E ui o lo o tele pea fesili o lo o fia malamalama atili ai le Fono Faitulafono fa’apea ai le atunu’u lautele, i le malosi ma le malu puipuia o tupe a le atunu’u pe a fa’atula’i le Faletupe fou lea o lo o taumafai le tatala, peita’i na fa’ailoa e Keniseli Lafaele i luma o le Komiti o le Tupe Fa’asoasoa a le Senate i le vaiaso nei, e talitonu atoatoa le malo e manuia le atunu’u i le Faletupe o le Charter Bank lea o lo o galulue le malo e fa’atula’i.

E ui o lea ua mae’a le iloiloga a le Senate mo le fesiligia o le Komiti o le Pone a le malo i le Faletupe fou o lo o fuafua le malo e tatala, peita’i na taua e le afioga a Laolagi Fonoti Savali Vaeao o le ta’ita’i komiti le mana’omia pea o ni isi iloiloga i le lumana’i, mo le fa’amalamalamaina atili o le mataupu e fa’atatau i le faletupe fou lea.

Saunoa le afioga i le ali’i senatoa ia Magalei Logovi’i e fa’apea, e to’atele tagata o lona itumalo o lo o tu’u fesili i le malupuipuia o a latou meatotino pe a teu i le Charter Bank, pe afai e le o puipuia gaioiga a faletupe i lalo o tulafono mo Inisiua a le Feterale (Federal Deposit Insurance Corporation - FDIC).

O ni isi o uiga o tagata e pei ona saunoa Magalei, latou te le talia gofie se fuafuaga e taumafai le malo e fa’atula’i, pe afai e i ai ni vaega o ia fuafuaga latou te fesiligia pe le mautonu ai fo’i.

O se tasi o fesili na fa’atula’i e Magalei i sui o le komiti o le Pone i le taimi o le iloiloga, pe aisea lava ua manatu e aumai le ituaiga faletupe lenei i le teritori, o itu lelei ma le malosi e famaonia ai le lelei o le ituaiga faletupe lenei, ae o le a fo’i se silasila a le malo i a’afiaga o le atunu’u pe afai ae fa’aletonu lenei ituaiga faletupe.

Na manino i le saunoaga a Magalei lona lagolagoina o le fuafuaga a le malo e fa’atula’i le faletupe mo le atunu’u, peita’i o lona finagalo, afai o le mafua’aga atoa ua ala ai ona manatu le malo e fa’atula’i le faletupe lenei, tau o se auala e mafai ai ona maua se faletupe e sui tulaga i le faletupe o Hawai’i o le a tula’i ese, ona popole ai loa lea o lona mafaufau.

Na toe fa’apupula atili e Keniseli i le komiti le mea moni lea ua fetaia’i nei ma le atunu’u, e le gata e le toe suia le fa’aiuga a le faletupe o Hawai’i latou te tuua le atunu’u, ae ua fa’atapula’a fo’i auaunaga o lo o ofo mai e le faletupe o le ANZ Bank i le atunu’u i le taimi nei.

“Afai o mea moni ua tatou vaaia i le taimi nei i le tautua fa’a faletupe, e le o mautinoa fo’i se tulaga o le Community Bank, o le a la le isi gaioiga e tatau ona fai e le malo”?, o le fesili lea a Keniseli i le komiti.

“Pau lava lea o le gaioiga e mafai e le malo ona faia, o le fa’atula’i o le Charter Bank”, o le isi lea saunoaga a Keniseli, ma ia fautuaina ai afioga i senatoa ina ia lava le fa’atuatua i le Atua, e mafai ona fesoasoani mai i taumafaiga a le malo, ae afai latou te silafia ni isi auala e mafai ona fesoasoani ai i taumafaiga a le malo, ona fa’ailoa atu lea.

Na soisoi Magalei ma toe saunoa e fa’apea, o le tali fo’i lea a sui o le Community Bank ina ua fesiligia e le Senate i le tausaga ua te’a, po o fea e aumai ai le tupe e fa’aatoa ai le $10 miliona o lo o latou mana’omia e amata ai le faletupe, ae o le latou tali, ‘ia lava le fa’atuatua i le Atua’.

E le i faia lava se finagalo a le maota maualuga e tusa ai o le pili sa talosagaina e le ali’i kovana, e fa’atula’i ai se faletupe fou i le atunu’u i lalo o le fa’atautaiga a le malo.