ina fausia ia tusa lelei ma aiaiga o fale nofo ua pasia lelei e le DBAS, e le mafai ona toe faia i ai se suiga mo fale ta’itasi -  lua ma le tolu potu moe.

 

Ua fa’atulaga fo’i e ao ina mua’i i ai le pepa fa’amaonia o le fanua fa’atau motu pe o se fanua ua ma’ea lisia ma fa’amauina lea feagaiga fa’alisi i le Ofisa o le Lesitala a le malo. O i latou fo’i e talosaga, e ao ina silafia lelei, o se tagata Amerika Samoa moni Nesionale, Sitiseni o Amerika po’o se tasi e Nofo Mau i Amerika Saoa.

 

O lo’o ua mae’a fa’ailoa mai o le a faia fo’i tauaofiaga eseese e le Faletupe o Atina’e (DBAS) ina ia fa’amalamalama atili ai tagata e fia talosaga ni nogatupe e fa’aaogaina ai lea vaega tupe ua fa’amatu’u mai e silia ma le $600,000.

 

Ua faaaogaina le Hall EFKAS i Faga’itua mo le falelima i sasae i le aso 21 Setema 2015 ma e amatalia lea fonotaga i le 9:00 i le taeao. O le aso Lulu o le a faia i le Hall Katoliko i Leone mo le falelima i sisifo, ae o le aso Gafua 28, Setema o le a faia ai i le Fale Laumei mo nu’u tutotonu.

 

Ua fa’ailoa mai o i latou ua mae’a fa’atumu a latou talosaga, ma ua atoatoa uma latou pepa fa’amaonia na mana’omia, o le a tofusia ma numera le se’i, e faia ia Oketopa 28 i le itula e 9:00 i le fale Laumei mo tagata e alaala i Tutuila, peita’i o Manu’a e faia le latou se’i ia Oketopa 21-22 i le Ofisa o le Kovana i Ta’u. E tapunia talosaga mo nei nogatupe ia Novema 13, 2015.

 

Ua fa’ailoa mai fo’i, o lo’o i ai fo’i nogatupe ua pasia mo le au faipisinisi ma ua mae’a fa’aalu e le faletupe le tinoitupe e tusa ma le $527,000 ae o lo’o totoe pea le vaega tupe mo nogatupe fa’apisinisi e $600,000.

 

MAE’A LE FONOTELE A LE ASSEMBLY OF GOD

 

Na tauaofia mai le fonotele a le Assembly of God i Samoa ma Amerika Samoa i le teritori ma ua fa’ato’a mae’a i le aso Faraile ua te’a. O lea fonotaga sa fa’atulaga mo le vaiaso e tasi.

 

O lea fonotele, sa masani ona faia i tausaga ta’itasi, peita’i, ua toe suia ina ia ta’ilua tausaga ma tauaofia. Ua fa’ailoa mai, e leai ni mataupu ogaoga sa talanoaina, sa faatulaga ni fuafuaga mo le aga’i i luma o tala’iga, fa’atutuina o ekalesia fou, ma fa’ao’o mai fo’i lipoti mai ekalesia ta’itasi o le AOG mai Samoa lea e 60 ekalesia ua mae’a fa’atutuina ai, ma Amerika Samoa e 30 ekalesia ua fa’atuina ai.