Ads by Google Ads by Google

Taunuu fana a le Ofisa o Leoleo

O le faaiuga o le vaiaso na te’a nei na taunuu ai i le teritori fana e 24 na oka e le Matagaluega o le Puipuiga o le Saogalemu Lautele, ma le faamoemoe e fa’aa’upegaina ai leoleo i le taimi e faatino ai a latou tiute.

 

I se feiloaiga ma le Komesina o Leoleo ia William E. Haleck i le taeao ananafi, sa ia faamaonia mai ai i le Samoa News le taunuu mai o fana i le aso Toona’i na te’a nei, lea e $10,400 le tupe sa faatau ai, ma o lo o teuina nei i totonu o le sefe e faatali ai le taimi e faaaoga ai, pe a maea a’oa’oga ma aloaia leoleo latou te faaaogaina.

 

Na taua e Haleck e faapea, afai ae taunuu le faamoemoe, o lo o i ai le fuafuaga o fana o le a faaaoga e leoleo o lo o muamua tali atu i taimi e tula’i mai ai faalavelave i totonu o le atunuu (first respondent), po o i latou o lo o galulue i le vaega o le Patrol Division.

 

“E leai se mea e ave ai fua se fana i le leoleo e le muamua tali atu i le taimi o le faalavelave, sei vagana le leoleo o lo o aofia i le vaega e muamua tali atu i taimi o faalavelave, o i latou tonu na e tatau ona a’oa’oina ina ia aloaia le tuuina atu i ai o fana,” o le saunoaga lea a le alii komesina.

 

Sa ia taua foi e faapea, o lo o i ai lana fuafuaga e tofu lala o le Ofisa o Leoleo i Leone, Tafuna, Fagatogo ma Fagaitua ma fana ta’i lima, ae o fana e totoe ai, e tatau ona tofu lava le sifi ma ni leoleo se toalua pe toatasi foi ma le fana, ina ia mafai ona latou tali atu i soo se taimi e tulai mai ai le faalavelave.

 

Ina ua faatoa amata ona faatalatalanoa mai lenei mataupu e le alii komesina i le amataga o le tausaga nei, sa i ai nisi o le atunuu na tete’e ai, e aofia ai nisi o le Fono, faapea ai nisi sa tautua i le galuega faaleoleo mo le tele o tausaga.

 

I lo latou talitonuga, e le tatau ona fa’aa’upegaina leoleo a le malo o Amerika Samoa, leaga e le o i ai ni faalavelave matuia o tutupu i totonu o le atunuu, e ono moomia ai le faaaupegaina o leoleo.

 

Ae ina ua fesiligia le alii komesina o leoleo i le taeao ananafi e tusa ai o lea manatu, sa ia teena ai le manatu e faapea, e le o i ai ni faalavelave matuia o tutupu i totonu o le teritori.

 

“A lea ua tatou molimauina le faalavelave na tagatavaleina ai le alii leoleo ia Lt. Det. Lusila Brown, o se faataitaiga lelei lena o suiga ua vaaia i le atunuu, aua e i ai lou talitonuga ana fa’aaupegaina leoleo i le taimi na tula’i mai ai le faalavelave lena, ou te iloa e matua talafeagai se gaioiga e faia e leoleo e taofia ai gaioiga sa faia e le alii ua molia nei, ona o lona faia o se gaioiga e lamatia ai le saogalemu o tagata,” o le saunoaga lea a Haleck.

 

Na faamanino atili e Haleck e faapea, e le faapea o le a faaaupegaina leoleo ona manatu lea o le atunuu, o taimi uma lava e tula’i mai ai se faalavelave e faaaoga e le leoleo lana fana.

 

Sa ia taua, e i ai a’upega mama e muamua faaaoga e leoleo i taimi e tali atu ai i ni faalavelave e tutupu mai, ma afai e fiu lava leoleo e faaaoga aupega mama nei e le solomuli lava le tagata faatupu faalavelave, ona faatoa mafai lea ona faaaoga e le leoleo lana a’upega, ae fuafua lava i le tulaga lamatia o le soifua o le leoleo po o tagata lautele foi o le atunuu o lo o aafia i se faalavelave.

 

Na taua foi e le alii komesina e faapea, ailoga e i ai se matua o lo o leoleo sona atalii poo sona afafine, e mana’o e alu sona atalii e fofo se faafitauli i se faalavelave e tula’i mai i le atunuu, pe afai o lea faalavelave o lo o faaaogaina ai e ni tagata faatupu vevesi ni laau malosi, ae savalivali atu le leoleo na o lona fatafata ma ona lima e leai se mea e puipuia ai lona saogalemu.

 

I le silia ai ma le 35 tausaga o avea le alii komesina o Leoleo ma leoleo i Amerika Samoa nei atoa ai ma Hawaii, sa ia taua ai e faapea, e taua tele le faaaupegaina o leoleo i le taimi e faatino ai a latou tiute, ina ia mautinoa e le gata e mafai ona latou tali atu i le taimi o le faalavelave ae mafai foi ona latou puipuia le atunuu i le taimi e tulai mai ai faalavelave.

 

“Afai o lea ua faaaupegaina leoleo o le malae vaalele, ona o le faatonuga mai le vaega a le FAA, aisea e le tatau ai ona faaaupegaina tatou leoleo o lo o galulue i le puipuia o le saogalemu o le atunuu,” o le saunoaga lea a le alii komesina.

 

Na taua e Haleck e faapea, o lo o i ai foi le fuafuaga e tatau ona faa aupegaina ma Masela o le Faamasinoga, ona o le faigata o le latou galuega i le puipuiina lea o le vaega o faamasinoga.