Na fa’atautaia i le aso ananafi se sauniga pu’upu’u i lumafale o le Ofisa autu o le Matagaluega o A’oga i Utulei, ina ia fa’ailo aloa’ia ai a latou “Fa’ailo” e lua mo le matagaluega ina ia le toe tau fesiligia e nisi e asiasi mai, po’o le a lea fale, ae po’o fea fo’i le Ofisa Autu o le matagaluega.

“O le Ofisa fou lenei, ua fa’ailoa mai, na tatala aloa’ia i le nofoa’iga a Taimalelagi Dr Claire Salafai Poumele i le tausaga e 2009, peita’i, e le’i fa’atula’ia  se fa’ailo mo le Ofisa autu o A’oga, lea ua gafatia ona fa’atino i lenei tausaga, fa’afetai ua gafatia e le matagaluega, aua e masalo sa fa’atuai lava, ona o tulaga tau tupe fa’asoa mo lea fa’amoemoe.” O se tala pu’upu’u lea a le Sui Fa’atonu Fa’auifono Vaitautolu o le matagaluega.

E ui ona o lenei fa’amoemoe sa una’ia malosi e le Fa’atonu Sili o A’oga, Vaitinasa Dr Salu Hunkin-Finau, ae le’i mafai ona auai o ia i le tatalaga fa’apitoa lenei, ona o lo’o fa’agasegasea. Peita’i, sa fa’atasi uma ane Sui Fa’atonu e to’atolu, Filo Jennings ma Russ Aab fa’apea ma Vaitautolu mo lea fa’amoemoe taua.

I le sauniga fa’atautaia e Rev. Maliepule Tauala, sa ia toe fa’atepa ai le matagaluega, e tusa o le tima’i a Iosefatu le Tupu o Isaraelu a’o le’i aga’i atu i latou i Kilepoa, sa ia fa’apea ai, “Afai tou te ui ane i le ala i Kilepoa, va’ai toto’a i le Fa’ailo, ia fai pea lena ma ta’iala mo outou i le ala. Lea ua atoa tino o le ofisa ulu i ona fa’ailo, fa’afetai mo le galugea tima’i, ma le galuega mae’a.”

O se toe tima’i a Vaitautolu i lana saunoaga fa’apitoa mo le aufaigaluega atoa a le DOE sa ia fa’apea ai, “O se mea lelei o uso ae galulue fa’atasi, e tasi fo’i le ‘auga o la tatou auaunaga, ua tatou iloa mai lea i le tatou fa’ailo i lenei taeao, ‘Fa’amuamua Fanau A’oga’. E augani atu lava, e ui ina e le’i fausia Roma i se aso se tasi, ae ia tatou galulue fa’atasi.”

Ina ua mae’a le tatalo fa’ai’u o le polokalama lea, sa tatala aloaia loa Fa’ailo e lua a le matagaluega, o le isi i luma maota, ae o le isi i autafa e iloa atu i le alatele pe a e ui ane i le ala. O le aiga fiafia na saunia lelei fo’i ele Komiti o lea fa’amoemoe a le matagaluega, na sami ai lea galuega tele, ae maise o le keke fo’i o le fa’amoemoe sa toto’o i ai le a’ao o le susuga le Sui Fa’atonu Filo Jennings.

A’o le’i fa’amanuia le keke sa ia fa’ailoa ai, “E tusa ma le to’alima sui iloga o lenei matagaluega o lo’o fa’amanatuina latou aso soifua i lenei masina, ona o lea ua o gatasi ma le fa’amoemoe o le tatou Fa’ailo, o lea ua fa’amanuiaina ai i latou e talia fa’atasi ai ma fa’amanuiaga o latou aso soifua.”

O Ta’ala Siauini, o le sui fa’atonu o le poloketi lea, sa avea ma fofoga taumolimoli o le polokalama fa’asolo mo lea fa’amoemoe ananafi i le aoauli.