I le tutu ai o Samoanalua e puipui le soifua maloloina a ona tagata, ua taoto atu nei se fautuaga mai le afioga i le ali'i Kovana ia Lolo Matalasi Moliga ma le Fono Faitulafono, fuafuaga fa'ataoto a le vaega o le Soifua Maloloina atoa ai ma le falema'i o le LBJ, i auala e togafitia ai se tagata e fa'amaonia le a'afia i le gasegase mata'utia o le 'Ebola', lea ua faitau afe ma afe tagata o le lalolagi ua maliliu ai.

Na taua e le Fa'atonusili o le Matagaluega o le Soifua Maloloina ia Motusa Tuileama Nua e fa'apea, o tapenaga ma fuafuaga a le matagaluega ua faataoto i le taimi nei, e tasi lava le sini ma le fa'amoemoe, ia lava sauni Amerika Samoa e puipuia ona tagata mai le a'afia i le fa'ama'i o le 'Ebola'.

Saunoa Motusa e fa'apea, o lo o autu tapenaga a le soifua maloloina ma le LBJ i tagata e ulufale mai i Amerika Samoa, ae maitauina le aafia i auga o lea ituaiga gasegase e pei o le fiva, ona faia ai loa lea o fuafuaga e auina sa'o atu lea tagata i le LBJ e togafiti ai, ma fa'aauau ai loa iina isi suesuega mo lona soifua maloloina.

Na faamanino e Motusa i le Samoa News e fa'apea, o fale ie faapitoa lea ua fausia e le vaega o le soifua maloloina e faatutu i luga o le uafu po o le malae va'alele foi, o iina e amata togafiti atu ai le tagata e ulufale mai i le atunuu ma masalomia o lo o i ai 'auga o le gasegase e pei o le fiva ma isi auga.

Na taua e le afioga i le ali'i faipule mai le Palemene a Samoa ia Toesulusulu Cedric Schuster e fa'apea, o le taua o le fetufaa'i o metotia ma auala e puipuia ai le atunu'u mai le 'Ebola', ina ia mautinoa e le ulufale mai lea ituaiga fa'ama'i oti i totonu o le atu Samoa.

"O le taimi lava e ulufale mai ai le gasegase lenei i Samoa, lona uiga ua otomeki fo'i le maua atu ai ma Amerika Samoa, lona uiga la, e taua tele le galuega o lo o galulue ai sui o le soifua maloloina atoa ai ma le falemai a Samoa e lua, ina ia saili auala e foia ai fa'afitauli nei", o le saunoaga lea a le alii faipule i le Samoa News, ina ua fesiligia i sona lagona e tusa ai o lenei mataupu.

Ae na taua e Motusa e fa'apea, o faleie ia ua mae'a ona faatulaga e le soifua maloloina, ua maea fo'i ona aoaoina ni isi o le aufaigaluega mo le fa'aaogaina, atoa ai ma le vaega faapitoa ua tofia e gafa ma le togafitiina o le tagata ua a'afia i auga o le fa'ama'i.

E ese mai i le gasegase o le 'Ebola' sa talanoaina i le fonotaga a vaega o le soifua maloloina a Samoa lea na fa'ai'uina i le aso Tofi na te'a nei, sa aofia ai foi le talanoaina o auala e foia ma tete'e atu ai i le tele o gasegase le pipisi atoa ai ma gasegase pipisi ua a'afia ai le toatele o tagata o le atunuu.

Na taua e se tasi o sui usufono sa i ai i le fonotaga e faapea, o se tasi o itu e ao ona ave muamua i ai le fa'amamafa a le vaega o le soifua maloloina a Samoa e lua, o le aoao lea o tagata ina ia faamasani i taumafa paleni ma le soifua maloloina.

"E fiu lava vaega a le soifua maloloina e puipui gasegase pipisi ma gasegase le pipisi, ae afai e le mana'o le tagata e usita'i i tulafono o taumafa, e atili ai lava ona faateteleina gasegase i le atunuu, o le fautuaga, ia faatelegese i le tausami i meaai le paleni", o le saunoaga lea a se tasi o sui usufono sa auai i lenei fonotaga.

O le aso ananafi na toe tali atu ai le au malaga mai Samoa, ma le faamoemoe fa'atoa toe feiloa'i itu e lua i le fonotaga lona 6 ua faamoemoe e usuia i le tausaga fou.