E to’alua ni tina sa taofia i le toese i Tafuna ua tatalaina nei i tua, ina ua talia e le fa’amasinoga maualuga le fautuaga mai le Ofisa Fa’anofova’ava’aia, ina ia fa’amuta nei loa le tuliina o a la fa’asalaga fa’a falepuipui sa poloaina i latou e tuli, ae faaauau loa ona la usitaia isi tuutuuga o le la nofovaavaaia, ina ua mae’a ona la totogiina vaega tupe sa fa’atonu i laua e le fa’amasinoga e totogi.

O Maria Sailele-Tuilagi ma Fiapapalagi Letuli na poloaina e le fa’amasinoga i le amataga o le tausaga nei, la te tuliina le umi e ta’i 28 masina i le toese i Tafuna, atoa ai ma le la toe totogi o tupe ia i latou na a’afia i a laua gaioiga faasolitulafono sa faia.

I le mae’a ai ona iloilo e alii faamasino o le ripoti a le ofisa faanofovaavaaia, faapea ai ma le iloiloina o faafinauga a loia, na tuuina mai ai loa le faaiuga a le faamasinoga e tatala ai i laua nei i tua i le taeao ananafi, i lalo o tuutuuga faapitoa, ina ia faaauau pea ona la usitaia isi poloaiga a le faamasinoga ua maea ona tuuina atu ia te i laua.

MARIA SAILELE-TUILAGI

O le taeao ananafi na faatulaga ai le ulua’i iloiloga a Sailele-Tuilagi i luma o le ali’i fa’amasino sili lagolago ia Lyle L. Richmond, i lalo o se fautuaga mai le ofisa faanofovaavaaia.

O le fautuaga a le Ofisa Fa’anofova’ava’aia na fa’avae mai lea ina ua usitaia e le ua molia se tasi o tuutuuga sa tuuina atu e le fa’amasinoga, i lona totogiina lea o le tupe $12,368 aga’i i le kamupani fai pepa malaga o le J & J World Travle, lea sa ia ave fa’agaoi e ala i lona talosagaina o pepa moni pasese e malaga ai ni tagata se to’a ono i Amerika ma toe fo’i mai ma le tu’utu’uga, e uma ona toe totogi lea.

O le masina o Aperila na te’a nei na fa’asala ai e le fa’amasinoga ia Sailele-Tuilagi i le toese i Tafuna.

Na talosaga le loia a le ua molia ia Michael White i le fa’amasinoga ina ia talia le fautuaga mai le Ofisa Nofova’ava’aia, lea fo’i e le i fa’atuiese i ai le loia a le malo o Tiffany Oldfield.

I le mae’a ai ona iloilo e ali’i fa’amasino o sa latou fa’aiuga e tusa ai o lenei mataupu, na fa’ailoa ai loa e le afioga i le ali’i fa’amasino sili lagolago ia Lyle L. Richmond le talia e le fa’amasinoga o le fautuaga a le Ofisa Nofovaavaaia i lalo o le latou fautuaga, e tatau ona maua se galuega e galue tumau ai le ua molia i totonu o le 90 aso lea o le a tatala ai o ia i tua.

O le mataupu fa’asaga ia Sailele-Tuilagi na alia’e mai ina ua fa’afesootai e le ua molia le kamupani fai pepa malaga o le J & J World Travel ma fa’ailoa i ai, o ia e galue i le Matagaluega o Aoga a le malo, ae manaomia ni pepa mo pasese (tickets) mo ni tagata se to’a ono e malaga ai i Amerika ma toe fo’i mai, ae a maea ona toe totogi atu lea e le Ofisa o aoga tupe mo pasese.

Ina ua o o i le taimi e ao ai e le kamupani fai pepa malaga tupe mo pasese, na latou maua ai e le galue le ua molia i le Ofisa o Aoga, e fa’apena fo’i i tagata sa malaga, e le o latou o ni tagata faigaluega a le Ofisa o aoga.

Ina ua fesiligia e leoleo Sailele-Tuilagi, sa ia ioeina ai lona fa’aaoga o le tupe sa tuuina atu e i latou nei e to’a ono e totogi ai a latou pasese.

O le afioga i le ali’i fa’amasino lagolago ia Mamea Sala Jr ma Muasau Tasina Tofili na lagolago sua ia Richmond i le iloiloina o se faaiuga mo lenei mataupu.

