E talitonu ni isi o le atunu’u o lo o alala ma papaao i le itumalo o Manu’a, ua tatau ona si’itia le tautua  a le Matagaluega o le Soifua Maloloina mo Manu’a, ina ia taofia ai le toe tula’i mai o fa’aletonu na tutupu muamua i le fale maliu, lea o lo o teuina ai tino o i latou e pele i loto ma agaga ua maliliu.

Na taua e Talu Mapu i se talanoaga ma le Samoa News i le aso Sa na te’a nei mai Manu’a e fa’apea, o le fa’afitauli lea o lo o tula’i mai i le Fale maliu i Ta’u, e tele vaega e le o lelei e pei o le leai lea o se tagata e i ai le agava’a fa’apitoa e tausia ma vaaia le fale maliu.

“E le talanoa le tagata ma le finagalo o le Atua i le malaga a le oti, ae afai la e tula’i mai i se taimi fa’afuase’i se maliu, o fea o le a ave e teu ai pe afai e fa’aauau pea ona fa’aletonu le aisa o lo o teu ai maliu i le falema’i”, o le saunoaga lea a Mapu.

Na taua e Mapu e fa’apea, ua tatau ona i ai se fuafuaga a le Soifua Maloloina e aveese mai le fale maliu mai le nofoaga o lo o i ai, ae fausia se nofoaga fou e faigofie ona maua ai auaunaga, toe latalata i nofoaga mo femalagaaiga.

E le i toe fia manatua e le molimau le fa’afitauli lea na tula’i mai i fale maliu i se taimi e le i mamao atu, lea na malaga atu ai le va’a Leoleo e aumai le tino maliu na semanu e fa’aletonu i totonu o le pusa aisa, ina ua fa’aletonu le pusa aisa ae o lo o tau fai fa’aletonu uma le MV Sili ma le va’alele o le Inter Island o lo o tautuaina le motu o Manu’a i le taimi e tasi.

E le na o le susuga a Mapu ua ia talosagaina le fa’aleleia o le fale maliu i Ta’u, ae fa’apena fo’i i le afioga i le komesina o leoleo ia William Haleck, ina ua talosagaina e le ofisa o le kovana le fesoasoani a le Ofisa o Leoleo, mo le va’a a le Marine Patrol e malaga atu mo le a umaia o se tino maliu i Ta’u i le masina o Aperila na te’a nei.

E ui sa mafai ona tali atu le Matagaluega o Leoleo e tusa ai o lea valaau, peitai na taua e Haleck i le Samoa News e fa’apea, e le tatau ona nofoa’i le matagaluega i le fa’aletonu o lo o tula’i mai, ae ua tatau loa ona fai se fuafuaga e toe fa’aleleia ai le pusa aisa o le fale maliu i Ta’u, manu e le i toe tula’i mai fo’i se isi fa’aletonu fa’apea i le lumana’i.

Ina ua fesiligia le afioga i le Fa’atonusili o le Matagaluega o le Soifua Maloloina e tusa ai o lea tulaga, sa ia taua ai e fa’apea, ua i ai fuafuaga ua uma ona fa’ataoto e le Matagaluega mo le fa’aleleia o le latou tautua e pei ona fesiligia mo Manu’a.

Na taua e Motusa T. Nua e fa’apea, o ni isi o lu’itau o lo o feagai ma le matagaluega mo le fale maliu i Ta’u, e aofia ai le leai o se tagata e i ai le tomai fa’apitoa na te tausia ma vaaia le fale maliu, e le o lelei fo’i ma malosi le ola a le pusa aisa i taimi e teu ai i totonu tino maliliu.

Sa ia taua e fa’apea, na pau le umi e mafai ai ona teu se tino maliu i totonu o le pusa aisa pe a ma le lua i le tolu po, ae a umi atu loa lona uiga ua manogi leaga, lona uiga o le taimi lava e maliu ai se tagata i Manu’a, e tatau ona auina mai i le falema’i i Fagaalu e taoto ai pe a tuana’i po e lua e taoto ai i le pusa aisa i Tau.

O le taimi nei e pei ona saunoa le ali’i fa’atonusili, o lo o taumafai pea lona ofisa e fa’amautu fuafuaga ina ia mafai ai ona foia lea fa’afitauli o lo o feagai ma tagata Manu’a.