Ua sauni atu nei le Iuni Lakapi a Amerika Samoa (ASRU) mo le fa’atautaiga o lana ta’amilosaga ta’ito’a 7 o le fu’a mo lenei tausaga, lea e pei ona fuafuaina i le aso 9-11 o Aperila 2015, i le malae o le Veterans Stadium i Tafuna.

I se pepa o fa’amatalag sa tu’uina mai e le ASRU i le aso ananafi, o lo o taua ai le latou galulue soosoo tauau ma le Ofisa o le ASNOC mo le tu’u fa’atasia o lenei ta’amilosaga, o se tasi o polokalame o taaloga mo le sisiga fu’a o lenei tausaga.

O le vaiaso na te’a nei e pei ona taua e le ASRU i le pepa o faamatalaga, na tu’uina atu ai le tusi valaaulia i le Iuni Lakapi a Samoa (SRFU), mo le valaauliaina o ana kalapu lakapi ina ia auai mai i lenei ta’amilosaga taua.

O le vaiaso fou e pei ona taua e le Ta’ita’ifono a le ASRU ia Togiola T. A Tulafono, o le a tu’uina atu ai loa le tusi valaaulia mo kalapu mai isi atunu’u tuaoi o le Pasefika e pei o Fiti, Tonga ma Niu Sila, ina ia auai mai fo’i e tausinio i lenei fa’amoemoe taua.

E pei ona silafia, o le ta’amilosaga ta’ito’a 7 o le fu’a o lenei tausaga, lea ua toe tu’uina atu ai le fa’atautaiga atoa ai ma le fa’afoeina o le ta’amilosaga i lalo o le ASRU, talu mai tausaga soso’o e tolu sa fa’atautaia ma fa’afoe ai e le Kalapu Lakapi a tama tuai a Malisi, talu mai le 2012 e oo mai i le 2014.

“O le itu e pito sili ona taua i le ASRU e tatau ona silafia e le atuunu’u, i le avea ai o lenei ta’aloga o se tasi o ta’aloga e to’atele i latou e fia tausinio i ai, e tatau fo’i ona fa’atinoina lea ta’aloga i le agaga e manatua ai i latou sa asaina mai le gasu, i le taimi e fa’amanatuina ai le fu’a a Amerika Samoa”, o se vaega lea o le pepa o fa’amatalaga mai le ASRU.

O le tasi fo’i o lenei fa’amoemoe, o le a mafai ai ona molimauina ni isi ua iloga i lenei ta’aloga mai atumotu o le Pasefika, ina ia avea o se auala e fa’agaeetia ai loto ma lagona o tagata latou te maimoaina lenei faaga tama taua, a’o aga’i atu le atunu’u i le fa’amanatuina o lana sisiga fu’a.

Ua fa’alauiloa aloaia mai ai fo’i e le ASRU le fa’ailoga tupe e US$12,000 mo le au e siamupini i le ta’amilosaga o lenei tausaga, fa’atasi ai ma le latou talitonuga, o se amataga lea o mea lelei uma atoa ai ma le aga’i atu i le lumana’i ao taumafai ai e atina’e lenei ta’aloga i le atunu’u.

E pei ona silafia e le atunu’u, o le au mai le afioaga o Vaiala, le Vaiala BBE o lo o ia umia le siamupani o le ta’amilosaga o le fu’a mo tausaga soso’o e tolu ua tuana’i atu, talu ona fa’atautaia mai e le Kalapu a Tama Tuai a Malisi lenei fa’amoemoe, ma ua i ai le faamoemoega e pei ona saunoa Togiola, o le a to’atele kalapu mai Samoa e autova’a mai e tausinio i le ta’amilosaga o lenei tausaga.

O ni isi o vaaiga iloga sa molimauina e le atunu’u talu ona fa’atautaia mai e Malisi ta’amilosaga e tolu ua mavae atu, sa mafai ai ona molimauina ni isi o ali’i iloga i lenei ta’aloga o le lakapi ta’ito’a 7 mai Samoa, fa’apea ai ma Fiti.

O le tausaga e 2013 i le ta’amilosaga ta’ito’a 7 o le fu’a na malaga mai ai le au malosi a le ‘Red Rock’ mai Fiti e tausinioi lenei ta’amilosaga, lea fo’i na malaga mai ai ni sui iloga o le au ta’ito’a 7 a Fiti, peita’i e le i manuia a latou taumafaiga mo le ipu autu.

Ae mo le ta’amilosaga o le tausaga na te’a nei, na mafai ai ona molimauina e le atunu’u ni isi o ali’i laufali iloga i le ta’aloga lakapi i le lalolagi, lea na malaga mai e avea ma laufali i le ta’amilosaga, e pei o le susuga ia James Bolabiu mai Fiti, Tui Komiti ma Kelekolio Petelo mai Samoa.

O le tausaga fo’i e 2013 na malaga mai ai ni isi o sui iloga o le lakapi i Niu Sila ma Samoa e pei o le susuga ia DJ Forbes mai Niu Sila, Namulauulu Fereti Tuilagi, Brian Lima, Stan Toomalatai aemaise ai Papaliitele Peter Fatialofa.

O le isi la’asaga lea o le a se’e atu nei i ai le ASRU mo le atina’eina pea o le ta’aloga lakapi i Amerika Samoa, o le tofia lea o lana au ta’ito’a 7 e tausinio i ta’aloga a atumotu laiti o le Pasefika, e saili ai se avanoa e ofi atu ai i le ta’amilosaga a le IRB i Hong Kong i le tausaga fou, lea avanoa sa maua e Amerika Samoa i le tausaga na te’a nei, ina ua malaga lana ulua’i au filifilia e tausinio i le ta’amilosaga i Hong Kong.

O le mae’a ai o le ta’amilosaga a atumotu laiti o le Pasefika, ona soso’o ai loa lea ma le ta’amilosaga a le Oceania, ma fa’asolo atu ai lava i le sailia o au e ofi atu i le ta’amilosaga a le Ipu o le Lalolagi i le ta’aloga ta’ito’a 7.