FIAPAPALAGI LETULI

O ananafi fo’i na valaau ai le iloiloga mo le nofovaavaaia a Letuli i luma o le ali’i fa’amasino sili ia Michael Kruse, i lalo o se fautuaga mai le ofisa faanofovaavaaia e talosagaina ai le taofi lea o le tuliina e le ua molia o le vaega o lo o totoe o lana fa’asalaga fa’a falepuipui e 28 masina.

Ina ua valaau le matupu a Letuli i le taeao ananafi, na taua ai e lana loia fautua ia Matailupevao Leupolu Jr e fa’apea, e le gata na te lagolagoina le fautuaga o lo o aumai i totonu o le ripoti a le ofisa faanofovaavaaia, ae o lo o atagia mai ai fo’i le mae’a lea ona totogi e le ua molia o le tupe sa faatonu o ia e le faamasinoga e totogi.

E $7,860.65 le poloaina e le fa’amasinoga maualuga ia Letuli na te toe totogi i le ofisa o le ASESRO lea sa ia galue ai i le taimi na tula’i mai ai le fa’alavelave.

Na taua e Leupolu Jr e fa’apea, e 145 aso lea ua maea ona tuli e le ua molia i le toese, tusa lea o le silia ma le 4 masina o lana fa’asalaga faa falepuipui.

Ae na taua e le loia a le malo ia Tony Graf, e ui e taua le tulaga e pei ona taua i le ripoti a le ofisa nofovaavaaia, i le maea lea ona totogi e le ua molia le tupe sa poloaina o ia e totogi, peitai e atugalu le malo i le laititi o le taimi lea ua ia tuliina i le toese i Tafuna.

Na fesili le ali’i faamasino sili o Michael Kruse ia Graf po o le a se manatu o le malo e tusa ai o le talosaga a le ua molia ina ia talia le fautuaga o lo o i totonu o le ripoti a le ofisa faanofovaavaaia, ae na tali Graf, “e tatau lava ona tuli e le ua molia ni isi nai masina i le falepuipui”.

Na avea le tali a Graf ma itu na soisio ai le alii faamasino ma ia fesili i le loia a le malo e fa’apea, “O anafea na avea ai oe ma tagata fai polokiki, o le tagata fai polokiki e le tali sa’o mai i le fesili”.

Ina ua mae’a ona iloilo e ali’i fa’amasino talosaga a loia, na saunoa ai loa Kruse e fa’apea, o le faaiuga a le faamasinoga, e le mafai ona faaitiitia le faasalaga faa falepuipui ua maea ona tuuina mai mo Letuli, peita’i, o le a toe faia e le faamasinoga se suiga i le ulua’i poloaiga sa tuuina atu ia te ia, ina ia faamuta loa i le aso ananafi lona tuliina o le faasalaga faa falepuipui e 28 masina i le toese, seia oo i se isi aso o i luma ua manatu ai le faamasinoga ua tatau ona tuli fa’amae’a.

Ua fautuaina fo’i e le faamasinoga le ua molia ina ia faaauau pea ona ia usitaia isi poloaiga o lana nofovaavaaia.

O Letuli na tausala i moliaga mamafa e lua o le gaoi atoa ai ma lona faia o ni faamaumauga tau faasese, ae solofua e le faamasinoga isi moliaga mamafa e 14 sa totoe ai i le pepa o tagi na faaulu e le malo, i lalo o se maliliega na sainia e le ua molia ma le malo ma talia fo’i e le fa’amasinoga.

O tuuaiga faasaga ia te ia na afua mai i le taimi ao ia galue i le Ofisa o le ASESRO a le malo o Amerika Samoa, ina ua ia tala ni siaki sa tusia ai le igoa o le isi tagata faigaluega, e ui o lea tagata faigaluega o lo o livi ona o lo o malaga i fafo mo ana talavai.

Na ioe le ua molia i le faamasinoga, sa ia faa tumu pepa mo taimi faigaluega ina ia faa foliga ai o lo o galue le tagata faigaluega lea, ina ia mafai ai ona maua lana siaki, ona ia alu loa ua tala le siaki ae faaaoga e totogi ai lana nonogatupe, fai ai mea faalelotu ma manaoga a lona aiga.

I le talia ai e le faamasinoga o le fautuaga a le ofisa faanofovaavaaia, na sainia ai loa e le alii loia ia Graf le pepa e aloaia ai le tatala i tua o Sailele-Tuilagi ma Letuli mai totonu o le toese.