TAULA LE MELI LA’U PASESE - ‘SUN PRINCESS’

O le tala mai le meli la’u pasese lea, e matua to’atele lava o lana pasese e o mai Ausetalia. Ina ua fetaui ma i latou i taimi o fa’atauga, sa matua fa’aalia lo latou fiafia i le tau.

“E le o se mea fou ia i matou le tau lea, e tutusa lava i tatou se’i vagana ai taimi o le tau malulu, e fai si matou malulu tele atu nai tou taimi timuga,” o se fa’amatalaga lea a le tama ua litaea, ae ua tali lana penisione, Michael Watkins o Brisbane, Ausetalia.

Mai le aso o fa’atauga, sa maua ai le taimi e talanoa atu ai i nisi fo’i o lo’o fa’aalia latou oloa taulima o la’ei eseese ua mae’a su’ia lelei, o sei fugala’au ma le tele o galuega taulima o teuga masani a tama’ita’i o taulima, tautaliga, ula fa’asamoa ma ula fulumoa, ae maise o pulou ma puletasi.

“O le aso e lelei lava fo’i nai fa’atau ua maua, e ui ina tele na’ua matou lavalava e tutusa fo’i ma sikaili a isi ua fa’atautau mai, ae o lo’o fa’atau lava nai tagata. O le tele lea e alu o ie lavalava saunia lelei i le elei ma mamanu Samoa fa’apea ma tautaliga ma taulima e fa’afetauia ai lanu o ie na, o mitiafu ua tusia ai Pago Pago, ae maise lava lavalava fo’i o tamaiti,” o se tala lea a Sela Sitini ma Vola Siasau mai le la’ua itu o le maketi i Fagatogo.

O le faleoloa a Sio Sasoi mai Leone, sa va’aia le matagofie o puletasi a le tama lea ma aloha o lo’o fa’atauina ai. O ie lavalava fo’i ma oloa laiti e fa’afetauia ai lavalava ma puletasi. Ua fa’ailoa e le tama, o lo’o taulia fo’i si ona aso i le Maketi, “E faafetaia lava, o lo’o taulia lava nai oloa e tauia ai le tigaina e la’u mai mea iinei, ae o lo’o maua fo’i ma tagata malaga i Hawaii o le tatou atunu’u.”

O le tina o Elaine mai Fagatogo, sa va’aia le tapena o ana oloa i le ta tonu o le itula e 2:00 i le aoauli, ua ia fa’ailoa mai, “E faia le a’oga pese a le Ekalesia, ae o le va’a fo’i e toe taliu ese atu i le afa o le 2:00, e sili la ona tapena loa i le taimi nei, leaga e tapena fo’i mea’ai a le fanau, a’o le’i o atu i le a’oga pese.”

O le va’a lenei o le Sun Princess sa pu’eina ai le ata o le “Love Boat - The Next Wave!” lea sa avea ai Robert Urich ma tama o le ata televise lena i le tausaga 1995. E mafai ona o’o le pasese a le va’a lea i le 2010 tagata ma lona auva’a 924.

Peita’i, e lua fo’i fa’alavelave fa’afuase’i na tutupu i luga o lenei va’a ma ua fa’amauina. O le tausaga e 2013 na lipotia mai ai e le tina lona to’alua e 73 tausaga ua leiloa po’o fea o i ai. Na saili e ui ina lagilelei lea vaitaimi mo sailiga e va’alele e tolu na fa’atautaia le sailiga lena, ae le’i toe maua lava le tino o lea tama.

I le tausaga 2014 na pa’u ai fo’i se tama e 84 tausaga mai luga o le va’a i le sami, i le malaga toe taliu atu a le va’a lava lea i Sydney ina ua mae’a lana malaga ta’amilo na so’o ai Niu Sila.

O le masina o Oketopa, e ono lelei malaga a meli la’u pasese o le a afea ai i tatou ma e talafeagai lava fo’i ma le tatou tapenaga mo le tatou Vaiaso o le Moso’oi 2015.