E le o fa’atafa Masela o le Auala i le fa’atinoina o le latou tiute ona tofia i ai latou e le alii kovana, o le fa’amalosia lea o le tulafono na fa’atula’i e le faigamalo a Lolo ma Lemanu mo ta’avale a le malo, e na o Fa’atonusili e mafai ona o ma ta’avale i o latou aiga, se’i vagana ai ta’avale ua tu’u atu fa’apitoa i ai le pemita e mafai ai ona fa’aaoga mo le 24 itula ona fa’atoa mafai lea ona fa’aaoga pe a tuana’i itula faigaluega.

Na fa’asavavali e le Masela o le Auala ni tagata faigaluega a le malo i le afiafi ananafi, ina ua fa’amaonia latou te le o tausisia le tulafono e pei ona fa’atula’i e le alii kovana ia Lolo Matalasi Moliga, ina ua siaki atu e leai ni pemita e fa’ataga ai ona fa’aaoga ta’avale i le tuana’i ai o itula faigaluega.

E taunu’u le Samoa News i le nofoaga i Matu’u na fa’atino ai le poloka a le Vaega o Masela o le Auala, lea fo’i sa i ai ma le fesoasoani a le Vaega o Leoleo a le malo, e tasi le ta’avale ua mae’a ona taofia, o le ta’avale lea mai le Falema’i o le LBJ, numera “CM-16”.

E ova i le 20 ta’avale na taofi e le Masela o le Auala ma siaki pemita fa’ataga e mafai ai ona fa’aaoga, i le taimi a o i ai le sui o le Samoa News, o se tasi o ia ta’avale o le ta’avale a le Fa’atonusili o le Ofisa o le Su’etusi a le Teritori numera “TAO-1”.

O se tina pe a ma le 50 tausaga le matua na ia aveina atu le ta’avale, ma se tamaititi sa nofo atu ai i le pito i tua, ae ina ua leai se pemita e fa’ataga ai ona fa’aaoga le ta’avale i le tuana’i ai o itula faigaluega a le malo, na fa’atonu ai loa e le Masela le ave ta’avale e fa’atu le ta’avale i le vaega lea o lo o paka mai ai fo’i le ta’avale a le falema’i ua mae’a ona taofia.

Sa molimauina e le Samoa News le taimi na tulioso ai i fafo ma le ta’avale le tina ma le tamaititi, ma savavali atu i le vaega e fa’atali ai se la pasi e aga’i ai i le aiga.

O le tele o ta’avale na taofi e le Masela sa tofu ma le pemita e fa’ataga ai ona fa’aaoga le ta’avale pe a tuana’i itula faigaluega a le malo.

So o se fonotaga a le kapeneta e le misi ai lava ma le toe fa’amanatu e le alii kovana o le tulafono lenei o ta’avale i afioga i fa’atonusili, ina ia latou silafia e taua tele le usitaia e matagaluega uma o le tulafono.

Sa i ai foi le taimi na tuuina atu ai se talosaga a le kapeneta i le afioga i le lutena kovana ia Lemanu Peleti Mauga ao i ai le alii kovana i Hawaii, mo se avanoa e mafai ai ona malaga sui fa’atonusili ma ave a latou ta’avale i aiga, peita’i e o o mai lava i le taimi nei e na o fa’atonusili lava o lo o fa’ataga ona o ma ta’avale i o latou aiga.