Ua taulimaina nei e le Ofisa a le Loia Sili a le malo le ripoti mai se su’esu’ega sa fa’atautaia e le Matagaluega o le Puipuiga o le Saogalemu Lautele, e tusa ai o le mataupu e pei ona tu’uaia ai ni ali’i leoleo se to’alua, i lo la a’afia lea i se vevesi na tula’i mai i le Fale Kalapu o le Evalani i le lua vaiaso talu ai.

I se fa’atalatalanoaga a le Samoa News ma le afioga i le Komesina o Leoleo ia William E. Halack i le vaiaso nei, sa ia fa’amaonia mai ai le mae’a o le latou suesuega sa faia, ma ua tu’uina atu la latou ripoti i luga o le Ofisa o le Loia Sili mo sa latou fa’aiuga.

O ali’i leoleo e to’alua na a’afia i lenei mataupu e aofia ai Det. Ioane ‘Johnny’ Paselio ma le susuga ia Geoffrey Tagaloa.

O le vevesi na tula’i mai i le po o le aso 18 Oketopa 2014 i le fale kalapu o le Evalani, ina ua fautuaina e tagata faigaluega o le fale kalapu ali’i leoleo e tuua loa le nofoaga ona ua tapuni le fale kalapu, ae na avea ma itu na le fiafia ai se tasi o ali’i leoleo a o ofu savili i laua, ma tu’uaia ai loa lona tu’iina o le ‘bouncer’ o le fale kalapu, ae ina ua taunu’u atu i fafo o le fale kalapu, na tu’uaia ai e ni isi o molimau le togi e le isi leoleo o se fagu ma ta’e ai se fa’amalama o le fale kalapu.

Na taua e molimau sa i ai i le taimi na tula’i mai ai le fa’alavelave i le Samoa News, sa vaaia le matua ova o le ‘onana o ali’i leoleo na a’afia, ae na matua fa’ateia i latou ina ua leai se isi o i laua na taofia e leoleo i le po lea, e tusa ai o aga masani i so o se taimi e tali atu ai leoleo i ni vevesi e tutupu i so o se vaega o le atunu’u, latou te taofia faapagota ai so o se tasi e tuuaia i le save’u o le nonofo filemu o le atunuu, aemaise lava pe afai na a’afia ai le ‘ava malosi.

E le i fa’apena le mataupu fa’asaga ia Paselio ma Tagaloa, e le i taofia faapagota i laua, ae na faia e le Ta’ita’i Uati le fa’aiuga e fa’ataga ai laua e fo’i i o la aiga i le po na tula’i mai ai le fa’alavelave.

Ina ua fesiligia e le Samoa News le Komesina o Leoleo e fa’amalamalama le mafua’aga na le taofia ai e leoleo ia Paselio ma Tagaloa, na saunoa ai Haleck e fa’apea, o le faaiuga e aua ne’i taofia ali’i leoleo e to’alua na a’afia i le fa’alavelave, o le fa’aiuga na faia e le Ta’ita’i Uati.

Na toe fesiligia e le Samoa News ia Haleck pe na te lagolagoina le faaiuga sa faia e le Ta’ita’i Uati e aua ne’i taofia ali’i leoleo i le po na tula’i mai ai le fa’alavelave, ae na tali le komesina, e na o le Ta’ita’i Uati na te fa’amaninoina le tulaga o lana fa’aiuga sa faia i lea po, aua e pau i ona luga aafiaga o le faaiuga sa ia faia.

Na taua foi e le Komesina o Leoleo e fa’apea, sa tatau lava fo’i i le Ta’ita’i Uati ona ia fesiligia se fautuaga mai isi leoleo e maualuga atu ia te ia, aemaise lava pe afai o se mataupu e a’afia ai ni leoleo, aua i lona talitonuga, na te le taliaina ituaiga amioga faapenei pe a fai e leoleo, aua o leoleo na faatautu e faamalosia le tulafono, ae le o le soli o le tulafono.

O le tula’i mai ai o lenei mataupu, na faia ai loa e le Komesina se suiga i tiute tauave mo ali’i leoleo e to’alua na a’afia, ina ia aua nei toe aofia laua i mataupu e fesootai ai ma le atunuu, peita’i ina ua tula’i mai le mataupu e fa’atatau i le tama’ita’i talavou lea na taofia e leoleo i le vaiaso na te’a nei, i lona umia fa’asolitulafono lea o vaega o le pauta fa’asaina o le aisa ma le fa’amoemoe e tulei ma fa’atau atu i ni isi tagata, na tofia ai loa le ali’i leoleo su’esu’e ia Paselio na te ta’ita’ia le suesueina o lenei mataupu, ae na avea ma itu na fa’asea ai ni isi o leoleo, i le tofia o Paselio e faauluulu i ai le suesueina o le mataupu tau i fualaau faasaina, ae o lo o to’atele isi leoleo o lo o i ai le agava’a latou te fa’atinoina ai le galuega.

Ae na taua e Haleck i le Samoa News i le vaiaso nei e fa’apea, na mafua ona tofia Paselio e fa’auluulu i ai le suesueina o le mataupu lenei, e le gata ua lava lona tomai i le suesueina o mataupu e faatatau i fualaau faasaina, ae ua tele foi tausaga o galue i le Vaega a le “Vice and Narcotics” a le Ofisa o Leoleo.

O le ali’i Kapeteni ia Peau Paulo Leuma lea sa fa’auluulu i ai le vaega a le “Vice and Narcotics” a le Ofisa o Leoleo, ua tofia nei e fa’auluulu i ai le Ofisa o Leoleo i Leone, e pei ona saunoa Haleck, ma tula’i mai ai loa na o Paselio o lo o totoe i le vaega sa gafa ma le suesueina o fualaau faasaina.

O le faafitauli i le vaega a le “Vice and Narcotics” e pei ona saunoa le alii komesina, o le le lava o leoleo e galulue e faatino le galuega, ae talu ona tuu atu le “Vice and Narcotics” i lalo o le vaavaaiga a le CID, ua to’atele leoleo e mafai ona galulue e suesue ma faatino le galuega i so o se taimi e tula’i mai ai se manaoga.

O le faaiuga la pe molia ali’i leoleo o lo o tu’uaia na a’afia i le vevesi e pei ona tula’i mai i le Evalani, o le fa’aiuga lena e tuuina mai e le Ofisa o le Loia Sili e pei ona saunoa le alii komesina o leoleo, pau le vaega a le ofisa o leoleo sa fai, o le faia lea o le suesuega ma ua mae’a foi.