O le taeao ananafi sa faia ai se fetufa’iga i le va o le Ofisa o Palota ma le Ofisa o Mataupu Tau Samoa, e aofia ai kovana itumalo, ponao’o ma fa’alupega ae maise le vasega o pulenu’u ma leoleo nu’u.

O mataupu na tutula’i le Komesina o Palota, Tuaolo M. Fruean, e fa’ailo i sui o le Ofisa o Mataupu Tau Samoa, o le latou sao patino i le aso o palotaga a le atunu’u ia Novema 4, 2014.

Na tula’i lea o le sui sinia o le Ofisa o Palota, ia Meleisea Vaitoelau Filiga, ma ia fa’ailoa le  tiute patino i ali’i pulenu’u ma latou leoleo nu’u i le aso o palotaga.

“E tou te le fa’aituau i se tasi o tauva, e tumaoti la tatou tautua, ma e puipuia e i tatou le saogalemu o le fale palota, tagata faigaluega faipalota, ae maise o le va fo’i o sui faikemupeni mo latou sui tauva o sapaia i lea lava aso,” o le saunoaga lea a Meleisea.

Na ia fa’amanino atili, “Afai o tauva i le palotaga lenei se tasi o ou atali’i ma se tasi o lou aiga, e ao ina e fa’ailoa mai i le matou ofisa lea tulaga, a’o le’i o’o i le aso o le palotaga. E i ai le fesuia’iga e ao ina faia i lau galuega patino mo lea lava aso.”

Ina ua fesiligia po’o le mea e afaina ai le latou galuega, ae tali Meleisea, “E leai ae o le a tau fetu’una’i se isi fale palota i se isi afio’aga e le o tauva ai lou aiga, e te faigaluega ai.”

Na fesiligia fo’i le tulaga o mea taumafa e tapena mo le vasega o tagata faipalota i afio’aga ta’itasi. Na fa’ailoa manino e Meleisea, “E le o se mea lena e nafa ma outou, e le o fa’atulafonoina fo’i e fagaina le aufaipalota i so’o se fale palota, peita’i, afai e faia ona o le avafatafata ma le agaifanua a le tatou atunu’u e masani ai, ia faia ma le loto fiafia, ma ia le toe gugulu ai mulimuli.”

O le fautuaga sili ona fa’amamafaina i lea taeao i le folasaga a Meleisea sa ia toe tima’i mai ai i le vasega o pulenu’u ma leoleo nu’u, “Ia aloalo ese i tatou mai le tulaga o lou sapaia o se kemupeni, ia tumaoti la tatou tautua e tutusa tagata uma, ma ia tausolomua ia i tatou ona tausia le filemu i totonu o nu’u ma nofoaga o faia ai le palota.”

Peita’i, sa tula’i ane se tasi o pulenu’u ma ia fa’afesiligia, “Ou te fia iloa le mafuaga na aveesea fa’amalosi ai lo’u sui pulenu’u mai le matou fale palota i le palotaga na te’a. Ou te le’i faia se mea fa’aletonu pe fa’atupu vevesi, ae te’i lava a’u ua ave’esea fa’amalosi mai a’u mai le fale palota sa ou tiute ai.”

Na tali Meleisea e faapea, “Masalo o se fa’atonuga ma’oti mai le Ofisa o Palota ma lana pulega sa fa’atino ai lea tulaga ia te oe, ae tupu lava mea fa’apena, pe afai ua fa’atonuina mai e le Ofisa autu.”

O le mamao ua fa’amalosia nei mo ni fa’atosina mo sui tauva mai le fale palota, ua toe fa’ailoa mai e 100 futu, o lea tulaga e mataituina fo’i e pulen’u ma leoleo nu’u. Na fesiligia fo’i le le tofa ia Tuaolo pe aisea e eseese ai latou totogi na maua mo le aso o le palotaga tele, ae a faia se isi palota fa’apitoa mulmuli, ae o lo’o tutusa lelei itula sa latou leoleoina ai nei palotaga e lua?

Na tula’i le afioga le Komesina ma ia fa’apupula, “Ua mae’a i ai nei tulafono ua uma ona aiaia ai lea tulaga i luma o le kovana sili, mo lana saini pe leai fo’i, ae moni lelei, o se mea sa ia va’ai toto’a i ai, ina ua tula’i mai lea tofi.”

O se fesili e tusa o fale o lo’o faia ai palota i itumalo ma afio’aga, sa tula’i se tasi mai le itu palota i Sailele ma Masausi, ma ia fa’ailoa ai, “O le mea sa sau a’i le matou faigapalota, e fetogia’i le tulaga, o tausaga palota e lua nei, ua soso’o lava Masausi, ae ua tatau ona o’o mai ia Sailele e pei ona sau a’i. Aisea la ua faia ai lenei suiga?”

Na tali Meleisea, e leai ni tu’utu’uga fa’apena i faila a le Ofisa o Palota, e pasia lava e sui atofa o le Ofisa o Palotaga le nofoaga e tusa ai o aiaiga tamau mo ia nofoaga. Ae le fetogiai fa’apena le faiga o palota. E pule le Ofisa o Palota i le nofoaga e piki, ona ua pasia ma ausia uma mea o fa’atulaga mai, e pei o ala mo nofoa fa’ata’avalevale, o faleta’ele ia lelei, ma isi mea fa’apena.”

Ua mae’a fa’alauiloa, o le aso 9 Oketopa 2014, e amata ai le palota mo e fa’agasegasea i totonu o afio’aga ta’itasi, ma e ao i pulenu’u ona latou tu’ufa’atasia mai lisi o e gasegase tumau i o latou afio’aga ma fa’ao’o ane i le Ofisa o Palota mo latou galuega a’o le’i o’o mai lea aso o palotaga.

O le lisi fo’i o nofoaga uma ua atofa mo nu’u ta’itasi e faia ai le palota ua fa’apipi’ia lea i le Ofisa o Mataupu Tau Samoa mo le latou silafia.