Ads by Google Ads by Google

Talosaga Saulo solofua tagi faasaga ia te ia

Ua i luma nei foi o le Vaega o Faamasinoga Apili o le Faamasinoga Maualuga se talosaga na faaulu e le loia o lo o tulai mo Vui Florence Saulo, e talosagaina ai le faamasinoga ina ia solofua le tagi sa faaulu e Lucia Bartley ma Esther Wall faasaga ia te ia, ona ua taofi le itu tete’e, e leai se malosi o le Fa’amasinoga e iloiloina ai ia mataupu.

I se vaega o le tagi sa faaulu e Bartley ma Wall ina ua tuana’i le palota tele a le atunuui, o lo o i ai so la talitonuga, o Saulo o se tagatanuu o Samoa, ma sa le i agavaa o ia e avea ma se sui tauva mo le Itumalo #15 o Tualaua.

O lo o taua foi i le tagi le le talafeagai o le faaupuga sa faaaoga i pepa palota a le Itumalo, ma o ia faaupuga ua le o gatasi lea ma tulafono tau palota.

O le tagi o lo o faia faasaga ia Saulo ma le Komesina o Palota a le atunuu, le afioga i le Maopu ia Soliai Tuipine Fuimaono.

E foliga tutusa lava mataupu o lo o taua i le tali tete’e a Saulo na faaulu e lana loia o Marcellus Talaimalo Uiagalele, ma le vaega o le tali a Soliai na faaulu e lana loia o Gwen Tauiliili-Langkilde, i le vaiaso na te’a nei

Na taua e Uiagalelei e faapea, i le maea ai ona iloilo toto’a e Soliai o vaega uma e faatatau ia Saulo, sa faia ai loa lana faaiuga e agavaa o ia e avea ma sui tauva mo le palota a le itumalo.

Saunoa foi Uiagalelei e faapea, ina ua tuana’i aso e tolu talu ona faia lea faaiuga, e leai ni faasea sa tuuina atu i le Ofisa o Palota faasaga ia Saulo.

Na faamanino foi e Uiagalelei e faapea, o le mataupu i le fesiligia o le agavaa o Saulo e avea ma sui tauva, e i ai aiaiga o lo o i lalo o tulafono tau palota e tatau i le tagata o lo o tete’e ona mulimulita’i i ai a’o le’i tuuina atu le mataupu i luma o le Vaega o Faamasinoga Apili.

O ia aiaiga e pei ona taua e Uiagalelei, e tatau ona tusi muamua le tagata o lo o tagi i le Komesina o Palota i totonu o le taimi faatulagaina e faailoa i ai lana faasea, ma afai e le fiafia ai le tagata o lo o tagi i se faaiuga e tuuina mai e le Komesina o Palota, ona faatoa tuuina atu loa lea o le mataupu i luma o le Vaega o Faamasinoga Apili.

Fai mai Uiagalelei, e lei mulimulita’i Bartley ma Wall i le laasaga muamua lea e pei ona taua mai i tulafono tau palota, ma talu ai o le le mulimulita’i i laasaga e pei ona taua, e le gata la ua tuai le taimi sa faila ai lenei mataupu, ae leai foi se malosi o le Faamasinoga na te iloiloina ai lenei mataupu.

I le tulaga o faaupuga o lo o i totonu o pepa palota a le itumalo, na taua ai e Uiagalelei e faapea, sa mulimulita’i lava Soliai i ta’iala e pei ona tuuina mai i le tulafono palota, e ala i le tuuina atu lea o le avanoa i sui tauva latou te iloiloina ai pepa palota a’o le’i oo i le aso e faia ai le palota.

Fai mai Uiagalelei, sa maua e sui tauva uma o le itumalo e aofia ai ma i laua o lo o tagi i lenei mataupu ma Saulo le avanoa e iloilo ma faitau ai i pepa palota, ma e leai se taumafaiga ma ia i laua o lo o tagi e faia ni suiga i le pepa palota.

I le faaiuga o le talosaga a Uiagalelei, ua ia talosagaina ai le faamasinoga ina ia solofua le tagi ua faia faasaga ia Saulo, ma tuuina atu ia Saulo le manumalo e ala lea i le totogiina mai e le itu tagi o le tau sa faaulu ai lenei mataupu i le faamasinoga, faapea ai ma le totogi o lana loia.