Ua tu’uina atu nei e le Komesina o le Ofisa o Palota ia Tuaolo Manaia Fruen sana talosaga i luma o le Vaega Apili o le Fa’amasinoga Maualuga, e talosagaina ai le fa’amasinoga ina ia solofua le tagi ua fa’aulu e Sua Lucia Bartley fa’asaga i le afioga i le tama’ita’i faipule ia Vui Florence Vaili Saulo.

O le tamaitai loia ia Gwen Tauiliili-Langkilde o lo o tula’i mo le Ofisa o Palota i lenei mataupu.

I se vaega o le talosaga a le Ofisa o Palota o lo o taua ai e fa’apea, o le aso 2 Setema 2014 na faia ai e le Komesina o Palota le fa’aiuga, ua agava’a le afioga a Vui e tauva i le palota tele o lo o loma ia Novema 4, 2014 mo le Itumalo #15 i le maota o sui, i le mae’a ai lea ona ausia e Vui o vaega uma sa manaomia mo le palota, peita’i na finauina e le susuga a Su’a le fa’amasinoga ina ia iloilo le fa’aiuga ua faia e le Ofisa o Palota.

Na taua i le talosaga a le ofisa o palota e fa’apea, o le fa’alua ai lea ona tofu atu i luma o le fa’amasinoga le mataupu lenei fa’asaga ia Vui ma ni isi o sui tauva mai le itumalo o Tualauta.

I le 2012, na faila ai fo’i e ni sui tauva se to’alua sa lei fa’amanuiaina i le palota le tagi lava lenei i luma o le fa’amasinoga, le susuga ia Su’a ma Esther Walls, ma la finauina ai e fa’apea, e le agava’a Vui mai le avea ma sui o le itumalo, e mafua mai ina ua ia le tuuina atu le kopi o lona pepa fanau e faamaonia ai o ia o se Nesionale o le Iunaite Setete.

Na faia e le fa’amasinoga lana faaiuga i le 2012 e teena ai le talosaga, ona o le tuai o le taimi na faila atu ai le talosaga i luma o le fa’amasinoga.

Na taua foi e le faamasinoga i se vaega o lana faaiuga e faapea, o le tiute tauave lea a le Maota o Sui ae le o le fa’amasinoga, o le iloilo lea ma vaavaai le sui ua filifilia e fai ma sui o le itumalo, pe talafeagai ona ia nofoia le nofoa o le itumalo #15 e tusa ai ma ala o le tulafono.

I le aso 2 Setema, ina ua tapunia tusi talosaga mo sui tauva uma e fia tauva mo le palota o lo o loma nei, na faia ai e le komesina o palota le faaiuga, e aloaia ai ma agavaa ia Vui e avea ma sui tauva mo le itumalo o Tualauta i le faiga palota ia Novema 4.

O le aso 5 Setema na faila ai e Su’a ma Esther Fiatoa se talosaga, e finauina ai le agavaa o Vui e avea ma sui tauva mo le itumalo #15, ona o lona pepa fanau e le o tusa ma ala o tulafono tau palota, o le talosaga tete’e lava fo’i lea o lea ua toe faila mai i le taimi nei.

Na taua e le Ofisa o Palota e fa’apea, sa faia se latou suesuega e uiga i lenei mataupu, ma faia ai loa le faaiuga, e agavaa Vui e avea o se sui tauva mo le palota o lo o loma nei, ina ua ia ausia manaoga o le tulafono, e ala i lona faailoa mai i le Ofisa o Palota, o ia o le Nesionale o le Iunaite Setete.

Sa tuuina atu faatasi e le Ofisa o palota lana talosaga i le faamasinoga, faatasi ai ma kopi o le tusi folau a Vui e lagolago ai le faaiuga, ina ia faaleaoga le tagi a Su’a fa’asaga ia Vui, lea o lo o fa’ailoa mai ai i le pito i tua o le tusi folau, o Vui o se Nesionale a le Iunaite Setete.

I le aso 10 Setema e pei ona taua i le talosaga a le Ofisa o Palota, na faila ai loa e Su’a lana talosaga i luma o le fa’amasinoga, lea ua mafua ai loa ona tula’i mai lenei mataupu.

Na taua foi i le talosaga a le Ofisa o Palota, le maua o le avanoa a loia mo le sui o lo o tagi, e silasila ma iloilo ai pepa faamaonia e faailoa ai le agavaa o Vui e avea ma sui tauva o le palota.

Ae o lo’o finau pea Su’a, e le i faamaninoina e le komesina o palota mau faamaonia e faailoa ai le agava’a o Vui e avea ma sui tauva o le palota.

Na faamanino atili e le ofisa palota e faapea, o le faaalia e Vui o le kopi o lona tusi folau, ua lava lea e fa’ailoa mai ai le agava’a o ia e avea ma sui tauva o le palota, aua o lo o taua i totonu o le tusi folau, o ia o se “Nesionale o le Iunaite Setete”, po o se tagata lea sa soifua i totonu o le Iunaite Setete po o teritori e aofia ai Amerika Samoa ma Swains Island.

E talitonu le ofisa o palota, ua lava ma totoe le kopi o le tusi folau e fa’amaonia mai ai o Vui o le Nesionale o le Iunaite Setete, o iina foi lea na faavae ai le faaiuga a le komesina o palota, ina ia tusa ai ma tulafono tau palota, ua agava’a Vui e avea ma sui tauva o le Itumalo #15 mo le palota o lo o loma nei.

Ona o faamaumauga uma e pei ona taua i luga, ua talosagaina ai e le Komesina o Palota le fa’amasinoga ina ia teena le talosaga a Su’a.

O le aso 2 Oketopa lea ua fa’atulaga e le Vaega o Apili e fofogaina ai lenei mataupu i luma o le Fa’amasinoga Maualuga a Amerika Samoa.