Na taua e le tofa Leilua Mase Akapo i luma o le komiti o le Soifua Maloloina a le Senate i le vaiaso na te’a nei, le tele o le taua ma le aoga o lo o mafai ona maua mai e le polokalame o gasegase e ave i fafo mo togafitiga, mai le lafoga o totogi e 2% na pasia atu e le Fono e fesoasoani ai i le tautua a le falema’i o le LBJ i Fagaalu.

I le fa’aiuga o le molimau a le Ta’ita’ifono o le Komiti Fa’afoe a le LBJ, o ia fo’i lea o le Pulesili le tumau o lo o i ai nei, sa ia talosagaina ai loa le maota maualuga ina ia alofagia le lafoga o totogi e 2%  ina ia fa’aauau pea e fesoasoani ai i le auina atu o gasegase i fafo.

O le afioga i le alii senatoa ia LeAtualevao Asifoa na ia lagaina le mataupu i gasegase o lo o ave i fafo mo togafitiga, pe aisea e le maua mai ai se fesoasoani mai le kamupani va’alele a le Hawaiian Air e pei o le fa’apau i lalo o pasese, aua o lo o to’atele lava gasegase o le atunu’u o lo o la’u i fafo mo togafitiga, o le isi fo’i lea tupe fa’aopopo mo le kamupani va’alele.

Na taua e LeAtualevao e fa’apea, o le tupe o lo o maua mai e le falema’i mai le 2% i le tausaga atoa, e le o se tupe laititi, ae na mafua fo’i ona naunau le fono e pasia le lafoga mo le falema’i, ina ia fesoasoani ai i le fa’afitauli tau tupe ua tele tausaga o lo o fetaia’i ma le falema’i, aemaise ai gasegase e fia ave i fafo.

“Ae afai o lea ua outou naunau e fa’aitiitia totogi o pili a le falema’i, lona uiga o le a a’afia atu ai fo’i ma le tupe lea sa maua mai e le falema’i i le lafoga o totogi e 2%”, o le saunoaga lea a le ali’i senatoa.

“O le fa’afitauli lava lenei na matou fa’alogologo mai ai i tua i le tele o tausaga ua mavae o fetaia’i pea ma le falema’i, o le to’atele o tagata mama’i ae leai se tupe e ave ai i fafo, lea fo’i la ua maua mai le lafoga o totogi e 2% mo le falema’i, ao lea ua outou manatu e tuu i lalo pili o lo o maua mai ai isi tupe, lona uiga o le a aafia atu ai ma le tupe o lo o maua mai i le lafoga lenei”, o le atugaluga lea a le ali’i senatoa sa fa’ailoa i le komiti fa’afoe.

Na umi se taimi o tau faamanino e le alii senatoa i ana fuainumera fa’aopoopo le aofa’i atoa o le tupe e maua mai i le lafoga e 2%, ma le tupe e tatau ona maua e le falema’i, ona ia fesili lea i le komiti pe to’afia le aofa’i o gasegase o lo o auina atu i fafo i le masina e tasi mo togafitiga, ae na fa’ailoa i ai e Leilua, e i le va o le 40-50 i le masina le aofa’i o tagata gasegase o lo o auina atu i fafo mo togafitiga.

Na maofa e ali’i senatoa i le laititi o le numera o tagata gasegase o lo o ave i fafo i le masina, pe a faatusatusa i le tupe o lo o maua mai i le lafoga e 2%, ona ia manatu lea, “e fai lava si tele o le tupe o lo o maua e le falema’i mai le lafoga e 2%”, peita’i na fa’ailoa i ai e Leilua e fa’apea, e le na o le tagata gasegase o lo o totogi e le falema’i mai le tupe lenei, ae o lo o totogi ai fo’i ma pasese o le sui o le aiga e to’alua ma le gasegase, atoa ai ma le pasese o le foma’i ma le teine tausi ma’i e malaga ma le gasegase.

Na fa’amanino e Leilua e fa’apea, so o se taimi lava e malaga ai se gasegase, e le misia lava le alu ai ma le tagata o lona aiga la te to’alua, ae afai o se gasegase tigaina e mana’omia ai se foma’i ma se teine tausima’i, lona uiga e totogi uma fo’i e le polokalame pasese o le foma’i ma le teine tausima’i, atoa ai ma le faletalimalo e nonofo ai.

“Afai fo’i o le gasegase e le mafai ona savali, e totogi atu ai fo’i ma le ta’avale Ambulance na te pikiina mai le gasegase mai le malae va’alele ma momoli i le falema’i ua fuafua e taoto ai, lona uiga e uma ane lava nei feuiaiga uma ua alu atoa uma ai le tupe o lo o maua mai i le lafoga e 2% mo gasegase o lo o la’u i fafo, ae leai ai se fesoasoani mo le falema’i”, o le saunoaga lea a Mase e tau fa’amanino ai le mataupu.

O le talosaga a le komiti faafoe o le LBJ ina ia fa’aauau pea le lafoga o totogi e 2%, na faavae mai lea i ni isi o saunoaga mai afioga i senatoa i le taimi o le iloiloga, i le ono i ai lea o se lagona latou te lagolagoina ai le pili lea ua fa’aulu e le maota o sui e taofi ai le lafoga, ona o lea e naunau atu le fono e saili alaga tupe eseese e fesoasoani ai i le falema’i, ao lea ua manatu le falema’i e fa’aitiitia totogi o ana tautua.

O le vaiaso nei lea ua fa’atulaga e faia ai le iloiloga a le komiti o le Sailiga o le Tamaoaiga a le maota o sui, e talanoaina ai se pili sa fa’aulu i le amataga o le tausaga nei i le maota o sui, e talosagaina ai le fa’amuta o le lafoga.