O le to’atele o i latou na taofia mai e leoleo i le aso Gafua na te’a nei, ina ua latou osofa’i le nofoaga o le ‘Le Aute Sports Bar’, na toe tatala uma i tua i le aso lava lea ina ua mae’a ona fesiligia ma su’esu’eina i latou, se’i vagana ai tagata e to’alua o lo o taofia pea i lalo o le va’ava’aiga a leoleo i le taimi nei, e pei ona taua e se molimau fa’atuatuaina i le Samoa News.

O i laua e to’alua o lo o taofia e leoleo e aofia ai se fafine ma sona tuagane.

O le to’atele o i latou sa taofia e leoleo, e i le va o le 30 e aga’i atu i le 40 tausaga le matutua e pei ona taua e le molimau.

E le i mafai e le ali’i loia ia Russel Smith o lo o tula’i mo le itu a le malo i lenei mataupu, ona ia fa’amaonia mai tulaga uma e fa’atatau i le osofaiga a leoleo sa faia, ina ua fesiligia e tusitala i le taeao ananafi.

Ae na taua e le molimau i le Samoa News e fa’apea, o mea o lo o tu’uaia sa maua i le osofaiga e aofia ai fana, fualaau fa’asaina, ma mea e fa’aaoga e tagata i fualaau faasaina.

I le taimi o le osofaiga a leoleo, o lo o tuuaia ai le maua i totonu o le potu a le fafine o se paipa o lo o i ai totonu vaega o le pauta fa’asaina o le aisa.

O fualaau faasaina e pei ona tu’uaia sa maua i le osofaiga, o ni sikaleti mariuana  e 8, lea o lo o tu’uaia sa maua i totonu o le fale a le tuagane o le fafine, lea fo’i e fa’apea mai le molimau, sa ta’utino atu le tuagane o ia e ana fualaau faasaina sa maua i totonu o lona fale.

O isi fualaau faasaina o lo o tu’uaia sa maua i totonu o le isi fale piliki sa su’e e leoleo, e aofia ai ni taga pepa iila se lua o lo o i ai vaega o le pauta fa’asaina o le aisa.

E silia i le to’a 15 tagata na taofia e leoleo i le taimi o le latou osofaiga, lea na amata mai i le te’a o le itula e 9:00 i le taeao ae mae’a i le itula e 2:00.

O lea osofaiga e pei ona fa’amaonia mai e Smith, o le fa’ataunu’uina lea o se poloaiga a le fa’amasinoga, e sailia ai le nofoaga o le Aute i tulaga o fualaau fa’asaina fa’apea ai a’upega mata’utia.

E silia i le to’a 50 leoleo sa fa’a a’upegaina na auai i le osofaiga, lea sa latou osofaia ma sailia le nofoaga autu a le Aute, atoa ai ma fale o isi aiga o lo o tuaoi e i ai o latou so’otaga ma le Aute.

Sa auai i le osofaiga a leoleo ia ta’ifau fa’apitoa mai le vaega a le K-9 Units, lea na auina atu fa’apitoa mo le sailia o fualaau fa’asaina fa’apea ai ma fana.

E le gata sa sailia e leoleo totonu o fale, ae sa fa’apea fo’i ona sailia fafo ma le fanua atoa o lo o i ai le Aute, ina ia mautinoa e le o i ai ni vaega o fualaau ma a’upega o nana solo ai, e pei ona taua e le molimau i le Samoa News.

O le poloaiga a le fa’amasinoga e sailia ai le nofoaga autu a le Aute, na afua mai lea i ni fa’alavelave matuia se lua sa tula’i mai i le fa’aiuga o le tausaga na te’a nei, ina ua tafana e ni tagata le lala o le Ofisa o Leoleo i Leone i le masina o Novema 2014, soso’o ai ma le fa’alavelave lea na manu’a tigaina ai se ali’i leoleo i le fa’aiuga o le masina o Tesema na sosoo ai, e mafua mai ina ua fana e se tagata a o fa’atino ai ona tiute faatasi ai ma ni isi ali’i leoleo se to’alua.

O fa’alavelave matuia fo’i ia na mafua ai ona tofia e le afioga i le ali’i komesina o Leoleo ia Save Liuato A. Tuitele se vaega fa’apitoa o leoleo, e gafa ma le tu’u fa’atasia o fa’amatalaga uma e fa’atatau i lenei mataupu, i lalo o le fesoasoani mai a se sui mai le vaega su’esu’ega a le feterale, le FBI.

O i laua e to’atolua o lo o taofia pea i lalo o le vaavaaia a leoleo i le taimi nei, o le a fa’aauau pea ona taofia mo le umi e 48 itula, e fa’atalitali ai le isi la’asaga a le malo o le a faia e tusa ai o lenei mataupu, e pei ona taua e le molimau.