Na avea le le fiafia o le afioga i le ali’i faipule mai le itumalo o Manu’a #1 ia Fetu Fetui Jr, i le tatagi soo o le telefoni a se tasi o faipule i le taimi o le tauaofiaga a le maota o sui ananafi, ma itu na ia lafo ni fa’aupuga tau fa’amata’u i tusitala, lea sa ia fa’aigoaina o le “au fai news”.

E le gata na tu’uaia e le ali’i faipule “le au fai news”, o i latou isi tagata e masani ona tatagi a latou telefoni i taimi o tauaofiaga a le maota o sui (e ui e leai ni fa’avae o ana tu’uaiga), ae sa ia folafola fo’i lona togi o le tagata i le nofoa pe a toe tatagi sana telefoni, e ala i lona saunoa e fa’apea, “koeikiiki lele aku loa ma le gofoa i luga iiga”.

Na foliga le fiafia le ali’i faipule i le taimi na fai ai lana saunoaga, ae na avea o se mea malie i le fa’afofoga a ni isi o sui mamalu o le maota.

E le o se taimi muamua lenei ua lafo ai e ni isi o afioga i faipule ni saunoaga e a’afia ai fua vaega o Tusitala i ni mataupu e afua mai i totonu lava o le maota.

O le mataupu na tula’i mai ina ua tula’i le tamaita’i faipule ia Vui Florence Saulo e fa’alauiloa le aso o lana iloiloga, ae fa’afuase’i loa ona tatagi le telefoni a le afioga i le ali’i faipulea ia Faimealelei Anthony F. Allen.

Na vaaia e le Samoa News le tau autago solo o Faimealelei i lana taga e aumai lana telefoni ma fa’aleo laititi. E lei atoa se minute ae toe tatagi fo’i le telefoni a Faimealelei, ae o le taimi fo’i lea na tu’u atu ai e le Fofoga Fetalai ia Savali Talavou Ale le avanoa e saunoa ai i se mataupu na sii ai lona aao i luga.

Na muamua fa’amalulu le afioga a Faimealelei i le maota ona o le tatagi o lana telefoni, peita’i ina ua mae’a lana sanoaga ma toe alala i lalo le sui mamalu, na toe tatagi fo’i lana telefoni, o le fa’atolu ai lea ona tatagi le telefoni, ma avea ai loa ma itu na tula’i ai le afioga i le ali’i faipule ia Fetu Jr ma fa’aali lona le fiafia i le fofoga fetalai, ona o le tula’i soo mai o le fa’afitauli i telefoni a ni isi o sui mamalu.

Na taua e Fetui Jr i lana saunoaga e fa’apea, o le tatagi o le telefoni a se sui mamalu i taimi o iloiloga ma tauaofiaga a le maota, o se tulaga “le mafaufau” lea i totonu o le maota.

Saunoa Fetui Jr e fa’apea, “so o se taimi ou te ulufale mai ai i totonu o le maota lenei, e tu’u lava i le ‘vibration’ la’u telefoni”, ae foliga mai lava o lea e tau fa’atonu ni isi o sui mamalu i mea laiti ma faigofie.

“Lau afioga i le Fofoga Fetalai, e sili ai pe a e saunoa sa’o mai ai ia i latou nei atonu e fa’afofoga atu ai i sau saunoaga”, o le talosaga lea a Fetu Jr i le fofoga fetalai, ona ua fiu fo’i o ia e fautua i sui mamalu i a latou telefoni.

Na mae’a le saunoaga a Fetu Jr fa’asaga i faipule, ona fa’asaga lea i luga o le vaega e masani ona nonofo atu ai Tusitala ma ni isi o le fono ma saunoa e fa’apea, “Ae maise fo’i luga i le ‘au fai news’ lea e masagi ona kakagi kou kelefoni, vaai e ke’i lava i le lele aku o le gofoa i luga iiga e”.

E na o le sui o le Samoa News le sui o le “au fai news” sa i luga i le vaega o le maota fono i le taimi na fai ai le saunoaga a le alii faipule.

Na fesiligia e le Samoa News le afioga i le Sui Fofoga Fetalai ia Talia Fa’afetai I’aulualo, o ia fo’i lea o le Taitai o le Komiti o Tulafono a le maota i sona finagalo, e faatatau i le mataupu e pei ona atugalu ai le alii faipule mai Manu’a, i le tatagi soo o telefoni a ni isi o faipule i taimi o iloiloga ma tauaofiaga a le maota.

Saunoa Fa’afetai, e i ai tulafono e fa’asa ai ona tatagi telefoni i taimi o iloiloaga ma tauaofiaga a le maota, ua uma foi ona ia fautuaina sui mamalu e tusa ai o lea tulafono.

Saunoa fo’i Fa’afetai e fa’apea, e mafai e soo se faipule ona saunoa i mataupu faapea, ae mafai fo’i ona fa’asala e le Ta’ita’i o le Komiti o Tulafono a le maota le faipule na te le usitaia tulafono a le malo.

Na taua e se tasi o faipule e le i finagalo e fa’ailoa lona suafa e fa’apea, e le tatau i le alii faipule ia Fetu ona ia lafo ni saunoaga fa’apea i luma o le maota fa’asaga i le “au fai news” po o ni isi fo’i sui e le o ni faipule, aua e leai so latou leo e mafai ai ona tali atu i ana saunoaga i totonu o le maota.

Na taua fo’i e le faipule le tatau ia Fetu Jr ona fa’aetete mai lona soona faia o nei ituaiga saunoaga fa’apea, ona o saunoaga nei o lo o pu’e ma teu i fa’amaumauga a le maota.