Ua talia e le afioga i le ali’i kovana ia Lolo Matalasi Moliga se talosaga sa tu’uina atu e ta’ita’i o le Fono Faitulafono, ina ia aofia i mataupu o lana Fono Fa’apitoa ua valaau ni isi o mataupu a le fono sa talanoaina i lana tauaofiaga lona fa lea na tapunia i le aso ananafi, ae e le i mautu i ai se finagalo o le Fono.

Na taua e le peresetene o le Senate ia Gaoteote Palaie Tofau i luma o le Senate i le vaiaso nei e fa’apea, ua mae’a ona tu’uina atu se talosaga i le alii kovana, ina ia aofia i mataupu o lana fono faapitoa ni isi “o mataupu taua a le fono” e le i maua i ai se finagalo o senatoa ma faipule, ina ia mautinoa e pasia i le taimi o le fono faapitoa.

E le i fa’aalia e Gaoteote i luma o le senate po o a ia mataupu taua ua fa’amoemoe e tatau ona talanoaina i le fono fa’apitoa.

I se fa’aaliga mai le alii kovana na tu’uina atu i luma o le Fono i le taeao ananafi, e le gata na fa’ailoa ai ni isi o mataupu fou ua toe fa’aopoopo i mataupu o lana fonotaga faapitoa, ae ua aofia ai fo’i ma mataupu a le fono e pei ona talosagaina, lea ua fa’aigoaina i mataupu o le fono fa’apitoa, “isi mataupu tuua”.

E fa’atele ona tu’uina atu talosaga a le maota maualuga i le maota o sui, mo se avanoa e faia ai sa latou faaiuga i ni isi o pili taua o lo o taoto i le latou maota e tatau ona pasia, ona o lea ua lata mai le taimi e tapunia ai le tauaofiaga a le fono faitulafono, ma o ni isi o ia mataupu e aofia ai le pili e fa’aopoopo ai le ta’i $10,000 i alauni a senatoa ma faipule.

Mai le tele o talosaga sa tuuina atu e le maota maualuga i afioga i faipule, e tapunia lava le tauaofiaga a le fono i le taeao ananafi e le i iloiloina e le maota o sui le pili e sii ai alauni a senatoa ma faipule lea ua pasia e le senate, faapea ai ma le pili e sii ai totogi o le kovana ma le lutena kovana lea o lo o fa’atali ai pea suiga a le maota o sui.

Na taua e le taitaifono o le Komiti o le Paketi a le maota o sui ia Timusa Tini Lam Yuen sa tuuina atu i ai le iloiloina o le pili tupe uma ia e lua, ina ua fesiligia e le Samoa News i le lua vaiaso talu ai e fa’apea, e i ai lona talitonuga e talafeagai ona sii totogi o le kovana ma le lutena kovana, peita’i e le talitonu lona taofi e tatau ona faaopoopo alauni a senatoa ma faipule.

Ina ua fa’atoa fa’aulu le pili e sii ai alauni a le fono ma faasalalau e le au tusitala, sa to’atele le atunu’u na fa’aalia o latou lagona tete’e fa’asaga i lenei tulafono, ma o ni isi o tagata palota ua latou fautuaina a latou faipule ina ia teena lea tulafono.

Na taua e le to’atele o le atunu’u sa valaau mai i le Samoa News e fa’apea, e fa’apefea ona naunau le Fono e sii le ta’i $10,000 i a latou alauni a o lea e pagatia le toatele o tagata faigaluega lima vaivai i le maualalo o totogi ae maualuga le tau o le soifuaga.

Na taua fo’i e le to’atele e fa’apea, o tupe o lo o tafili saunoa ai le fono faitulafono ma totogi ai le to’atele o tagata faigaluega konekarate e aunoa ma ni galuega o lo o faia, o tupe a tagata totogi lafoga, aua o le paketi a le fono faitulafono e 100% e fa’atupe mai i tupe lotoifale.