E tasi le isi fa’atoaga i le afioaga o Taputimu ua tapuni e le Ofisa o Fa’atoaga i le masina lenei, ina ua fa’amaonia le le tausisia o tulafono mo le tausia lelei o fa’atoaga.

O le gaioiga ua mafua ai ona tapuni e le Ofisa o Fa’atoaga le fa’atoaga lenei e pei ona saunoa le Fa’atonusili o Fa’atoaga ia Lealao M. Purcell, o le fa’aaogaina lea o otaota o moa e fai ma fa’alelei eleele mo le fa’atoaga, e aunoa ma le fa’afefiloi ma le palapala, atoa ai ma le togafiti o le otaota o moa ina ia mautinoa ua mate siama o lo o i ai.

Saunoa Lealao i le iloiloga sa faia i luma o le komiti o fa’atoaga a le Senate e fa’apea, o le gaioiga sa faia e le aufai fa’atoaga i Taputimu, ua atagia mai ai lo latou le tausisia o tulafono o fa’atoaga, ma ua atoa ai fo’i le fitu o fa’atoaga ua mae’a ona tapuni e le Ofisa o Fa’atoaga, talu mai le amataga o le tausaga nei.

O se tasi o mataupu na fesiligia e le afioga i le ali’i senatoa ia LeAtualevao Asifoa, o le mafua’aga ua fa’asa ai e le Ofisa o Fa’atoaga ona toe toto le kapisi, ma ua a’afia uma atu ai ma le aufai fa’atoaga o lo o usita’i i tulafono.

Saunoa LeAtualevao e fa’apea, afai o le aufai fa’atoaga Asia lea ua mafua ai ona fa’asa le toe totoina o le kapisi, e tatau la ona fa’asa na o le aufai fa’atoaga Asia, ae tatala pea le avanoa i le aufai fa’atoaga a le atunu’u o lo o usita’i ma tausisi i tulafono tau fa’atoaga.