Talosaga fa’atonusili Ofisa Tagata Faigaluega o le malo e galulue fa’atasi
I le fonotaga mulimuli o lenei tausaga a le afioga i le kovana ia Lolo Matalasi Moliga ma lana kapitena sa talosagaina ai e le fa’atonusili o le Matagaluega o Tagata Faigaluega a le malo, le faletua ia Eseneiaso Liu, le kapineta ina ia galulue fa’atasi ma lona ofisa e aloaia ta’iala i le tulaga o tagata faigaluega.
O le fonotga sa faia i le Fale Laumei i Utulei i le vaiaso ua te’a ma sa tuuina atu ai le avanoa i sui uma o le kapineta mo a latou saunoaga fa’apitoa. Ua le gata i le afioga i le kovana sa auai i lea fonotaga, ae fa’apea foi le afioga i le Lutena Kovana, Lemanu Palepoi Sialega Mauga, fa’atasi ai ma nisi o fa’auluuluga o le malo.
I le saunoaga a Liu, sa ia muamua ona fa’afetaia le kovana ma le lutena kovana ona o le onosai i le tulaga o galuega ta’ita’i o le malo.
O le isi vaega o le fa’afetai, e pei ona saunoa ai Liu, o le fa’afetai lea i fa’aulu’uluga o matagaluega ma ofisa o le malo, “o e o lo’o fa’autagia pea ta’iala e fa’atautaia ai tagata faigaluega. Ou te fa’afetai foi ia i latou, e le o fa’autagia mai ta’iala.”
Saunoa Liu e fa’apea, “o le tele o mea o lo’o alu i le Ofisa o le Kovana, masalo e laititi le faa-lima ona valaau mai ‘au i luga o le Ofisa o le Kovana, ona o tulaga ia. Fa’amolemole tatou galulue fa’atasi. O mai tatou galulue fa’atasi aua se ‘ai mo tagata faigaluega.”
O le tasi vaega o le fa’afetai, “oute fa’afetai tele atu i si o tatou atunu’u i lo outou onosa’i, i le tulaga o le sailiga o galuega,” o a Liu lea. “O le agaga lava ina ia tele [avanoa faigaluega], ae o le fa’alavelave e le talafeaga’i foi ma le tamaoaiga.”
Sa toe fa’afetaia foi e Liu le kovana ona o tulaga i mea o lo’o i ai nei, e pei o le fa’atauaina o tagata matututa, fa’atauaina o tupulaga, ma le fa’atauaina o tagata faigaluega. “E pei ona outou silafia, o lea ua tatala le Youth Academy, aua lava tupulaga talavou e le o maua ni a latou galuega,” o le saunoaga lea a Liu, i lenei Academy io lo’o i lalo o le vaiga a le Matagaluega o Tupulaga, Tina ma Tamaita’i (DYWA).
O le Academy sa tatala aloaia i le lua vaiaso talu ai ma ua talosagaina foi e le DYWA vaega uma o le malo o lo’o i ai avanoa faigaluega ina ia logoina au le DYWA mo i latou i lo’o i lalo o le Academy.
O se isi vaega o le saunoaga a Liu sa ia fa’amalulu atu ai i so’o se tasi, ua le mafai ona maua siitaga o totogi a tagata faigaleuga ona o le tulaga lava o mea tau tupe, faapea foi tulaga o ta’iala o lo’o i ai. “Malu ave i fale o outou finagalo, aua e tatou te manana’o uma lava i ai, ae i ai lava tapula’a o mea e tatau ona tatou o’o i ai,” o a Liu lea.
“Ae o sa matou talosaga vaivai a le matou ofisa, e mana’omia ona tatou galulue fa’atasi. O a lava fuafuaga o lo’o fa’ata’atia mo le lumana’i, ia atonu o le tausaga fou 2018, tatou galulue fa’atasi ina ia tatou maua ta’iala ma faataunu’uina fuafuaga pe a tusa ai ma le finagalo o le Atua,” o toe upu ia a Liu i le fonotaga a le kapineta ma ia fa’amanuia ai le Kerisimasi ma le Tausaga Fou ia Lolo ma Lemanu, ae maise sui o le kapineta ma le mamalu lautele o le atunu’u.