E talitonu le afioga i le alii kovana sili ia Lolo Matalasi Moliga, ua tele suiga lelei ua mafai ona faatinoina e le faigamalo talu ona tula’i mai i le ta’ita’iina o le atunuu mo le silia i le tausaga, e pei ona ia fa’ailoa i le fonotaga tu’usa’o mai Hawaii ma lana kapeneta i le vaiaso na te’a nei a’o lumana’i ai le fa’amanatuina o le fu’a a le atunu’u.

O ni isi o nei suiga tetele e pei ona saunoa Lolo, ua faailoa mai ai e le Failautusi o le Matagaluega o le Initeria lona fiafia tele i le tulaga o lo o faafoe ai le faigamalo a Amerika Samoa, e le gata i le tuuina atu o ripoti i le taimi talafeagai, ae ua mafai ai fo’i ona malamalama le Initeria i auala o lo o faaaoga i ai tupe fesoasoani mai le malo tele, atoa ai ma galuega tetele o lo o fa’atinoina i nei tupe fesoasoani.

Na toe faamanatu e Lolo i le kapeneta le autu o le manulauti na amata mai ai le la taumafaiga ma Lemanu i le taimi o le palota, o le ave lea o le faamuamua e tali ai manaoga o tagata o le atunuu, aua o iina o lo o faalagolago i ai le manuia o le malo.

Na faafetaia e Lolo faatonusili uma a le malo ua maea ona faataatitia a latou ta’iala mo lenei tausaga, aemaise ai o tulaga e faaleleia atili ai le auaunaga a le matagaluega mo le manuia o le atunuu lautele, peitai o faaiuga fai mo le manuia o le faigamalo, o faaiuga ia e faia e laua ma Lemanu.

“Ia outou silafia le kapeneta, o le faigamalo lenei e fau i lagona o maua ma le sui kovana, na mafua ona filifilia i maua e le atunuu, ia ma vaai toto’a i vaega taitasi o le malo, ma ia ma taumafai e fai ni suiga lelei mo le atunu’u,” o le isi lea saunoaga a le alii kovana,.

Sa ia saunoa fo’i e faapea, e tele naua suiga mo le manuia o le faigamalo ua la faia ma Lemanu, ma o lo o faaauau pea ona la faia lea tulaga e ala i la faaiuga fai.

“O lea o le a savalia le lua tausaga o le tatou nofoaiga, ma e foliga mai e i ai ni vaega o le malo e le o i ai ni suiga tetele o tutupu mai ai, o le mafuaaga lea ou te talosaga atu ai i ni isi o outou o sui o le kapeneta, aua nei afaina o outou finagalo pe afai ma te avatu ni tagata e galulue i totonu o lou ofisa, ona ma te mamatu, e tatau ona avatu lea tagata e fesoasoani i faaiuga fai aemaise ai o le unaia mai o ni suiga lelei mo le atunuu ma le faigamalo,” o le isi lea saunoaga a le alii kovana.

Sa ia fautuaina ni isi o sui o le kapeneta ina ia faaauau pea ona galulue faatasi mo le manuia o le faigamalo, aemaise ai taumafaiga ina ia faaleleia le tulaga o le soifua maloloina o le atunuu.

O se tasi o mataupu na taua e le alii kovana o lo o la taumafai malosi ai pea ma Lemanu e talosagaina ai se fesoasoani mai le malo tele, o le tupe a le Matagaluega o Leipa a le malo tele o Amerika, lea e pei ona latou faatonuina le malo o Amerika Samoa e toe totogi atu le $2.5 miliona, ona o tupe ua fa’aaoga ae le i faatagaina mai e le malo tele.

Saunoa Lolo e faapea, o tupe e pei ona toe talosaga le malo tele e toe totogi atu, o tupe ia e talitonu laua ma Lemanu sa sese ona faaaoga e faigamalo ua tuana’i, ae ua uma ona la ta’utino i le atunuu i le aso o le palota, afai la te tula’i mai, e tatau ona toe totogi tupe ia.

Pau le faanoanoaga o Lolo e pei ona ia taua i le kapeneta, e le gata e le o se mea na tupu i le taimi o le faigamalo a laua ma Lemanu lenei faaletonu, ae o le a avea ma auala e alu sese ai tupe a le malo e tau totogi ai lenei tupe, a o lea e taoto mai atina’e sa tatau ona ave i ai le fa’amuamua.

Na faaiu le saunoaga a le alii kovana i lona faafetaia lea o ni isi o faatonusili o lo o masani ona fautua atu ia te ia i auala e faaleleia ai le tautua a le faigamalo.

Saunoa Lolo e faapea, o le tulaga tonu lava lea e tatau ona taoto ai le faatinoina o le faigamalo, afai e lagona e se faatonusili e i ai se vaega e manaomia ona ia fautua ai i le kovana po o le lutena kovana, e tatau ona ia faia lena tulaga ina ia tulai mai ai ni suiga lelei i le galuega.

Sa ia taua e faapea, o lo o nofo tatalo pea ina ia lata mai se aso, e toe taliu mai ai i uto i fanua ma feiloa’i ma le atunu’u, ina ia mafai ai ona faaauau le tautua ma le auaunaga na mafua ai ona tofia o ia e le Atua e fai ma ta’ita’i o Tutuila ma Manu’a.