Ua taoto atu nei i se fa’aiuga a le Vaega Iloilo o le Fa’amasinoga Maualuga le talosaga na fa’aulu e Fa’asaina Park, tauala atu i lana loia fautua ia Fiti Sunia, e talosagaina ai le fa’amasinoga ina ia fa’ata’atia ese le fa’aiuga sa tu’uina mai e le vaega iloiloga, e pei ona ta’usala ai o ia i le solitulafono o le taumafai e fa’alauiloa faiga faatalitane i le tulaga lua.

Na siitia e Park vaega o le tulafono o lo o fa’amanino mai ai elemeni o le solitulafono o le taumafai e fa’alauiloa faiga fa’atalitane i le tulaga lua, e pei o le fesoasoani lea i se tagata e fa’atino faiga fa’atalitane, o le maua lea o se taui mai le fesoasoani i faiga fa’atalitane, atoa ai ma le faia o gaioiga e pei o feusuaiga po o le tagofia lea o itutinosa o se tama’ita’i, ina ia fa’amalie ai lagona tu’i nanau.

Na taua atili e Park ma lana loia e fa’apea, i mau sa tu’uina atu e le malo i luma o le fa’amasinoga ina ua iloiloina lenei mataupu, e le o mafai ai ona lagolagoina elemeni o lenei solitulafono.

O lo o taua fo’i e fa’apea, e tatau ona to’alua tagata e aofia i le fa’alauiloaina o faiga fa’atalitane, peita’i o mau sa tu’uina atu i luma o le fa’amasinoga, e le o mafai ona lagolagoina ai elemeni o le tulafono.

O gaioiga faatalitane e pei ona taua e le itu tete’e, o lo o taua ai le faia o gaioiga fa’afeusuaiga ma le fa’amoemoe e maua mai ai se taui, peita’i i le molimau a Mele e pei ona taua e Park ma lana loia, sa ia taua ai lona vaaia o Iuliana ma lana uo tama o lo o faia ni a la gaioiga e atagia mai ai le faia o uiga fa’afeusuaiga.

Na taua fo’i e le itu tete’e e fa’apea, e ui i le tele o fagupia sa inu e Mele i le po, ae le i fa’atasi ona a’afia o ia i ni faiga fa’atalitane, se’i vagana ai lava Iuliana sa ia vaaia o ato atu i le itutinosa o lana uo tama.

E lua fo’i isi mataupu na taua e Mele ma Iuliana i le la molimau, sa la taua ai lo la vaaia o isi tagata faigaluega o aafia i gaioiga fa’afeusuaiga e pei o le tagofia lea o latou itutinosa e ni isi o tagata sa tafafao atu i le Pa pia i lea po, peita’i e leai ma se taimi na maua ai e i latou nei ni taui tupe e tusa ai o nei gaioiga sa latou faia.

Na taua e Sunia e fa’apea, e molimau e faapea sa o Mele ma Iuliana e vaai a laua uo tama, e talitonu le itu tete’e, e le i aofia ai Fa’asaina Park i lea gaioiga, ae o gaioiga lava sa faia e Mele ma Iuliana mo laua lava, sa la fa’atinoina fo’i nei gaioiga i tua atu o le taimi faigaluega ma fafo atu o le nofoaga o lo o i ai le pisinisi a le ua molia, le Pa Pia o le Karaoke Bar i Satala.

Ae na finau le loia a le malo ia Jessica Bargman i luma o le fa’amasinoga i le aso Faraile na te’a nei e fa’apea, o lo o lava ma totoe maua sa tu’uina atu i luma o le vaega iloilo iuga e lagolago ai tu’uaiga fa’asaga ia Park, i lona aofia lea i le fa’alauiloaina o gaioiga fa’atalitane.

Na taua e le malo e fa’apea, e tusa ai ma molimau sa tu’uina atu e tama’ita’i e to’alua na a’afia i luma o le vaega iloilo iuga, sa manino ai le fa’atonu e Park o lana aufaigaluega i taimi o a latou fonotaga, ina ia faia gaioiga uma e fa’atosina mai ai tagata e aga’i atu e tafafao i le fale kalapu, e pei o le faia o gaioiga faafeusuaiga atoa ai ma le tauanau i latou e fa’aalu uma a latou tupe i totonu o le fale kalapu.

I le fa’aiuga o le folasaga a le itu a le malo e tusa ai o lenei mataupu, na fautuaina ai loa e le ali’i fa’amasino sili ia Michael Kruse le tama’ita’i loia ia Bargmann ina ia tu’uina atu sana fa’afinauga tusitusia i luma o le fa’amasinoga se’i silasila i ai ali’i fa’amasinoga, ona fa’atoa tu’uina mai ai loa lea o se latou fa’aiuga e tusa ai o lenei mataupu.