O se tasi o tala fiafia mo fanau aoga a le atunuu ua faauu mai kolisi ma iunivesite i fafo, ma ua manana’o e toe fo’i mai e saili galuega i le atunuu, o le a maua pea avanoa faigaluega mo i latou nei e galulue ai i totonu o Amerika Samoa, e pei ona faamaonia e le afioga i le alii kovana ia Lolo Matalasi Moliga, i sana tusi sa tuuina atu i lana kapineta.

Na tomua le tusi a Lolo sa tuuina atu i faatonusili i le aso 28 Ianuari 2014, i lona faafetaia lea o matagaluega uma a le malo sa latou lagolagoina le tatalaina o le polokalame a le malo ua taua o le ‘Management Apprenticeship’, e ala i le tatala o avanoa faigaluega mo fanau e toa 27 e galulue ai i ofisa ma matagaluega a le malo.

Saunoa le alii kovana e faapea, ina ua faatoa faalauiloa se fuafuaga a le malo e toe faatulaga ai totogi amata mo fanau e faauu mai ma faailoa maualuluga mai aoga i fafo, e le gata ua unaia ai se tasi o fuafuaga faataoto a le malo ina ia faamalosia ana tagata faigaluega e saili faailoga tikeri, ae ua unaia ai fo’i ma fanau aoga a le atunuu ina ia faaauau a latou aoaoga mo le ta’i 4 tausaga e saili ai faailoga tikeri, ona  o le tele o galuega i le taimi nei ua manaomia ai i latou e umia faailoga maualuluga e pei o tikeri, e ese atu nai lo tipiloma o lo o latou maua mai i Aoga Maualuluga.

O se tasi o itu lelei e pei ona taua e le alii kovana, o le fuafuaga fou lea ua faalauiloa e le malo, ua manino mai ai tulaga manuia o le lumana’i o Amerika Samoa, e afua mai i ana tama fanau ua maua aoaoga lelei ma avea ma meatotino mo le atunuu, ma o tagata faigaluega uma a le malo e le o i ai ni tikeri, ua oo i le taimi e tatau ai ona saili auala e aoaoina ai i latou i ituaiga aoaoga o lo o manaomia i le taimi nei, ina ia mafai ai ona tali atu i manaoga o lo o tula’i mai i totonu o a latou fale faigaluega.

I le faataoto ai e le malo o ta’iala fou mo totogi e tatau ona maua e fanau aoga ua faauu mai i aoga mai fafo ma faailoga maualuluga, o se tulaga lelei lea mo le atina’e, aua o ta’iala tuai sa faataatitia ai totogi amata mo fanau e faauu mai i aoga, sa faalagolago i tulaga o faamanuiaga sa maua i taimi ua te’a, ma tuu atu ai totogi e maua e fanau aoga i le tulaga e maualalo atu nai lo le suiga fou e pei ona faatula’i e le malo i le taimi nei.

Na faamautu e le alii kovana e faapea, o le faiga fou e pei ona faatulaga e le malo mo totogi, e faapitoa lea mo fanau faatoa faauu mai i aoga ma ua ulufale atu e galulue i galuega a le malo.

O le eseesega o le a tula’i mai lea mo fanau aoga sa faauu mai i aoga i fafo, ma ua i ai fo’i le agavaa i le faatinoina o galuega o lo o galulue ai.

Ina ia solo solo lelei fuafuaga e pei ona fautuaina e le alii kovana, ua tofia ai le Faatonusili o le Matagaluega o Tagata Faigaluega a le malo, le susuga Sonny Thompson e galulue faatasi ma faatonusili o ofisa ma matagaluega eseese a le malo, mo le faatulagaina o totogi talafeagai mo tagata faigaluega a le malo o lo o agavaa i lalo o lenei fuafuaga fou.

Ua talosagaina fo’i e le alii kovana susuga Thompson ina ia saunia se ripoti ma tuuina atu i le Ofisa o le Kovana, e faalauiloa atu ai tulaga uma o le a taunuu i ai gaioiga e faatatau i lenei fuafuaga fou.

Na faalauiloa e Lolo i se tasi o fonotaga a lana kapeneta e faapea, o le agaga maualuga o le malo, ia maua e fanau aoga faatoa iu mai aoga i fafo le avanoa e galulue ai i le atunuu, ina ia mafai ai ona toe tuuina mai le tomai ma le agavaa ua latou maua e fesoasoani ai i le atina’eina o le malo, pisinisi faapea ai aiga ma le atunuu atoa.