Na fa’amatala e ni isi o le itumalo o Manu’a le va’a fou lea ua fa’atau e le malo na te tautuaina femalagaaiga i le va o motu o Manu’a, “o se auala lea ua tali mai ai le Atua i le pologa ma le oi ua tele tausaga o feagai ma le itumalo”.

O le taeao ananafi na faapaiaina ai le va’a fou o le Segaula lea na fa’atau mai e le malo i Amerika, mo le fa’amoemoe e fa’aaoga mo femalagaaiga i le va o motu o Manu’a.

O se sauniga lotu puupuu na taitaia e le susuga a Rev. Iasepi Ulu i luga o le uafu i Fagatogo, na tatala aloaia ai lenei fa’amoemoe, lea na fa’atumulia i ta’ita’i o le atunuu e aofia ai le malo, Fono Faitulafono faapea ai ma le Fa’amasinoga.

I le saunoaga autu mai le afioga i le ali kovana ia Lolo Matalasi Moliga, sa ia fa’aigoa ai le aso ananafi “o le aso o le seleselega, ina ua mafai e le malo ona fa’atino se tasi o vaega sa faananau i ai, o le fa’aleleia lea o auala o femalagaaiga mo le atunuu”.

“E pei ona tatou talanoa soo i ai i le tele o taimi, so o se mea e mafai ona atina’e ma fa’aleleia ai le atunu’u, o mea ia tatou te galulue fa’atasi e fa’ataunuu, ou te fa’afetai atu ai i le Fono Faitulafono ma le Fa’amasinoga, i lo tatou tutu fa’atasi e lagolago atina’e mo le atunu’u”, o se vaega lea o le saunoaga a le alii kovana.

“E tele naua galuega e manaomia le fia fa’aleleia mo le atunuu, aemaise lava i auala e fesoasoani ai i le itu tau atina’e e pei o femalagaaiga i le sami ma le ea, ae o lo tatou tutu fa’atasi e mafai ai ona fa’ataunu’uina nei galuega uma mo le manuia o Tutuila ma Manu’a”, o le isi lea saunoaga a Lolo.

O le afioga i le Fa’amasino Sili ia Michael Kruse na tuu i ai le fa’aaloalo na te tata’eina le niu ma ooti le lipine e faapaia ai le fa’aaogaina o le va’a, ma tatala ai loa totonu o le va’a mo maimoaga.

Na taua e le tofa a Leau Nevile o Ofu, Manu’a lona fiafia tele ina ua mafai ona maua se va’a e tautuaina le va o le Faletolu ma le Luanuu.

“O le tali lea mai le Atua i le tele o tausaga o pologa tagata Manu’a, ae fa’afetai ua mafai ona maua lenei fesoasoani mai le malo, o se fa’amanuiaga tele fo’i lea mo tagata Manu’a”, o le saunoaga lea a le tofa a Leau.

Saunoa le afioga i le alii Senatoa ia Galea’i M. Tuufuli e faafetaia le kovana ma le faigamalo, ona o le va’a ua tapena e le malo mo Manu’a.

Saunoa Galea’i e fa’apea, o le fa’atau ai e le malo o le va’a mo Manu’a, ua atagia mai ai le naunau o le malo e fa’aleleia atina’e mo Manu’a.

O le va’a o le Segaula na fausia e le kamupani fauva’a o le Armstrong Marine i Port Angeles, Washington i Amerika, e 36 le aofa’i o le pasese e mafai ona ave ai. O le konekarate mo le fausia o le va’a e sili atu ma le $800,000.