O lo ua mae’a fa’asalalauina mai le tamaita’i pese o Maryanne Ito, o se tasi o alo o Amerika Samoa. Sa soifua a’e o ia i Fort Riley i Kansas i le 1983, ae na tele taimi sa toe tausia ai o ia i Amerika Samoa ma a’oga ai, ona fa’au’u mai lea i le Samoana High, fa’apea fo’i Hawaii lea e matele ina latou nonofo ai ma ona matua o Sauso’o Saina Ito ma Ruta La Futialo Papali’i Ito.

O se tasi o mea ua iloga ai, e matua Samoa lava lea alo o le atunu’u, ae ua fa’aeaina nei lona taumafai i tulaga o le taleni pese, ma o se mitamitaga lea o aiga, ona matua ae maise lona tina matua Mere Ito, ua atoa lona 89 tausaga, lea foi e fa’aigoa ai o ia o ‘Maryanne.’

I le 2015 na malo ai Maryanne i le Vodafone Pacific Music Awards i le fa’ailoga o le Best International Pacific Artist 2015 i lana pese o le “Waking Up.”

O lea fa’ailoga sa fa’ailoa mai na fa’atupea lea e le “Flava” ma o le tauvaga pese sa fa’atino lea mo tagata polenisia uma o lo’o talenia i le musika. O le tauvaga fo’i lenei sa fa’atautaia i Niu Sila, ae o lo’o alu atu mamao ai lea alo o le atunu’u mai Amerika ina ia tauva ai, ma lea fo’i ua fa’ai’u manuia.

O lana fa’afetai sa ia fa’ao’o ia i latou sa latou tu’ufa’atasia lana pese na tauva ai, Waking Up, ae maise le Kamupani Pu’eleo sa latou tu’ufa’atasia lana lea pese. E le gata i lea, ae sa ia fa’afetaia lona aiga, aua sa latou sapaia lona fa’amoemoe mai le amataga, e o’o fo’i i lona tuagane sa mua’i avea ma tagata tauva i le musika, le ali’i o Lucky Rogers Ito, aua o ia lea sa mua’i tula’i ai Maryanne e sapaia lana pese i tauvaga a’o i ai i la’ua i Honolulu, Hawaii i le 2006.

E tele fa’aaliga tetele ma tauvaga pese a le Nesian Fest ma le Nesian  Winter Groove fa’apea ma le Chief XL Salute tali mai le 2013 sa auai ai ma Maryanne i a latou pesega, aua ua avea o ia ma totino tumau o le fa’aili e taina pese a tagata pese sa tauva. Peita’i ina ua tu’ufa’atasia le latou fa’aili ma le Asatatine Collective, lea e aofia ai DJ,  Sub Z o nisi o sui tata, a’o Deesarono sa avea ma tagata pese ma le latou tusi pese toe ta tamepelau, nisi taimi e tatamepelau ai le ali’i o King David. O le latou fa’aili lea sa femalaga’i ma le tama’ita’i o Maryanne se’ia o’o i le 2014, ma sa latou asia ai le Matu i Saute o le Iunaite Setete.

Ona o lana pese lea sa tusia i le tausaga 2013, ae fa’alauiloa i le tausaga 2014, sa tusia ai e le ali’i tusitala o John Berger o le Star Advertiser lana tala ma fai mai ai, o le tama’ita’i pese Samoa o Ito, “E fiafia o ia i fatuga lemu ae a’ati lona tu’ufa’atasiga i le fatu, o i ai se fe’au o le alofa o lo’o molita’i mai ai.”

O lana pese fo’i lea ua fa’amanuiaina ai o ia i le tauvaga i Niu Sila i le 2015 ma sa ia fa’ailoa, “Ou te iloa, le tele o fa’amanuiaga ua fa’alauiloa ai na’o a’u, ae o le galuega tele sa faia, sa tofu sao i ai le to’atele o e na fa’atasi ma a’u i la’u taumafaiga mai le amataga, ae maise le tapua’iga mau a lo’u aiga i Fagatogo Amerika Samoa, tama ma teine o le Blue City Boys, ae maise i nai ou matua o lo’o sapaia pea a’u taumafaiga i taimi uma e o’o mai ai le mana’omia.”

I le aiga e tupuga mai ai Maryanne Ito i Fagatogo, Pavaiai ma Vailoa, na mua’i pu’eina le lipine o pese Samoa a le uso o lona tama, “Kapeneta Ito” sa la’ua peseina ai ma le tama’ita’i o Diana Fuimaono i le tausaga na soifua a’e ai Maryanne i ona matua i Fort Riley Kansas, 1983.

I se fa’amatalaga mautu a Kapeneta Ito o le Ofisa o le Customs a le tatou malo, o le ala fo’i lea o le fa’amauina o le musika i lea fo’i afafine o lenei aiga, leaga e le faigofie ona a’ea le olo faigata o le pu’ea se lipine e 10 pese ele Samoa Daystar i na vaitau, ae o le matua lelei fo’i o le si’ufofoga o le tama’ita’i sa ma va’ava’alua i lena taumafaiga.