O le Aso To’ona’i nei i le itula e 10:00 i le taeao ua fa’amoemoe e tatala aloaia ai le Liki Lakapi ta’ito’a 15 a le Iuni Lakapi a Amerika Samoa (ASRU) mo lenei tausaga, ma le fa’amoemoe o le ta’amilosaga lenei e saili mai ai se au fili a le atunu’u e tausinio i le ta’amilosaga a le Pasefika, lea e faia i Papua Niu Kini i le masina o Aokuso 2015.

Mai le tele o kalapu lakapi eseese i le atunu’u o lo o masani ona tausinio i le tele o ta’amilosaga, e na o le 7 kalapu ua mae’a ona lesitala mo le ta’amilosaga, o kalapu fo’i ia o le a fili mai ai se ‘au fili ta’ito’a 15 a le atuu’u.

E tolu ta’aloga o le a faia i le aso To’ona’i nei, ma o ia ta’aloga e aofia ai le ulua’i ta’aloga i le va o Fagatogo ma Marist St Joseph, sosoo ai le ta’aloga i le va o Nu’uuli ma Leone, ae taualuga i le ta’aloga o le Talita lea o lo o umia e Lalomalava talu mai le tausaga na te’a nei, lea ua sauni le ‘au malosi mai Pago Pago latou te lu’iina.

E pei ona fa’amaonia mai e le Ta’ita’ifono o le ASRU ia Togiola T. A Tulafono i le Samoa News i le vaiaso na te’a nei, o le a fa’aauau pea ona fa’aaoga e le ASRU ali’i Laufali ma Fa’amasino mai le Iuni Lakapi a Samoa (SRU) e fesoasoani i le fa’atautaia o ta’aloga a le Iuni, ina ia mafai ai ona fesoasoani i ali’i laufali a le atunu’u o lo o fa’aauau pea ona fa’agasolo a latou a’oa’oga mo le umiaina o Laisene Laufali mai le IRB.

Na taua e ni isi o kalapu lakapi i le Samoa News e fa’apea, talu ai o le toatele o a latou kalapu e le lava ni tamaiti ta’aalo e fili mai ai se latou ‘au lakapi ta’ito’a’ 15, ua manatu ai i latou e lava lakapi ta’ito’a 7 e tausinio ai.

O ni isi o tapenaga a le ASRU mo le lumana’i o le lakapi i le atunu’u, e aofia ai le sailiina o se ‘au ta’ito’a 15 mo Papua ia Aokuso, fa’apea ai ma se ‘au ta’ito’a 7 mo le ta’amilosaga a le Oceania e faia i Aukilani i Niu Sila i le masina o Novema.

Na taua e le sui o le ASRU ia Peseta Sa Mavaega i le Samoa News e fa’apea, o  lo o i ai le fuafuaga e tatau fo’i ona fili se ‘au a tama’ita’i mo le ta’amilosaga a le Oceania i Niu Sila, ae fuafua lava i le i ai o ni tama’ita’i e mafai ona fili mai ai se ‘au.

Na taua e Togiola i le Samoa News i le masina na te’a nei, o le itu tau seleni ua mafua ai ona faia le fa’aiuga, e taofi le ‘au ta’ito’a 7 a le atunu’u, le Talavalu mai le tausinio i Ta’aloga a le Pasefika i Papua Niu Kini i le masina fou o Iulai, ae tu’u le avanoa e malaga atu ia le ‘au ta’ito’a 15 e tausinio i le ta’amilosaga lea ua fa’amoemoe e faia ia Aokuso, ona o lea fo’i e maua le isi avanoa o le Talavalu e tausinio ai i le masina o Novema i Niu Sila.