E lua ni feau taua ua finagalo le Faatonusili o le Ofisa o Fa’atoaga e momoli mai i le aufai fa’atoaga uma a le atunu’u, ae fa’apitoa lava ia i latou o lo o fa’asea ma muimui i le tuai lea ona maua fa’ailoga o le Farm Fair, “e le gata ia lava le loto onosa’i, a ia fiafia fo'i o le vaiaso fou lea ua fuafua le Ofisa e maua ai a outou siaki ma fa’ailoga Farm Fair o lo o vavao ai le to'atele”.

O le saunoaga lea a le afioga ia Lealao, na tu’uina mai ina ua toe fesiligia e le Samoa News o ia ananafi, i se tulaga ua o o i ai le faamoemoe a lona ofisa, mo le tufatufaina lea o fa’ailoga o le Farm Fair a le aufai fa’atoaga, lea o lo o to’atele ni isi o le aufai fa’atoaga o lo o tomumumu ma muimui ai, i le tuai lea ona tufa o fa’ailoga, aemaise ai o le leai lea o se fa’asootaiga a le Ofisa o Fa’atoaga ma le aufai fa’atoaga, i le taimi sa’o e tufa ai fa’ailoga.

Na taua e ni isi o le aufai fa’atoaga i le Samoa News i le aso ananafi, afai loa e o o atu i le aso Gafua o le vaiaso fou e le maua atu lava se tali mautu mai le Ofisa o Fa’atoaga, o le a latou vaavaai loa i le tu’uina atu o se latou talosaga i le ali’i kovana, po o le fai loa fo’i o se solo tete’e fa’asaga ia Lealao ma lona Ofisa.

O ni isi o le aufai fa’atoaga ua latou fa’aalia lagona musu e toe fia auai i ni isi Farm Fair i le lumana’i, pe afai o le tulaga fa’aletonu lea o le a alia’e mai pea.

“Afai o le faiga lea o isi Farm Fair o lo o mulimuli mai, e sili ai loa pe a taatia, e le toe fia auai ni isi i ni polokalame e na o le pologa ma le gau e maua ai, ae fa’atamala le malo i le tu’uina mai o fa’ailoga mo le aufai fa’atoaga”, o le saunoaga lea a le susuga a Tanuvasa Mauga, o se tasi o ali’i fai faatoaga a le atunuu.

Na taua e ni isi o le aufai fa’atoaga e fa’apea, e tatau i le Ofisa o Fa’atoaga ona latou tausisi i le manulauti sa fa’atulai e le ali’i kovana ia Lolo Matalasi Moliga ma lana faigamalo, o le fa’amuamua lea o tagata i so o se taimi.

“O le lagona o le  alii kovana ma le faigamalo, e le tatau ona faatuatuana’i le malo i tagata lautele, ae tatau ona ave i ai le fa’amuamua, e tatau fo’i la i le Ofisa o Fa’atoaga ona ave le latou fa’amuamua i tagata lautele, o le aufai fa’atoaga lea”, o le manatu lea a le tina o Mareta Ifopo.

O le itu o lo o pito sili ona le fiafia ai ni isi o le aufai fa’atoaga o lo o fa’asea, o le tele o le latou gau i le aso o le Farm Fair, ina ua tau fai tufa fua uma fua o a latou fa’aeleeleaga i le aso o le Farm Fair, a o lenei ua fiu e tulituli fa’ailoga sa polomisi le Ofisa o Fa’atoaga e vave maua ae ua leai se mea e maua.

Ina ua fesiligia le afioga a Lealao i le aoauli ananafi i sona finagalo, sa ia fa’aalia ai lona fa’anoanoa tele i ni isi o le aufai fa’atoaga o lo o fa’asea ma muimui, ae ua le onosa’i ma fa’atalitali e le faigofie le galuega o lo o taumafai i ai le Ofisa.

“E lagona le fa’anoanoa i le aufai fa’atoaga o lo o faia le galuega o le fa’asea ma le muimui, ae ua le nonofo tatalo ma onosa’i, e le faigofie le galuega sa matou alo atu i ai, o le tau tu’ufaatasia lea o togi mo le fa’amoemoe, ina ia mautinoa e tofutofu sia uma i latou ma ni fa’ailoga mo le Kerisimasi”, o le saunoaga leaa Lealao.

Saunoa Lealao e fa’apea, o se tasi o itu lelei o le fuafuaga lea ua faia mo le tufatufaina o siaki i le vaiaso fou, e fetaui lelei ai lava nai meaalofa laiti ia mo le aufai fa’atoaga i le kerisimasi ma le tausaga fou ua latalata mai.

“O le taimi nei, ua mae’a ona tu’uina atu siaki mo le aufai fa’atoaga uma ua lautogia i luga o le Ofisa o Tupe a le malo, mo le sainia o siaki ma fa’agaioi vaega uma e mana’omia, ma fuafua ai loa le tufatufaina atu o fa’ailoga i le amataga o le vaiaso fou”, o le saunoaga lea a Lealao.

O lo o i ai le fa’amoemoe a le ali’i Fa’atonu, o le a logo aloaia le aufai fa’atoaga i le taimi e mae’a ai ona saunia uma siaki, ina ia aga’i fa’atasi uma atu i le Ofisa o Fa’atoaga i Tafuna e tufatufa ai a latou fa’ailoga.

Na taua atili e Lealao e faapea, o se tasi o itu lelei i le tuai lea ona tufa faailoga a le aufai faatoaga, o lea ua mafai ai ona maua ni nai meaalofa mo i latou mo le kerisimasi.

Sa ia taua fo’i le leai o se manatu a lona ofisa e faatuatuana’i pe manatu mama i le aufai fa’atoaga a le atunu’u, aua o i latou tonu ia o lo o tua i ai le fofoga taumafa o le atunu’u, faapea ai fo’i le fofoga taumafa a le fanau aoga.

E pei ona maitauina suiga o le polokalame i lenei tausaga, ua a’e se manatu e taofi le toe tufatufaina atu o fa’ailoga i mea faigaluega e pei ona faia i isi Farm Fair ua mavae atu, ae ua manatu le Ofisa ma le malo e sili pe a tufatufa atu faailoga tupe mo le aufai faatoaga, ina ia mafai ai fo’i ona fesoasoani fa’ailoga tupe i manaoga o lo o tutupu mai i totonu o aiga o nai fai faatoaga.

“E le faigofie le galuega sa alo atu i ai le komiti ma faamasino, e manaomia le tatau lea ona mae’a lelei ona iloilo togi o vaega taitasi, ina ia taofia ai le tula’i mai o ni fa’asea i le taimi mulimuli”, o le saunoaga lea a Lealao.