Ads by Google Ads by Google

Talosaga Galea’i pulega LBJ aua tapunia Primay Care Clinic

Na fa’amaonia e le Foma’i Sili o le LBJ ia Dr. Iotamo Saleapaga i luma o le Komiti o le Soifua Maloloina a le Senate i le vaiaso na te’an nei, o lo o tumau pea le tatalaina o le tautua a le vaega o le Primary Care Clinic (PCC) i le falema’i i Fagaalu, pau suiga ua i ai, ua tuu atu le vaavaaia o le vaega taua i lalo o le Medical Clinic.

 

O lea saunoaga mai le ali’i foma’i o lana tali atu lea i se talosaga sa tuuina atu e le afioga i le ali’i senatoa mai Manu’a ia Galea’i M. Tu’ufuli, ina ia fa’aauau pea le auaunaga a le PCC ae aua le tapunia e pei ona fuafuaina e le falema’i.

 

“E taua tele le tautua a le Primary Care i gasegase matutua e aofia ai a’u, e le tau fa’atali i luma o le ER mo se taimi umi pe a fia vaai le foma’i, ae faigofie lava ona afe atu ma fa’aaoga le tautua a le Primary Care i le tele o taimi e mana’omia ai,” o le saunoaga lea a Galea’i.

 

Na fa’ailoa e Galea’i i sui o le LBJ i le taimi o le iloiloga, o le to’atele o afioga i senatoa sa le i fiafia ina ua fa’alauiloa sa latou fuafuaga i se taimi e le i mamao atu, o le a tapunia le tautua a le PCC mo le atunuu.

 

“E le sa’o lea tulaga o le manaomia e le atunuu o le tautua a foma’i mo le vaavaaia o lo latou soifua maloloina, ae fautua mai outou e tapuni le PCC, o isi na lala o le falema’i e mafai ona aga’i i ai le atunuu, e lelei e le umi se taimi e fa’atalitali ai mo se foma’i,” o le isi lea sanoaga a Galea’i.

 

Na vave ona toe faauilavea le taitaifono o le Komiti Fa’afoe a le LBJ ia Leilua Mase Akapo ma ia faaluaina le saunoaga a le ali’i foma’i sili, e le o tapunia le tautua a le PCC.

 

“Matou te le i aloaia le fautuaga sa tuuina mai ina ia tapunia le Primary Care, sa matou vaavaai toto’a i fautuaga uma sa tuuina atu e a outou afioga faapea ai le maota o sui ina ua tatou talanoa i le mataupu lenei i le taimi muamua, ma manatu ai loa e saili se isi auala e faaauau ai pea lea tautua taua mo le atunuu,” o le saunoaga lea a Leilua.

 

Na faamanino atili e Leilua e faapea, o lo o tumau pea le aga’i atu o le atunuu i le potu mo gasegase tigaina e vaai ai le foma’i, ae o gasegase uma e le o i ai i se tulaga tigaina, o i latou na e tofia e aga’i atu e vaai le PCC mo le vaaia o le foma’i po o le faia fo’i o isi talavai o lo o manaomia.