Ua molia nei e le malo o Amerika Samoa le to’alua o se ali’i pagota o lo o taofia i le toese i Tafuna, i lona taumafai lea e ave fa’anana se vaega o le pauta fa’asaina o le aisa i lona to’alua o lo o taofia i totonu o le falepuipui.

O moliaga mamafa e lua ua molia ai e le malo ia Sula Tui e aofia ai lona umia fa’asolitulafono o vaega o le pauta oona o le aisa, atoa ai ma le isi moliaga o lona umia fa’asolitulafono lea o le pauta o le aisa ma le fa’amoemoe e tulei pe fa’atau atu i isi tagata.

Pe tusa o le itula e 1:15 i le afiafi o le aso Tofi na te’a nei, Tesema 4, 2014, na logo ai e leoleo o le toese i le vaega o Leoleo Su’esu’e i le Ofisa o L eoleo i Fagatogo, e i ai se afifi na alu atu se fafine e avatu i lona to’alua, ae latou maua ai ni vaega e masalomia o vaega o le pauta o le aisa.

Ina ua taunu’u leoleo su’esu’e i le toese, sa fa’apea loa ona tu’uina atu i ai e leoleo o le toese se afifi o lo o avatu i totonu o se pepa fasimoli, le ituaiga o le ‘Irish Spring’ fa’atasi ai ma se afi penisini.

Na fa’ailoa fo’i e leoleo o le toese i Leoleo su’esu’e, o le fafine na alu atu ma le afifi, o le to’alua lea o le ali’i pagota o Samuel Wright o lo o taofia i totonu o le toese talu mai le masina o Aokuso 2014.

O Wright o lo o tu’uaia fa’atasi ma ni isi ali’i se to’alua, i lo latou osofaia lea o le faleoloa o le Gold Gonda Store i Fagaalu, e ala i le fa’alala i ai o se fana ae fao fa’amalosi se tama’i pusa sa i ai se tupe i totonu i le masina o Me 2014.

Sa falepuipui muamua fo’i Wright i ni tausaga ua mavae, ina ua ta’usala o ia e le fa’amasinoga i le moliaga o lona umia fa’asolitulafono o vaega o le pauta fa’asaina o le aisa.

Ina ua mae’a ona tu’uina atu i leoleo su’esu’e fa’amatalaga uma e fa’atatau i le ta’avale na toe malaga ese mai ai le ua molia, na aga’i mai ai loa leoleo e saili o ia, peita’i ina ua saili atu i lona fale i Fagaalu, sa le’i maua atu i ai se isi, ae o lana telefoni feavea’i na tu’u e se aiga tuaoi i leoleo, na mafai ai loa ona fa’afeso’ota’i e leoleo ia Sula ma talosagaina ai loa o ia ina ia latou fetaui i le Ofisa o Leoleo, ona o le afifi na alu atu ma ia e ave i lona to’alua i le toese.

Na taua e le fafine i leoleo ina ua fesiligia o ia e fa’aepa, o ia na alu e piki mai lavalava a lona to’alua mai le falepuipui e ave e tata, peita’i ina ua mae’a ona ia pikiina lavalava a lona to’alua, sa fa’ailoa atu e lona to’alua ia te ia, e vaai lana uo lea e alu atu ma lana afifi e tu’u atu ia te ia, ona alu atu lea e momoli atu ia te ia i le toese.

A o i ai le fafine ma lana fanau i Tafeta mo le faia o le fofo a se tasi o lana fanau, sa ia taua i leoleo le telefoni atu o se tagata i lana telefoni, ma fa’ailoa atu le afifi e fia ave ia Wright o lo o i totonu o le toese, o lea na latou tulioso ai loa ma lana fanau i le pasi ma latou toe fo’i atu i le toese, ma tu’u ai loa le afifi i le ali’i leoleo o lo’o i luma o le faitoto’a o le falepuipui.

I totonu o le pepa fasimoli o le ‘Irish Spring’ na ave e le ua molia i le ali’i leoleo o le toese, sa maua ai ni ‘straw’ se lua ua uma ona tipi tulimanu, ae o lo o i ai i totonu vaega o le pauta fa’asaina o le aisa.

O lo o taofia pea i le toese i Tafuna le ua molia e fa’atali ai taualumaga o lana mataupu lea ua fa’agasolo i luma o le fa’amasinoga i le taimi nei.