Ads by Google Ads by Google

Taofia le va’a oloa Sigapoa

Ua atoa le vaiaso o taofia le va’aoloa tele o le Southern Lilly 2, o se va’a e fa’atautaia e le Pacific International Line ma o lo’o i ai le latou Ofisa va’a e fa’atautaia feso’ota’iga uma ma le tatou nei malo o le TransAm Shipping Company.

Ua fa’aalia mai e le latou Ofisa autu lea, “E tasi lava le mea sa fa’aletonu o le afi o le va’a na mafua ai ona iloa e le Kapeteni e le tatau ona toe tu’uva’a ese atu, o le oilseal o le pamu o le suau’u o le afi ua leaga, peita’i, ina ua sailia e le vaega a le Coast Guard lea fa’aletonu, sa faia ai loa ma le su’esu’ega auiliili o le va’a atoa.”

Ua fesiligia fo’i se taofi o le US Coast Guard ma ua latou fa’ailoa mai, “E moni ua taofia nei e i latou le va’a se’ia mae’a kilia uma nisi o tulafono tau feoa’iga i le vasa ua latou fesiligia, afai e le mafai ona fa’amalieina i latou i ni gaoiga ma tali e fa’atino e le va’a lenei, e le mafai lava ona tu’ua le tatou uafu tele i Fagatogo.”

Ina ua fesiligia fo’i le TransAm e tusa ai ma se gaoioiga fa’avave ua latou faia ina ua kilia ai le latou va’a, ae ua fa’ailoa mai, “Ua mae’a fa’afeso’ota’ia fo’i le Kamupani Fa’atina i Sigapoa, ma ua faia le latou vaega e tatau ona fai, ua atagia mai, e malaga mai ni sui po’o se sui, ae maise ai lava o le Inisinia, ina ia toe fa’aleleia mea ua matauina e le Coast Guard e ao ina fa’alaleia, fa’atasi ai ma le oil seal o le pamu o le suau’u o le afi o le “Southern Lilly 2.”

O lo’o matauina e atagia mai i nisi o tulafono tau feoa’iga i le vasa fa’avaomalo ua solituina, o ni tulafono tau fa’alapisi po’o ua masa’a le suau’u i le sami, ae o le a maua tonu lava se isi fa’amatalaga mautu pe afai o le a mae’a fa’asa’osa’o nisi o mea ua mo’omia ona fa’aleleia o le va’a la’u oloa, a’o le’i fa’atagaina e tu’uva’a ese atu mai le tatou uafu.

O le sui o le US Coast Guard Lt. Steven Caskey, sa ia fa’ailoa mai i le tatou nei nusipepa, “E le o mailoa lava se taimi e mafai ai ona tatala lenei va’a la’uoloa e tu’uva’a ese, ae fa’afetai, ua mae’a i ai nei sui iloga o le Kamupani mai Sigapoa, e taga’i toto’a i mea e ao ina toe fa’aleleia e fa’amatu’u atu ai le va’a e toe malaga.”

I le sogasoga lava o le pu’e ata latou, sa va’aia nisi o uta a le va’a ua mae’a saunia mo le tu’uva’a ese atu, peita’i, e va’aia le tutu matilatila mai o lenei ta’avale i luga o pusa oloa tetele i luga o le va’a lenei, e fesiligia lava fo’i e lo ta mafaufau, pe o le faiga lenei e mafai ona aumaia ai oloa fa’apea i le tatou atunu’u? Afai e mafai, pe aisea la e tau fai ai fua nei Pusa Oloa ae faigofie lava lea, masalo e taugofie atu foi?

Peita’i, ua lisia mai e le igoa “Southern Lilly 2” i luga o upega tafa’ilagi, “o lo ua taofia nei lea va’a i le Uafu i Pago Pago, se’ia mae’a ona talanoaina pe aiaia fo’i lona solituina o ni tulafono tau le fa’alapisi i le sami.”

Pe afai ae taofia va’ala’uoloa ma so’o se ituaiga va’a lava i so’o se uafu o so’o se malo, e mautinoa e i ai fo’i le totogi mo lona taula ai i le uafu. Ona o lenei va’a sa matua saunia i latou uma e tu’uva’a ese atu i le aso To’ona’i ua te’a, lea ua atoa ai nei le vaiaso o taula pea.

tusia: Leua Aiono Frost